eSefarad Noticias del Mundo Sefaradi
Ver más kuentikos de la Tia de Sulucha >>
Tia, ¿te huites a ver a los muestros en los simiteryos de Estambol?
-Siguro, vide a toda la mishpahá. Antes, kuando iva a Estambol, aziya munchas vijitas en las kazas. Todos me aresiviyan ensima de la kavesa, kon boyos, borrekas, tavlá de dulse kon kucharika de plata, i kaviko turko.
¿Agora komo son las vijitas?
-Hanuma, no es kolay tener 90 anyos. Agora kaji todos los de mi jenerasyon estan en Ganeden. Las vijitas se azen en el betahayim.
¿Komo se topan los betahayimes?
-Muy kolay, ijika. En Estambol estan fraguando kazas de betón [1] por todas partes. La sola vedrura ke kedo esta en los sementeryos. Kuando vites un arvolé, ya saves ke estas en el sementeryo. Demos lores al Sinyor del Mundo, ke si no avian sementeryos en Estambol, no iva kedar ni un solo arvolé en pies.
Mizmo los papupadres ke estan debasho de tierra son marafetlis: estan ayudando a konservar la natura.
– – – – – – – – – – – – – – – – – –
[1] concreto
– – – – – – – – – – – – – – – – – –
Renée Martin
Payis de Gales (Gran Bretanya)
La Lettre Sepharade 44 – Des. 2002
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
