LA SAVOR DE PENSAR A LO KE BIVI… por Sal Amira: SALAMONIKO AMIRA EN CHANAKKALE, TURKIYA

Agora, esto pompeyando agua del pozo muevo ke  los soldados Turkoz avriyeron la semana pasada. Es el Yuzbashi/Lieutenant HUSEYIN SHEN, el amigo  de mi padre, ke aviya dado los ordres…

Ke maraviya de agua yelada komo un BUZ/YELO/Ice ke korre de esta makina ke yamamos pompa ! Ama no entyendo porke mi madrezika, chikitika en estatura,  la buye la agua para servir i kuzinar…Un diya le vo a preguntar el porke…

AAAAAA tambiyen tenemos un pozo de yegar a la agua kon kuedra, igual de loz pozos ke meldo en la Tora, komo en la epoka de AVRAM AVINO.. Mi mama guadra aya los karpuses i komidas para ke dure mas tiempo. TAMBIEN un diya le vo preguntar porke aze estoooo !

Mi kaza es de doskates/etages. En el primer piso esta la kozina. A lo ke oyi,  esta echa al istilo grego. Abasho komo un orno i ensima burakos redondos para meter kalderas (Tendjeres).

Esta FLOR LEVI AMIRA ke maraviyas de komidas ke aze ! A MI LO MAS DE SUS KOMIDAS KEME GUSTA ES EL BIBER DOLMASI/ pimIentos reynados i tomatan reynadas iiii koy pilavi / aroz kampesino… En dulse HOSHAV DE BINBRIYO.. (Komposto).

Kuando le entregi a mi mama la agua le pregunti porke estava kozinando tanto. Mi ermaniko YAKO de 6 anyos de edad me disho ke estavan vinyendo toda la famiya esta noche.

Tengo el presentimiyento ke koza grande estava pasando en la famiya de REUNIRMOS todos.

Asperando aver.

 

 

Sal Amira
CANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro