eSefarad Noticias del Mundo Sefaradi
EL PIANO
Avlando de un piano, yo siempre me akadro ke al lado yzkierdo de moestra sala de komeder se topava el piano.
Mi madre era pronta de ambesar me tokar el piano i de darme alkanzar la altura de sus ekspektivas. A mi padre le paresió un grande plazer si yo puedia tokar el piano komo mi madre, la kuala el adorava. Tambien si el piano no avía sido una parte fundamental de la identidad de mi madre, él pensó ke esto era una parte importante de mi edukasón, espesialmente de su niña. Mi madre estava muy a gusto en el piano, en una manera ermosa. Eya tokava el piano kon charme i kon grande entusiasmo, kon su propia interpretasión. Yo era tresalida oyir la taner bailes, kansones , i kantikas de operetas.
En la dékada de los 30 años, kualke familia ke podían permitírselo, embiavan a sus ijas a klases de piano para sembrar las semillas de la kultura en sus korazones.
Yo devia aprender a tokar el piano… ansina devia ser.
Kuando mi madre vido ke so kaprichosa, un dia me dicho de esperar al Sr. Pavel ke devia darme lesiones de piano. Devia achetar. En esperandolo kada vez me ize más nyervosa i jmpasiente. Eya un dia frío de Febrero.
Sr. Pavlov allegó. Me impresionó su vestimienta pesgada , su chapeo de kuero i su tallia. Yo simplemente lo yami «Gospodin Pavel».
Mi primera impresión fue ke no tenía miedo de él. Él me ordeno de djugar un edutio i después de unos puntos, el anunsió ke tengo talento natural, un buen oído para la músika i un buen rithmo.
I entonses, mis renkontros kon Sr.Pavel ampezaron. Tambien ampesi a disfrutar poko a poko de las melodias de los etudes músikales, sin azer yeros. Tashtederiando de ser un buena estudiante iso Sr. Pavel feliz.
Antes de tomar lesones de Sr. Pavel sentíva en tokando el piano komo avrir un rompekabezas matemátiko. Fina este tiempo yo nunka no ganie un entendimiento profundo de músika, mi korazon nunka alkanzo un sentimento de la belleza i de resplandor de este arte, no senti toda su alegria, amor i passion , nunka no fue kapachi de konoser la diferensya de la musika de Bach, Mozart, Brahms o Beethhoven, salvo sus portraitos, sus frizuras en los livros.
Sr. Pavel todo tiempo era agradable , me enkorajava. El era un emigrante “Russo blanko”, ke se fuyo de la revolusion de Oktombre, de los Bolshevikos, alrededor del los anyos 1917-1920. Sr. Pavel era un sivdadino ke tenia solo un “Nansen Pasaporto”. Se avlava ke Sr. Pavel era en su kamino a ser un pianiste de konserto antes ke llegó a Varna (Bulgaria)
Un día yo avía estando luchando kon una pieza de músika kuando el dicho:
«Te rogo alevantate i desha me jugar esta piesa por ti.»
Él alevanto las mangas de su chaketa ampeso a jugar. Yo nunka no avía oído a nadie jugando este tipo de músika kon tanto pasyon, tanto differente de esto ke mi madre mos regalava.
El eskosho de taniar kon un sonido basho, la melodia akompaniada por su voz trankila demandano me:
«Sientes un trokamento de tempo aserkandose de mosotros? Una fortuna ?.
«oyes el relámpago i el trueno al orizonte ?
» oyes el poderoso viento jugando kon las ojas de les arboles?
“oyes los pasharos bushkando ande eskonderse de la luvia?
Los dedos de Sr, Pavel tokando el teklado komo un danse de papiyones, transformaron la musika en un “ crescendo”. El sonido mesklado kon su voz, konventieren la melodia, la armonia. i fue komo ke pintaron un image ke yo podia ver.
Luego despues ke el sonido alkanso a su altura, su voz entrando en un “descrescendo” dicho:
«oyes ke la fortuna paso?
«oyes las gotas de lluvia kayendo sobre las ventanas?
¿ves el bebé ke se esta endormiendo?
¿ves a la madre sentada en la silla, kon las manos sovre su prostela, reposandose?
Al kavo:
«Se oye el silensio?»
Esto fue genial. Pavel avrió la puerta para mí .Me avrio los ojos . Él me enseñió a eskuchar un sonido i de “ verlo”, aunke ke la visión es una palavra de objeto el sonido es una palavra de evento. Ansi me amostro ver ke un evento akustiko se puede transformer a un imaje, a una koza visual , ke se puede tokar. Me ambesi a studiar las notas , sus formasiónes, entender kualo es allegretto, andante, pianissimo, forte fortissimo, demesmo kualo es tremolo, kadensia, legato o staccato i phrasas demonstrando el trokamente de la dinamika.
Nunka no fui un buena pianista, pero siempre pensi ke la músika deve ser algo ke se puede gustar , no algo ke te sientes obligado a azerlo por plazer o a favor de otras personas. Me desperti , i en mi korazon me se izo klaro ke kada pieza de musika ke se jugava tenia demesmo una kara, una vista, komo un livro kon ilustraziones.
En estando en la eskuela sekundaria, pensava ke yo sólo estava ayi para komplaser a mis padres. Pero esto fue sólo para mí i ke las lesones de Sr. Pavel trokaron. Grasias a Sr. Pavel alkanzi de komprender la belleza i la ermozura de la arte de musika.
Fina mi último añyo de sekundaria todavía jugi el armonio del orkestra juvenil de muestra eskuela.
La ultima vez ke me enkontri kon St. Pavel fue el 30 de Agosto de 1939 elegido para ser el día de la fiesta de graduasión de las 8 grado klassas de muestra Alma Mater. Los participantes fueron los alumnos, los padres, los maestros i las personalidades de muestra sivdad en Varna, Bulgaria. Sr Pavel fue entre los invitados.
Mientras ke la fiesta de graduasion es un momento de orgullo para kualkar estudiante, para mí fue un día espesial.
El día de graduasión finalmente avía llegado , se avrio la sala, i después ke las últimas notas de muestro repertorio, la Overtura de William Tell de Rossini fueron jugados, el konduktor Sr. Kostantin dio las grasias al publiko. Este día él también devia retirarse. Despues resivió su diploma i un ramo de flores de sus alumnos.
Antes ke el orkestro devia jugar el himno national bulgaro, el director de muestra eskuela se alevantó de su asiento i ayego enfrente de Gospodin Pavlov, ke fue asentado en la primera fila de la sala i le marmulo en su oído. Sr.Pavlov se alevantó, se asento en frente del piano i ampeso a tokar el piano, jugando el Concerto 2 . de Chopin Esta pieza musikala, jugada kon la virtuosidad ekstraordinarya de Sr. Pavlov, kavzo una grande ovasión del públiko i fue saludada kon alegría i admirasión.
Nunka en mi vida non estuve tan feliz i orgullosa de ser uno de los alumnos del Sr. Pavlov. Nunka no oyi esta músika ermosa, nunka no avía antes eskuchado la armoniya do estos sonidos.. Fina oy me akodro de los dedos del Sr. Pavlov bailando sobre las teklas del piano. Ké alegría para mí. Kualo puedo desir…… me mankan palavras . Mientras ke la fiesta de graduasion es un momento de orgullo para kualkar estudiante, para mí fue un día espesial.
Sr.Pavlov fue eskoshido de ser el mueve konduktor del orckestro.
Para mí este momento de alegría fue muy kurto, ya ke al dia siguiente ampeso la Segunda Guerra Mundial. Se azieron varios kambios drástikos en las vidas de la populasion en el mundo. Sr Pavel partio a los Estados Unidos ande bivia su ijo i yo kon mi familia fue obligada de salir de Bulgaria i tomar kamino a Teherán, Irán.
Pero una kosa es sierta .Yo nunka fue un buena pianista, ma pero asta del día de oy me enkanta irme a konsertos, siempre ke puedo, espesialmente kuando un pianist es el soliste.
Tiene el silensio un sonido?
Rivka Abiry
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Fuente: Enviado por Rivka ABIRY / Haifa
