Las konsejas de Rivka: EL BUMUELO

Por Rivka Abiry

Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.

EL BUMUELO

Kero oy empesar mi kuento kon el bumuelo, ke es una dulsura echa en kaza o en una panaderia, en mezklando arina, guevos, asukar, leche i maya. Despues ke la masa asuvio, se korta en anillos, se frie en azeite i finalmente se sarpika kon asukar pulverizada. Solamente la vista de estas dulsurias, dan a kada uno de mosotros la gana i el deseo de aprovarlos, de meterlos en la boka, de chupar el dulse ke se mete arientro, aziendo koshkiyas al paladar, o tomar a lado de eyas una taza de kafe o te. En Israel se yaman » levivot» i de alguna manera es una dulsura tradisionel de Hannuka, porke se kosinan en aziete i mos akodran el milagro del día de esta fiesta.

Es kurioso de oyir ke para mí el bumuelo se asosia siempre kon el kavayero Ruso, ke yo me akodro de mi chikez. Déshame yamarlo Ivan.

Indome a las klasas primeras de una eskola estranjera, yo tenía la okazión de enkontrarlo a Ivan, de lo ke, delante de mí, dainda tengo la vista de su silueta. Un ombre ermoso uzndo un chapeyo de kuero, (un kalpak), una kamiza Rusa, kon una alta yaka de manderin, ke se serrava i enbutonava ariva.(una » rubashka» en Ruso), un par de pantalones remetidos en sus altos botas pretas i una tabla, alkolgada kon una sintura de su espalda, yevando los bumuelos freskos i savrozos.
Este ombre se topava serka de la entrada de muestra eskola, i kuanto la kampana sonava la rekreasion, mosotros los elevos, kon una moneda bulgara en la mano korriendo mos echavamas afuera para topar el vendedor Ruso i merkar sus bumuelos, preparados por su esposa. El bumuelo era una de las atraksiones ke teníamos durante la rekreasion. Komo muestra eskola estranjera era mueva, no éramos más de 20 elevos i kreo ke Ivan también konosía la mayor parte de mosotros i muestros nombres.
Ivan era un emigrante» Russo blanko» , ke se fuyó de la revolusion de Oktobre, de los Bolshevikes, alrededor del los anyos 1917-1920. En este tiempo, mataron al Tzar, konfiskaron los mulkes de la djente rika para utilizar i para finansiar la revolusion i kavzaron a muncha djente de fuirse. Estos émigrantes eran de todas las klasas, tales komo soldados i ofisiales militares, intelektuales, ombres de negosio, ansí komo funksionarios del govierno imperial Ruso. Una grande parte de » La Guardia Blanka» se fueron de la Ukrania a la Bulgaria, ke era entonsenses una monarkia, i de mesmo a la Turkia.
Ivan aparesia kada dia a la entrada de muestra eskuela trayendo sus bumuelos freskos i sabrozos ke él yamava «ponshkis harasho» . Penso ke estas vendidas eran la renta prinsipal de su familia. Un día kuando él alkanso a arekojer una suma sufiziente de dinero, se merko un » Fayton» un karro avierto travado por dos kavajos. Kon él , Ivan yevava a los turistos en viajes en la sivdad, i alrededor de la mar. Por siguro avía en akel tiempo chikos autobuses ke viajavan del sentro de la sivdad, a sus vizindados, asta el palasio del Rey Boris en Evsinograd, ma viajar kon el » Fayton» de Ivan era un plazer especial porke Ivan savia a englenear sus turistos kon la istoria del lugar.
Visto ke mi padre konosia a Ivan i tenia konfiensa en el, mi ermano i yo utilizavamos su karro para ser transportados despues de las oras de la eskola, a muestra villa . Durante los mezes de Mayo fina Oktobre, Ivan vos yevava a muestra villa, situada a una leshura de kuatro kilometras afuera de la sivdad. El karro suyo tenían un soporto i lugar permanente, no lejos de la eskola de mansevos, i ayi mos esperava. Mi ermano tuvo gusto siempre de asentarse en frente de él, mientras ke yo disfrutava del chiko viaje, asentada en la parte posteriora del karro, i sintiendome komo una reina. A propósito, Ivan me metio el nombre» prinsesa», ke ma plazia.

Mientres ke viajavamos en el karro, oyendo el amistoso avlar de Ivan kon sus kavayos blankos, akompanyado del sono de su kamdjik, el mos okupava kon sus istorias sovre la Rusia, el pais ke el avia deshado, aunke ke él fue orgulloso de su egzistansia en muestra siv dad. Sobre muestra yegada a kaza, mi abuela mos esperava jeneralmente, metiendo a Ivan de vez en kuando unas monedas en su mano, un poko de komida echa en kaza o guantes kroshetadas de su mano.

Un dia Ivan fue mazalozo, le salio piyango i alkanso a mijorear su vida, kuando uno de los profesores Rusos en muestro gimnasio kayo hasino,i alguno devia de remplasarlo. Ivan vendió su karro, se merko un vestido ermoso i ampeso enseñyarmos la lingua i la literatura Rusa, ke eran su forte i su profesion de antes. Dainda me akodro kómo él de su manera suave, intelijente , konvinsida i elaborada mos invitava de ver la shena i a los éroes de los dramaturgos i de los eskritores rusos komo Dostoevsky, Antón Chekov, Nikolai Gogol o Alexander Pushkin. Mientres ke el mos enseñyava , reinava una trankilidad espesial, una atmosfera de intereso en la klasa. El savia komo atirar muestra atension. Es ansi, ke yo personalmente, enkantada de sus lisiones lo yami » Mi Ereo Ruso».

Poko antes ke forsaron a mi familya, de salir de Bulgaria, siendo eramos sividadanos estranjeros, Ivan también tuvo la mesma suerte, de ke el era un sivdadano ke tenía solo un » Nansen Pasaporto». Este pasaporto fue dado a los desplasados, ke después de la revolusyón de Bolshevikes de Oktobre se fueron de la Russia i los klasifikaron komo personas sin una patria.

Mosotros mos fuimos en Junio a Teherán, mientras ke Ivan fue forsado por su ijo de partir a la Amerika.

Grasias de azerme akodrar de Ivan. Se puede tomar al shuki, ma kada vez i vez kuando veo un bumuelo, servido kon asúkar enriva, komo una montañyika tapada kon su inyeve freska i blanka, me viene al tino mi » Eroe Ruso».

Rivka ABIRY / Haifa
Publikado en El Amaneser