eSefarad Noticias del Mundo Sefaradi
Ver más kuentikos de la Tia de Sulucha >>
Tia, parese ke pishates i vinites de Estambol . ¿De ke aboltates tan presto?
-Hanuma, en una semana ke estuve ayi, izo luvya, inyeve i zelzelé [1].
Estambol estava muncho mas yelada de Inglatyerra. Abolti para ver kara de sol, i luz de bivos.
¿Ke haber [2] de tio Salomon?.
-Un mes antes, el tio viajo a Espanya por primera vez en su vida.
¿I komo se entendio kon los espanyoles?
-En espanyol, ama kuando avryo la boka, no le demandaron de ke payiz viene, sino ke le demandaron de ke sieklo viene.
¿I ke les disho el tio?
-Ya te imajinas, hanuma, el tio se aravyo muncho. El kreye ke daynda es manseviko, i los espanyoles lo izyeron un nikochiri [3] de 500 anyos.
[1] Terretemblo
[2] Novedades, notisias
[3] viejo, aedado
– – – – – – – – – – – – – – – – – –
Renée Martin
Payis de Gales (Gran Bretanya)
La Lettre Sepharade 44 – Des. 2002
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
Muy bueno i alegres tus relatos