eSefarad Noticias del Mundo Sefaradi
Kuentikos de la Tia de Sulucha*
– Sulucha, la komida ke izites tiene un golor muy bueno. Kualo es? Es karne de vaka?
– No, tia, aki no mos atrivimos a komer karne de vaka. Algunas vakas inglezas se izieron lokas, i la hazinura puede pasar a las personas.
-I kualo vamos a komer?
-Karne de domuz
-Domuz?(1) El dyo ke mos pedrone los pekados.
-Tia, no te merekiyez, yo ya avli kon los mijores de mozotros. Me disheron ke en kavzos asemejantes, ya se puede komer trefa.
(1) domuz = puerko
Renée Martin
Payis de Gales (Gran Bretanya)
La Lettre Sepharade 34 – Junio 2000
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
