eSefarad Noticias del Mundo Sefaradi
BARUH MITRANI «BANIM» (1847-1919)
un prekursor de la askala, del sionizmo i del renasimiento del ebreo
————————————————————————————-
En repuesta a las pretensiones, en el empesijo del siglo XX, ke no egzistian eskritores i personas aklaradas entre los djudios de Turkia, estas linyas sovre el Rabino Baruh ben Nesim Mitrani aparesieron en el semanal Hamevaser (El Anunsiador) (1) de Estambol:
«…el luchador nasional entuziasto, kuaji olvidado en el korason de muestros ermanos … ke ovro i peno en diversas sivdades i anyos enteros para publikar jurnales en la lingua sefaradi i en ebreo… ke no fue apoyado i ke fue persekutido en Estambol… i ke los djudios lo ovligaron a kitar la sivdad por kulpa de nasionalizmo … es siguro ke su nombre i su ovra eran bien konosidos i podrian ser rakontados… .«
Ijo del Rabino Yitzhak Mitrani, Baruh Mitrani nasio en 1847 en Kirklareli. Es en Edirne, ande se establesio kon su famiya a la edad de 17 anios, ke Mitrani se iva perfeksionar en los estudios del Talmud i del ebreo. Kon la rekomendasion del Rabino Yosef Danon, miembro del tribunal rabiniko de la mizma sivdad, le fue konferado el titolo de rav a la edad de 13 anyos. Su enkontro kon el ebraizante, linguisto i orientalisto, el Rabino Yosef Halevi (2), ke dirijia la eskola de la komunitad de Edirne i ke se okupo personalmente de su edukasion, djugo probablamente un rolo desizivo en su orientasion espirituala.
En esta perioda, Baruh Mitrani se dediko a kompozar poezias en ebreo, ke fueron arekojidas mas tadre en su ovra entitulada Tiferet Banim (Gloria de los Ijos). En mizmo tiempo, empeso a publikar artikolos en la prensa djudeo-espanyola de Estambol, engajando a los djudios de Turkia a ensenyar la lingua ebrea a sus kreaturas i a darles una edukasion djudia nasionala. Baruh Mitrani fue el instruktor en kapo de ebreo del Talmud Tora aGadol de Edirne. Despues ke esta eskola se kemo, fondo una mueva eskola yamada Mikve Israel (esperansa de Israel), ande la la lingua del ensenyamiento era el ebreo i ande fue ensenyado el fransez tambien.
Esta institusion servio en mizmo tiempo entanto ke sentro kultural, onde miembros de la komunita se arekojiyian para diskutar diferentes sujetos. Es aya ke por la primera vez en Turkia fueron reprezentadas ovras teatralas de Baruh Mitrani komo Adam i Hava, Yosef vendido por sus ermanos, el reyno de Shaul, Aman i Mordehay etc… Mitrani uzava dar konferensias en ebreo sovre el nasionalizmo djudio, el ebreo, la Tierra Santa i la istoria djudia, dirijando en mizmo tiempo, kursos de tadre de ebreo, de su literatura i de su gramatika. Esta institusion djugo un rolo lmportante en la edukasion de la juventud de la sivdad i la mayoria de los ebraizantes de Edirne ke bivieron en Estambol i en las otras sivdades del imperio fueron sus elevos. En esta eskola fueron ensenyados por la primera vez en Edime, diferentes ofisios en konformidad kon kon la deviza de Mitrani:
«Toda ley (relijion) ke no es akompanyada de un ofisio, es kondanada a despareser… Es menester de konsakrar una parte del dia al lavoro i la otra parte a los estudios….»
Sofia, Viena i el Retorno a Edirne
Estos inovamientos i partikularmente la introduksion del fransez en el programo eskolario, no fueron bien vistos por syertos rabinos ke lo sospecharon de liberalismo. Konstatando esto i aspirando a ser mas anchamente provechozo a las komunidades del payis i de los Balkanes, en 1869 desidio de ir a Viena para perfeksionarse en sus estudios. En su kamino, kedo un sierto de tyempoe en Sofia, fue engajado entanto ke institutor de ebreo en las eskolas de la komunitad djudia i entanto ke hazan en una sinagoga. Durante su enkontro kon Rabi Yehuda Alkalay (3) en Baden-Baden, ke turo una noche entera, Mitrani kon Alkalay desidieron de kolaborar en establisiendo una «Sosiedad de Kolonizasion por Eretz Israel«. Baruh Mitrani edito en este buto la revista mensuala Karmi (4), ke fue publikada durante un anyo, en parte en ebreo i en parte en djudyo. Esta revista fue el fruto de grandes esforsos i del investimiento de los modestos revenidos de su lavoro komo institutor. Pokos de los ke la resivian fueron prontos a enkorojarlo i a mandar el montante del abonamiento.
El livro de Mitrani, Hinuhei Banim (Edukasion de los Ijos), fue tambien imprimido en Viena. Esta ovra sovre el ensenyamiento del ebreo, fue durante munchos anyos un livro klasiko en su kampo. En esta sivdad, Baruh Mitrani publiko una seria de estudios i de kuentos, entre eyos: Don Izak Abarbanel, Eliezer i Naftali, Tzadok aKohen. Su livro intitulado Don Yosef i su Ija fue editado munchas vezes i fue vendido en miles de egzemplarios . En segito a la muerte de su padre, deshando una bivda i dos guerfanos chikos, Baruh Mitrani fue ovligado de retornar a Edirne para okuparse de eyos.
En Edirne, kon el ayudo de sus amigos i de sus elevos, Mitrani reusho a arebivir de muevo su eskola ke yamo Akedat Itzhak (el Sakrifisio de Itzhak), en memoria de su defondo padre. Mitrani fue su direktor i ensenyava el Talmud i el ebreo. Kon la kolaborasion de su amigo, el famozo savio Avram Danon, se fondo en Edirne la asosiasion Dorshei Askala (Solisitadores de Instruksion), ke ovro para la emansipasion de la komunitad djudia de la sivdad.
Renovelo la edision de la revista Karmi, ande eskrivio:
«…basta mi puevlo de abandonar… las valores de muestra nasion: puevlo, patria, ley, lingua ebrea i literatura de Israel… segiremos los kaminos de muestros avuelos… andeamos a Eretz Israel para servir a la patria de muestros avuelos, i muestro Dio sera kon mozotros… porke es solo ayi ke puederemos ser una bendision para mozotros mizmos i para los otros…!»
Viena, Edirne, Estambol i Yerushalayim
En 1876, fue de muevo a Viena por un kurto periodo para imprimir su livro Hinuhei Banim, mensionado maz ariva; ansi ke Shimeu Banim, un rekolio de novedades literarias, biografias de personajes nombrados, lisiones de siensia etc.. En 1899, en kamino a la Tierra Santa, a la rogativa de sus amigos i sus apoyadores, Baruh Mitrani se kedo por un sierto tiempo en Estambol, para dirijir la eskola komunala muevamente fraguada en Haydar Pasha.
Mitrani topo en Estambol un vaste kampo de aksion, ekspresandose sovre la dekadensia espirituala del djudaizmo sefaradi, sovre el menester del retorno a Eretz Israel, i sovre la indiferensia de los dirijentes de la komunitad en estos kampos. Esto solevanto una grande deskontentes entre los partidarios de la asimilasion, ke vieron en sus ideas un perikolo para los djudios del imperio. En segito a sus intervension. el Gran Rabinato ordeno ke ningun orator no puedera tomar la palavra en publiko, sin ke el teksto de su deskorso sea prealabamente aprovado. En mizmo tyempo, desbrocho un konflikto entre Mitrani i el profesor de fransez, ke dezeava adelantar el ensenyamiento de esta lengua en la eskola, al kuento del ebreo.
Afektado por estos dezvelopamientos i konvensido ke no poderia mas kontinuar su ovra, Mitrani partio a Yerushalayim, ande aspirava bivir toda su vida. Es ayi ke izo la konosensia del Rav Israel Frumkin, redaktor en kapo del jurnal Havatzelet (5), de Eliezer Ben Yehuda i de otros personajes influentes. En el jurnal Havatzelet, Mitrani tenia su rubrika personala intitulada Prazot Yerushalayim. Kuando Sir Moses Montefiori vijito Yerushalayim, Mitrani se enkontro kon el i le prezento una koleksion enkachada de su revista Karmi. Montefiori ke no supo apresiar la importansia de esta revista, se kontento de embiarle una suma de moneda ke Mitrani uzo para publikar un rekolio sovre las ovras de Montefiori, Mishol aKramim (el Kamino de las Vinyas). Mitrani ensenyo el ebreo a los ijos del Gran Rabino sefaradi Eliashar i okupo en mizmo tiempo el posto de profesor de ebreo en un orfelinato. Malgrado todas estas okupasiones, duvo kontentarse kon un revenido muy modesto. Despues de aver bivido kuatro anyos en Eretz Israel, a su grande regreto, en 1887 torno a Edirne.
Edirne, Vidin, Sofia, Belgrad i el sigundo viaje a Yerushalayim
En Edirne, Mitrani dirijo de muevo la eskola Akedat Itzhak i renovo las aktividades del sentro kultural ke avia fondado. Mas tadre, partio a Vidin ande renovo la publikasion de su revista Karmi. ke aparesio entre los anyos 1890-1891, basho el titolo Karmi Sheli (Mi Vinya) i despues, en Sofia, basho el titolo, haShalom. Pasando por Belgrad. retorno a Edirne.
Mitrani fue ovligado de vender el immoble de su padre, para poder pagar los gastes de printa de sus ovras i sovre todo de su livro de istoria, Ezra i Nehemia. Ma aki tambien fue denonsiado por siertos de sus korelijionarios, achakes de sus aktividades sionistas i la difuzion de su livro fue defendida por los otoridades.
En Yerushalayim, ande arivo por la segunda vez, Mitrani avrio una chika butika de livros i en mizmo tiempo publiko un semanal politiko i Iiterario en ebreo i en ladino intitulado HaOsher (La Felisidad), kon el buto de mantenerse i de obtener los fondos para akumplir sus butos, Mitrani okupo el posto de direktor del Talmud Tora de Yafo, kon la kondision ke el mizmo se kargara de obtener los fondos nesesarios para su mantenimiento. Sus yamadas de ayudo a las komunidades en Evropa i al akea de Estambol en este buto, no teniendo aprovechado, Mitrani no tuvo otro remedio maz ke de deshar de muevo la Palestina. Pasando por Estambol, arivo a Kirklareli en 1897, i de ayi a Edirne.
Durante sus ultimos anyos, ke paso en dando den vezes en vezes konferensias, se mantenio grasias a subvensiones del Konsilio Komunal i de la Fraternidad, la asosiasion de los viejos elevos de la eskola Alliance.
Su ovra
Rabi Baruh ben Itzhak Mitrani fue uno de los prekursores del Sionizmo moderno i de la Askala, ansi ke del ebreo moderno. Presedio a Eliezer Ben Yehuda, en ovrando kon perseverensia por el ensenyamiento i la difuzion de esta lingua i del patrimonio de su puevlo, propajando en mizmo , la idea del retorno a la Tierra de Sion. El Rabino Mitrani era konv ensido ke toda edukasion relijioza deve ser akompanyada por la konosensia del patrimonio sekular.
Para alkansar a sus butos, bivio modestamente, errando i kuaji arastandose de sivdad en sivdad, todo en dedikandose a una intensa aktividad literaria i didaktika. El numero de sus ovras ke se distingen por sus estilo simple i klaro, yega a mas de 50.
Komo todos los pokos ijos del djudaizmo otomano, ke se avian dedikado a estos mizmos ideales, su ovra no fue apoyada por la grande mayoria de su komunitad i algunos de sus miembros perkuraron mizmo a atabafarla.
——————————————————-
- Hamevaser, Iyar, 1910. Semanal sionisto en ebreo, ke paresio en Estambol entre los anyos 1910-1911.
- Yosef Halevi (1827-1917). Fundador de la Alliance en Edirne. Prekursor de la Askala i del renesamiento i del ensenyamiento del ebreo en Edirne. Mas tadre profesor en la Universitad Sorbonne, en tanto ke orientalisto i investigador de la komunitad falasha.
- Yehuda Alkalay (1798-1879). Uno de los protagonistos del Sionizmo en el mundo djudio-sefaradi. Nasio en Sarajevo i bivio en Erets Israel.
- Al nombre de Adolphe Crémieux (1796-1880), lider politiko djudio fransez, defensor de los derechos umanos i uno de los prezidentes de la Alliance.
- Havatzeleth.Uno de los mas importantes periodikos de la prensa djudia. Aparesio en Yerushalayim kada mez en ebreo entre 1863-1864, fina ke fue serrado por la administrasion otomana. Kontinuo a ser publikado en ebreo entre 1872-1911, kon la kolaborasion de Eliezer Ben-Yehuda. En 1877, fue publikado en Yiddish.
Bibliografia:
Elmaleh Abraham. Rabi Baroukh Mitrani (Banim) – Savio, Escritor, Poeta i Precursor de la Hascala Hebrea en Turkia, «El Tiempo», Tel-Aviv, Septiembre 20, 27, Oktobre 4,11,17,1962. (Probablamente una version mas kurta de la biografia de Mitrani, por Elmaleh, fue publikada en ebreo en el semanal Hamevaser, Estambol, Nisan, 1911).
Gaon M. D. Ish Aya beEretz Turkia (Egzistia un Personaje en la Turkia), «HaOlam», 36, 37, 38, 39. Londra, Septiembre, 15, 22, 29, Oktobre. 6, 1931.
Haramati Shlomo. Shlosha sheKadmu leBen Yehuda (Tres ke presedaron a Ben Yehuda) Ed. Instituto Ben Zvi. Yerushalavim, 1970.
Markus Shimon. Le Toldot aYe’hudim beAdrianapoli (Sovre la istoria de los djudios de Edirne), «Sinai». XIV. 11-12, Yerushalayim, Agosto-Septembre, 1951.
Gad Nassi – AKI YERUSHALAYIM, XXI, 63, Mayo, 2000
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
