eSefarad Noticias del Mundo Sefaradi
Uno de los temeles del djudezmo es de no peskuzar en kozas enkuvyertas, a saver, ke modo era este mundo antes ke se krearan los syelos i ke es aparejado de ser de el despues de tyempo. Ni saver de lo ke ay mas arriva de los syelos i debasho de la tyerra, i detras de las kuatro partes del mundo, ke son mizrah (oryente), maarav (oksidente), tzafon (norte) i darom (sud), ke ay ayi.
Ke syertamente no alkansa muestro meoyo a poder entender una de mil, por esto no tenemos lisensya de pensar en dinguna koza de las ditas, i todo ken para myentes en esto mijor fuera ke no vinyera al mundo.
I topimos maase en un rey grande i temerozo puvlikado por el mundo, yamado por nombre Aleksandros Mokdon, ke fue rey de Yavan (Gresya) doze anyos i arrodeo el mundo entero. I kuando fue por la parte de darom les demando a los viejos de la sivdad dyez demandas.
Primera. Es kual es mas leshos, de los syelos a la tyerra o de mizrah a maarav? Disheron a el de mizrah a maarav es mas leshos, ke la preva de esto es, syendo vemos ke kuando esta el sol en mizrah o en maarav todos pueden alsar los ojos a verlo, ke syendo muy leshos no les aze danyo, lo kual ke estando el sol en medyo del syelo dinguno puede alsar los ojos a verlo, ke syendo esta serka de la tyerra, su relustror es muncha ke no es posivle atinarlo.
I muestros savyos dizen ke la leshura ke ay de la tyerra a los syelos es igualmente de la leshura ke ay de mizrah a maarav i no ay diferensya entre eyos, i el taam (1) ke kuando esta el sol en medyo del syelo no se puede ver, es por enkuento estando en medyo del syelo no ay dinguna koza ke aga solombra o estajo (2) de la vista de la presona al syelo, lo kual, ke estando en mizrah amostrando el sol enriva de las muntanyas, los bafos ke suven de la muntanya al syelo aflakan un poko la luz del sol i kon esto pueden la djente de maarav ver el ojo del sol, i lo mizmo estando el sol en maarav pueden verlo los de mizrah por dita kavza.
Sigunda. Es si los syelos se krearon mas antes de la tyerra o la buelta, o los dos endjuntos. Disheron a el: Los syelos se krearon al prinsipyo, ke ansi dize el pasuk: Del prinsipyo kreo el Dio a los syelos i a la tyerra. I muestros savyos Bet Shamai i Bet Hilel kontradisheron en esto, ke Bet Shamai dizen ke los syelos se krearon al prinsipyo i despues la tyerra. I Bet Hilel dizen la buelta. I ay ken dize ke se krearon endjuntos.
Tresera. Es si la luz se kreo antes de la eskuridad o la buelta. Le respondyeron diziendo: Esta koza no tyene soltura, ke aun ke ya saven ke la eskuridad akonanto a la luz, ma no kijeron darle repuesta, ke syendo vyeron ke se determino a demandar akorruto, disheron entre eyos, si tal le respondemos todo lo ke mos demanda, kerera peskuzar a saver ke ay mas arriva de los syelos i mas abasho de la tyerra i komo era este mundo antes ke fue kreado i ke deve ser de el despues, i syendo no es posivle dezirle dinguna koza de las ditas, por esto lo derecho es de dizir ke no savemos.
Kuatrena. Es kual ombre se puede yamar savio? Disheron: El ken pensa lo venidero, ke pensa byen kon su daat, ke si ara tal pekado aun ke a las oras resive muncho gusto, ma savyendo el dezastre ke le tyene de venir se alesha de azerlo. I lo mismo es en afirmando todos los komandos de la ley, ke aun ke a las vezes le parese ke tyene danyo de estar meldando una orika porke se pierde de su trato, ma savyendo ke su paga ke le da el Shem Yitbarah es demazyado, tendra kargo de meldar algun poko antes de ir a la butika.
Sinkena. Es kual es ke se puede yamar barragan? Le disheron: El ke abate a su apetite malo ke esta en sus fuersas, a lo mijor de su manseves, i el yetzer ara le va kombatyendo muncho i el es bastante a venserlo i no enkampar en su mano. Syendo ansi se puede alavar en su barraganiya aun ke es flako de fuersa.
Seshena. Es kual es el riko ke se puede alavar kon su rikeza? Le disheron esto: No esta dekolgado en tener muncho dinero, solamente en ser patron de buen korason, korason ke se alegra kon su parte ke Ie enprezento el Shem Yitbarah i no dezea mas de lo ke tyene, ke syendo ansi, bive kontente toda su vida i puede servir al Shem Yitbarah de buen modo. Lo kual ke los ke no se artan kon lo ke tyenen se van konsumyendo diya por diya i se les arranka la alma dizyendo ke es ke fulano tiene mas ke mi, i el selo lo kita al ombre del mundo. I si tambyen ke nunka dize su orasyon segun su ovligo syendo todo su tino lo tyene enbarasado en aventajar dinero i no ay artamyento para el. I ansi disheron los senyores hahamim: No ay ombre en este mundo ke muera kon la metad de su dezeo, syendo ken alkanso a tener syen groshes bushka a tener dozyentos, i lo mizmo kada uno bushka dos tantos mas de lo ke tyene i no lo alkansa. I syendo ansi, aun ke sea patron de muncho dinero, no se puede yamar riko, ke syerto no ay mas prove ke el.
Sietena. Es de ke modo deve de ser el rijo de la presona para ke biva sano? Le disheron: Se mate a si mizmo. Kere dezir ke syempre se ambeze a alesharse de los visyos de este mundo, ke todo es un uzo i el ke se embeza en lo poko syempre bive sano i rezyo, ke si va por kamino i no tyene modo de azer buenas komidas i dormir en kolchon, no Ie emporta de nada. I el ke no kere byen a su alma i va korryendo detras de visyos de este mundo, a komer i bever byen, syerto ke se kere la muerte, ke kuando Ie vyene a mankar algun apetite se va rovar para kumpIir su dezeo i su fin es matado. I mos ambezan los hahamim ke el ombre ke kere bivir sano, se abashe a si mizmo, i kon esto Ie tyenen piadad todo el mundo i bivira munchos anyos, lo kual ke el ke tyene gaava i senyorio demazyado, se selan la djente de el i Ie echan ojo malo i se muere antes de su tyempo.
Ochena. Es ke modo se rejira el ombre a ser amado entre la djente? Le disheron: Aborreska de kaminar entre el reynado, ke syendo konosido de djente grande todos se selan de el i lo aborresen. I ansi akavidaron los hahamim dizyendo: No te des a konoser al reynado. Disho Aleksandros: Yo vos dire mijor rijo, i es ke se aga amigo kon el reynado i ke tenga lev tov de azer byen kon todo el mundo i azyendo ansi todos lo kereran byen.
Muevena. Es por ke parte sera mijor kaminar? Por tyerra o por mar? Le disheron: Por tyerra es mijor, syendo vemos ke todos los ke van por mar no repoza su daat asta ke salen en tyerra.
Diezena. Es ken de vozotros es mas haham. Disheron a el: Todos somos iguales, ke ya vites ke todos te respondimos a un modo sin aver dinguna diferensya de uno a otro. Disho el, ke es la razon ke kontradizesh kon mi en ver ke no kreesh en muestra ley, syendo mozotros somos mas munchos i estimados i los tenemos debasho a vozotros? Le disheron: El satan es ke vos aze modo a vozotros ke mos vengash i mos tengash debasho para trazyerrarvos (3) ke entendash ke muestra ley es la vedradera. Disho el: Mira ke vos mato a todos i syendo ke todos los reyes son mis amigos, are modo ke no deshen bivo uno de vozotros en dinguna parte. Le disheron: Syerto ke el poder esta en tu mano de azer lo ke tu enveluntas, ma no konvyene a un rey komo ti de azer falsiya, syendo ke antes ke empesar a avlar kon ti mos aprometites de no apenarmos por muestra avIa syendo byen dicha. Entonses los vistyo a todos buenas vestimyentas i puso koyar de oro en sus gargantas.
—————————————————
- El biervo «taam» es palavra ebrea ke sinyifika savor, gusto, i afilu tono muzikal (por egzempio, en la lektura de la Tora). Ma en relasyon al teksto el «taam» sinyifika argumento, razon o sentido. Yehuda Hatsvi, Ladinokomunita, mesaje 45237 de 12 fevrero 2013.
- Separasion, espasyo o distansya. Yehuda Hatsvi, Ladinokomunita, mesaje 45237 de 12 fevrero 2013.
- El verbo «trazyerrar» sinyifika estar yerrado i konfundido totalmente, komo errar en un boske o vagabondear en el desierto sin saver el kamino derecho. Yehuda Hatsvi, Ladinokomunita, mesaje 46499 de 18 avril 2013.
Trezladado i editado de la versyon de Izmir 1864, en letra rashi de Fredy Cauich Valerio de Sivdad de Mexico
