eSefarad Noticias del Mundo Sefaradi
Las Puertas de la Sivdad Vieja de Yerushalayim
Los otomanos, despues de aver vinsido a los mamelukes, entraron a Yerushalayim, en 1516. El dia de sus entrada se fikso el 28 de desiembre 1516. Kon el triomfo de los otomanos, la Palestina avia kayido basho la dominasion de un imperio, ke iva dominar durante los kuatro siglos proksimos todo el Serkano Oriente.
Es durante el reyno de Suleyman el Magnifiko (1520-1566) – ijo del Sultan Yavuz Selim ke avia konkestado a Eretz Israel – ke Yerushalayim prospero. Sulleyman dyo a la sivdad sus magnifikas murayas aktualas.
Durante la perioda del Reynado Kruzado de Yerushalayim, egzistian kuatro puertas en la Sivdad Vieja – una en kada lado. I del tiempo del sultan ayyubi, al-Mu’azzam Isa, ke las avia destruido en 1219, Yerushalayim no tuvo por mas de 300 anios, pratikamente dinguna pared.
La konstruksion de las murayas ansi ke la restorasion de sus puertas turaron sinko anios – de 1536 a 1540. El akedukto fue reaktivado kon la reparasion de un kanal ke traye agua a Yerushalayim de las paylas i resortes. Sesh fuentes fueron konstruidas durante el reyno de Suleyman. Todas de estas tienen inskripsyones rejistrando sus anyo de konstruksyon: 1536.
Kuala fue la razon de Suleyman de fraguar las paredes de Yerushalayim, despues ke estas paredes fueron deshadas en ruinas durante la epoka de los mamelukes? Es ke fue un akto demonstrativo para eksprimir su importansa para sus muevos konkestadores? Es ke kijo asigurar la seguridad de sus sivdadinos kontra las amenazas de los nomados o maroeadores de sakear su puevlo? O, es ke fueron erijidas para konfrontar une mueva kruzada de los payizes katolikos de la Evropa insitada por el Papa? Aun ke no egzisten repuestas desizivas a estas preguntas, puedemos konkluir ke, kon la fragua de estas paredes Yerushlayim alkanso a una realizasion importante ke desidyo de la partikularidad de su imajen.
Las paredes se ekstienden por aproksimativamente 4,5 kilometros (2,8 millas), i a una altura de 5 a 15 metros, kon un espesor de 3 metros. Tyenen trenta i kuatro torres, i syete puertas aviertas i una puerte serrada, ke son: Puerta de Damasko, Puerta de Herodus, Puerta de Leones, Puerta de Oro (konosida i komo Puerta de la Mizerikordia esta puerta es serrada), Puerta del Syerkol kon Puerta de Kuereros, Puerta de Sion, Puerta de Yafo i Puerta Mueva.
Asta 1887, kada puerta se serrava antes de la tadrada i se avria al amaneser. Estas puertas fueron konosidas kon una variedad de nombres, uzados en diferentes periodas istorikas i por diferentes grupos del puevlo.
La Puerta de Yafo
La Puerta de Yafo – Sha’ar Yafo. Konosida en mizmo tyempo komo Bab al-Halil en arabo – Puerta de Hebron – es i yamada Porta Davidi – Puerta de la tomba de David. Fraguada entre 1530–40, se topa en la meatad del perimetro oeste de la sivdad. Basho del arko de la entrada, se topa una inskripsion kon el nombre del Sultan Suleyman.
Esta puerta era la destinasion de los peregrinos kristianos ke abashavan al porto de Yafo, i de ayi su nombre. En el tyempo, un peregrino ke venia de Yafo, kaminava a lo largo de la Ruta de Yafo durante tres dias o maz, para arivar finalmente a la Puerta de Yafo. La Ruta de Yafo fue el prekursor de la otostrada moderna verso el Porto de Yafo i la yanura kostala de la Mediteranea.
En arabo, esta puerta se yama Puerta de Halil – Halil seando el nombre de la sivdad de Hebron. En saliendo de esta Puerta verso el syedro, se krosa la Valeya de Hinnom i en kaminando en linea direkta de la otostrada konosida komo Ruta de los Patriarkos, se ariva a Hebron – ‘Halil’, ke signifika «amigo» en arabo. Avraham ke es entitulado en arabo, «amigo del Dio», esta enterrado en Hebron – Halil. En el pasado, esta Puerta era i konosida komo Puerta de BetLehem.
Esta puerta se avre direktamente a los kuartieres djudios i kristianos, ansi ke a la parte la mas populara del merkado, i al Muzeo de la Torre de David, torre ke fue de antes la sitadela de Yerushalayim i es oy un muzeo sovre su pasado.
Se topa djusto enriva de la Valeya Hinnom – la Valeya del Inferno – ande kreaturas fueron kemados en sakrifisio al dio pagano Marduk.
La Puerta de Yafo es kon la Puerta de Damasko una de las mas aktivas puertas de la sivdad. Estas doz puertas fueron las prinsipalas entradas a la sivdad.
Asta la fin del siglo XIX, la Puerta de Yafo, komo las otras puertas, se serrava kada noche para protejar la sivdad de los maroeaderos, iyenas, shakales i dragones. Los dragones eran el produkto de las superstisiones, ma los otros eran verdaderos. Viajadores ke yagavan en la tadrada, devian de tener lanternas para ke pueden ser idantifiados i admitidos. Los ke tadravan muncho devian de pasar la noche ahuera de la sivdad i asperar fin’a el amaneser kuando la puerta se avriria.
En 1898 Kaiser Wilhelm II izo un peregrinaje espektakular a la sivdad santa akompanyado de un eskorto enorme de unos mil personas. En la onor de esta vijita, los otomanos izieron una aviertura en la pared de la Puerta de Yafo para ke el emperor prusiano puede entarar kon su karosa a Yerushalayim.
Es por la Puerta de Yafo, ke en 1917, el Jeneral Allenby iva entrar a Yerushalayim, despues de aver derotado la Armada Otomana.
La Puerta Mueva
La Puerta Mueva – HaSha’ar HaHadash en ebreo. Al-Bab al-Djedid en arabo. Es la unika puerta ke no aze parte del dezinyo orijinal de las paredes del siglo XVI. Se topa en el perimetro norte-oeste de la sivdad. Fue avierta en 1887 por el Sutan Abdulhamit II, para fasilitar el akseso de los kristianos a los lugares sakros del Kristianizmo – partikularmente a la Eglisia del Santo Sepulkro. I de ayi fue konosido i komo ‘Puerta de Hamid’ o ‘Puerta del Sultan’.
La Puerta Mueva, situada a 790 metros sovre el nivel de la mar, es la puerta en la mas alta parte de la Sivdad Vieja. La aparensia de esta puerta revela imediatamente su diferensia de las otras puertas. Le mankan los elementos estilizados, i se entra de ayi direktamente a la sivdad vieja, en kontrasto kon la entrada endirekta a traverso las otras puertas mayores, destinadas a blokar el atako del enemigo. En la dekada 1890, la Eglisia Ortodoksa Grega se enkargo de la fragua ekstensiva de batimientos kon butikas i apartamientos rezidansiales a lo largo de la kaleja ke yeva a esta puerta. De este modo, esta kaleja se konvertio en una ruta animada de trafiko ariento i ahuera de la Sivdad Vieja.
La Puerta Mueva estuvo serrada entre 1948 i 1967, i la linya del sese el fuego ke diviziya la sivdad en doz, pasava allado de esta puerta. Se avrio despues de la Gerra de Sesh Dias, i el trafiko en los kaminos ke la arodean abolto de muevo.
La Puerta de Damasko
La Puerta de Damasko – Sha’ar Damesek o, Sha’ar Sh.hem (Nablus). Es la maz impozante puerta de Yerushalayim. Mira al Norte i es yamada al nombre de Damasko, la sivdad, de lakuala sus governores fueron nominados por los otomanos. Es i yamada al nombre de la sivdad de Sh.hem o Nablus, ke se topa a 49 kilometros en el Norte de Yerushalayim. De basho de esta puerta fraguada en el siglo XVI, fue deskuvierta una entrada fraguada por el Emperor romano Adrianus en el siglo II.
Delantre de la Puerta avia una kolona, konstruida para memorizar la viktoria romana, i por esto es i konosida komo Puerta de la Kolona o, Bab alAmud en arabo. Esta puerta era uzada en el tiempo de los Kruzados. La kolona no fue topada, ma la puerta romana se puede ver oy en diya, grasias a las ekskavasiones echas durante el mandato britaniko.
Los romanos konstruyeron kaminos en todo sus imperio i los markaron kon piedras miliaras para fiksar las distansias.
En el punto zero de Yuda egzistia una kolona impozante plasada en la plasa sentrala ariento de la Puerta de Damasko. Empesando de esta kolona se mezurava la distansia a Yerushalayim.
La Puerta de Damasko fue konstruida en riva de los restos de la entrada de la sivdad romana.
entrada de Adrianus, vista
de la pasarela ke yeva a la Puerta
de Damasko
Konosida komo Aelia Capitolina, esta parte de Yerushalayim fue rezervada a la kolonia romana. Solo los arkos del Este de esta entrada sovrebivieron i se pueden ver debasho de la parte syedra de la pasarela moderna ke yeva a la Puerta de Damasko.
Enriva de la Puerta egziste una inskripsion fragmentera en latino, ke se termina: «… por dekreto de los governadores de Aelia Capitolina«. La kolona, probablamente koronada por el estatuo de Adrianus, se topava en el sentro de la plasa. Es muy posible ke esta estatua fue removada por los kristianos.
La Puerta de Damasko es fasilamente rekonosible – no solo porke es la maz monumentala, ma porke los diyas de viernes i de shabat, miles de djente arivan de esta puerta para komprar espesias kon fruta i vedruras freskas.
La Puerta de las Flores
La Puerta de las Flores – Sha’ar HaPrahim, Bab-a-Sahairad, Sha’ar Hordos, Puerta de los Kodreros. Situada en el norte-este del perimetro de la Sivdad Vieja, esta puerta es konosida komo la Puerta de la Flor o de las Flores – Sha’ar Haprahim en ebreo. Es probablamente achakes de los dizenyos florales gravados en su facha, ke este nombre le fue dado. La data egzakta de su konstruksyon no es konosida.
La Puerta fue orijinamente konosida komo Bab-a-Sahairad, referandose al semeterio muslumano, ke se topa en una kolina enfrente de esta puerta. A-sahairad signifika en arabo: ‘akeos ke no durmen la noche‘ en aluzion a la futura resureksyon de los ke son enterrados ayi. Portanto, kon la substitusion en el tiempo de una letra, su nombre se troko en Bab el Zahirah, lo ke signifika en arabo ‘Puerta de la Flor’.
Tiene otro nombre en ebreo, Sha’ar Hordus ke signifika Puerta de Herodes. Aun ke este nombre, el famozo Rey de Yuda no tiene nada de dar i aver kon esta Puerta. Asigun las fuentes katolikas, la kaza de Herodes Antipas estava serka de la Puerta. Portanto, esta parte de la sivdad no fue serrada por una pared durante el reyno de Herodes.
Se yama i Puerta del Kodrero, achakes del merkado semanal de kodreros, ke tenia lugar en la plasa ahuera de la entrada de la Puerta.
Se save ke kuando Suleyman avia fraguado la pared de Yerushalayim, avia una chika media puerta enfrente de esta puerta. Esta chika puerta se avria i se uzava raramente. Fue serrada en 1875, kuando los otomanos farguaron una muncho mas grande aviertura en la parte Norte, para akomodar la vizindad Norte de la sivdad, ke se estava developando.
La Puerta de los Leones
La Puerta de los Leones – Sha’ar HaArayot, Puerta de los Trivos, Bab al-Asbatt, Bab Sittna Maryam, Puerta de Yehoshafat, Puerta de San Stefan. Konstruida en los anyos 1538-1539, esta puerta se topa en el bodre norte de parte orientala de la sivdad. Es la sola puerte avierta de esta pared, ansi ke una de las puertas orijinales del siglo XVI de la Sivdad Vieja.
Empesando de la meatad del siglo XIX, achakes de doz pares de leones uno en kada lado, los djudios la yamaron Puerta de los Leones. Aunke konsideradas komo leones, estas figuras son en realitad de leopardos, simbolos del Sultan Mamluk Baybars, ke avia konkerado a Eretz Israel en 1260. Probablamente fueron transpozadas de un otro monumento konstruido por los mamlukes.
Era konosida por munchos nombres en el pasado. Uno de estos era Puerta de los Trivos, Bab el Asbat en arabo. Porke se kreyiya ke los Trivos de Israel avian entrado por esta puerta a la Sivdad Vieja.
Se avre sovre la Valeya de Yoshafat. Por esto era konosida i komo La Puerta de Yoshafat. Lo yamaron i la Puerta de la Virjen Maria, Mala Sitt Maryam en arabo. Egziste non leshos de esta puerta, una grande rezerva de agua al nombre de la Virjen. Todos los kaminos del Monte de los Olivos, de Betania i de Yeriho se enkontran aki. Su entrada marka el empesijo de la selebrasion kristiana tradisional del ultimo kamino del Kristo, de la prizion asta su egzekusion, la Via Dolorosa.
D
e mizmo, se yama i la Puerta de San Stefan, asigun la tradision ke rakonta ke Stefan, el primer martirio kristiano fue lapidado en la Valeya de Kidron serka de esta puerta.
Konsernando el par de leones ke se topa en kada lado del arko de la puerta, la leyenda rakonta ke en el siglo XVI, Suleyman el Magnifiko ordeno ke estos ikones sean plasados en rekuerdo de un shuenyo ke fue la fuente de la restorasion de las paredes.
Una noche, el sultan avia sonyado ke kuatro leones salvajos ke avian saltado sovre el del Rio de Yarden, lo estavan devorando. Tremblando i epuvantado, se avia espertado kon grande emosion. Al amaneser, yamo a todos los savios de su reynado para ke aklaresen la signifikasion de este shuenyo. Dinguno de estos no avia topado una eksplikasion satisfeziente kuando un sheyh viejo de grande saverisyo le demando: «Dizeme Suleyman a kualo estuvites pensando antes de durmirte?»
Suleyman penso por un momento i respondio: «Estuve pensando komo puederia de la mejor manera kastigar el puevlo de Yerushalayim. Eyos no estan pagando sus dasyos«.
«Oooh!» disho el savio. «No saves ke muestros profetos David i Shelomo governaron de esta Sivdad Santa, mientras ke los leones guadraron su trono? Si usted trata a esta sivdad kon buendad i mizerikordia, el sera bendizido al igual de David i Shelomo«.
Aparte de la Puerta de los Leones, la pared oriental tiene uba otra puerta ke es tapada: : la Puerta de Oro. Aparte de la Puerta de los Leones i de la Puerta de Oro, avian puertas posteriores. La una en la ekstremidad del Monte del Templo i una otra en el Palasio Real en el Oksidente. En el Norte se topava la Puerta Posteriora de San Lazaro, el nombre del Bario de los leprozos.
Es a traverso de la Puerta de los Leones, ke los parashutistos israelis entraron a la Sivdad Vieja en 1967, durante la Gerra de Sesh Dias. I la fuerza de la Brigada de Yerushalayim entro por la Puerta del Syerkol, kontinuando verso el Monte del Templo.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
