eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El Promeso de Hanna
Hanna es la madre del Profeto Samuel. Su estorya atada a la nesensya de Samuel es una de las mas partikularas de la Biblia.
Mismo ke era la mujer preferada de su marido, Hanna era triste, porke munchos anyos avian pasado i era sin kreatura. Avia mismo enkuarajado a su marido ElKana de kazarse kon Pnina. Portanto, Pnina, despues de aver parido su primera kreatura, avia empesado a burlarse de eya, en remarkandola ke no teniya kreatura.
Hanna uzava kada anyo de vijittar el Templo en Shilo, kon su marido ElKana i su segunda mujer Pnina, para ofreser sakrifisios.
En una de estas vijitas ansi se avia adresado al Dio:
«O Senyor, de todas las madres ke kreates, es tan difisil por ti de darme un ijo? Si apartengo a los Syelos, no kale ke me muera; si so mortala, kale ke trayga una kreatura».
Una vez, Hanna estava arogando kon tan emosion en prometyendo ke en kavzo ke pariera un ijo, eya lo dedikera al servisio del Dio en el Templo, ke el pretro grande Eli, le avia demandado si no se avia enborrachado.
Hanna avia afirmado:
«Yo so una mujer trista. No bevi ni vino i no otro beveraje fuerte. Es delantre del Dio ke esto vaziando mi korason».
Kuando Eli avia observado ke karar de triste Hanna era, se adjunto i el a eya, para ke el Dio responde a su suplikasion.
A la fin, los arogativos de Hanna fueron akseptados, i Hanna paryo a Samuel, ke sera kontado entre los mas grandes profetos de Israel.
Hanna engrandesio a Samuel fin’a ke devino un ijiko bastante grande. Despues, asigun su promeso, tomo a Samuel al Templo en Shilo, i lo entrego a Eli para ke syerve ayi al Dio.
Hanna kontinuo a vijitar kada anyo el Templo, asigun lo uzava de azer, i de este modo Samuel pudo ver a su madre.
Eli konstatando la devosion de Hanna, arogo al Dio, i ansi, Hanna paryo otros tres ijos i dos ijas.
* * *
La nesensya del Profeto Samuel es konsiderada en tanto ke la piadad del Dio en repuesta a la orasion de una mujer sin kreatura.
La dedikasion de una kreatura por su madre al servisio del Dio, era de uzo en akeos tiempos en la Tierra de Israel. Konosida en tanto ke nazirit, una persona dedikada al servisio del Dio devia de konformarse a syertas obligasiones komo la abstension de bever vino, de no estar en luto, de no araparse i otras.
Este uzo fue mas despues fue abandonado, en segito a los dezastres ke ivan afektar a Israel.
—————————————–
Gad Nassi
