La Megila de Debora por Eliz Gatenyo

Ayer la noche mos fuimos al Kal Neve Shalom, ke aviya una seremoniya muy spesiala. Se meldo la «Megila de Saragosa»… Esta megila se deve de meldar kada anyo el 17 de Shevat.

Puedeser ke ya savesh la konseja de el milagro ke akontesyo en Saragosa antes 600 anyos, por ke ya se eskrivio en diversas publisitades.

Yo vos kero kontar otras dos kozas diferentes …Primera koza ke vos kero kontar es : La seremoniya en Neve Shalom. Sigunda koza es la istorya i la emportansya  de esta Megila… Komo vino la megila asta estos anyos, i ke bushka aki?

Keridos amigos, este anyo,  La Fundasyon  Neve Shalom  i el Museo de La Fundasyon  de 500 anyos , organizaron una nochada en el kal , para meldar esta Megila de los Saragostis . Esta Megila apartiene a la famiya Samuel. La Famiya Samuel , trusho esta megila kon eya enjuntos kuando fue aronjada  de Espania . Aki se establesyo en Menemen (Un lugar en İzmir) i despues se movio a la sivdad de İzmir.I munchos anyos despues vino a İstanbul.  Anyos i panyos era la tradisyon de esta famiya Samuel , ke kada anyo el 17 de Shevat se arokojiyan todos los miembros de la famiya i meldavan esta megila. Sigun mi idea , esta tradisyon teniya dos butos importantes. Meldar la megila para no olvidarmos de este milagro ke tuvimos i ansina trasmeterlo de djerenasyo a djerenansyo……… i arekojer, aunir la famiya entera, de chikos a grandes, de padres, ijos, inyetos, primos sovrinos  al menos una ves al anyo, ke kon esta vida loka no tenemos un tiempo presizo para ver toda la famiya enjuntos. Tanbien ke se konosgan de aparte aparte.

Este milagro kontiene en si otro un milagro.

El nono de la famiya Samuel , Hayim Samuel despues ke desho la buena vida, su mujer Debora Samuel ke era una mujer muy religiosa, i keriya ke esta tradisyon kontinuara, entrego esta megila a el ijo de uno de sus ijos. Por ke a todos sus otros ijos , les nasyeron ijas. Albert Hayim Samuel es el solo ke aze kontinuar el nombre de la famiya. Debora Samuel , kuando entrego esta megila al inyeto, le disho : Mira ijo ! Esta megila la vasa guadrar komo un tresoro. İ la vasa meldar kada anyo el 17 Shevat. Ke si no se melda, se perye, i si se perye no te lo va perdonar.

Mos konto Albert Samuel ke unos kuantos anyos, no tuvieron la posibilitad de arekojer la famiya i meldar esta megila. I un anyo ke se desidaron de meldarla, no la toparon. Bushkaron la kaza entera, demandaron a los miembros de la famiya, no estava en dingun lugar. Se bolo ? Se akodro Albert de los biervos de su nona Debora. Eya le aviya dicho : Mira ke si no se melda, se piedre… Se sintio una grande dolor en el korason, un regreto muy grande.Tanbien sintio komo una verguensa kontra la famiya ke no fue kapachi para protejar esta Megila tan presioza i trezoro de la famiya. La megila estava eskrito sovre kuerro de siervo. Siguro ke era muy presioza . Ma el presio material no era lo emportante. Se fue al Kal, arogo al Dyo, iso taanit, A la nochada, kuando torno a kaza, su mujer lo resivyo kon una sonriza oroza i le disho ke ya topo la megila.

Akel tiempo se rendyeron kuento lo ke kijeron dizir sus abuelos.

Agora Albert Samuel entrego esta megila para ke se ekspoze , a el Muzeo de la Fundasyon  de 500 anyos, asta ke a uno de sus dos ijos le va naser un ijo, ke kontinuara el nombre de la famiya Samuel.

Esto es la istorya de la famiya. Agora vos kero kontar la seremoniya de la nochada.

El Kal Neve Shalom estava yeno yeno. Desparte de la famiya Samuel , partisiparon el Gran Rabino İzak Haleva, el Konsul de Espania, El konsul de Portugal i otros personajes emportantes. Antes de la seremoniya, isieron tratamientos de spesyalidades de Izmir, (komo boyikos de handrajo)

En primero avlo el Rav Alaluf , mos ekspliko en kurto  la istorya i la emportansya de esta nochada. Despues el Gran Rabino İzak Haleva mos disho ke kale ke kreyamos en los milagros i mos konto dos kavzos ke eran «Purim aryento de Purim» Kijo dizir ke en fiestando un milagro se puede bivir otro un milagro.
I despues se ampeso la seremoniya de la nochada. El Rav Alaluf meldo la megila en primero en la lingua ke estava eskrita en ebreo/arameo , despues la traduiso pedaso por pedaso al turko. Muestra kerida Karen Gerson , mos iso la traduksyon en ladino.

A la fin, Albert Samuel mos avlo de lo ke vos konti ariva.

I despues vinieron los «jubilados jovenes» (Genç Emekliler) i mos dieron un konserto maraviyozo de kantikas ke konosemoz seyan kantikas en ladino seyan en turko..La sala entera estavamos kantando kon eyos kon muncha alegriya . Un konduktor manseviko los iso lavorar a estos «mansevos» .I kito un resultado manyifiko.

A la salida todos teniyamos sonrizas en las karas de pasar una nochada muy agreavle i de renkontrar karas ke no vimos desde muncho tiempo, de ver ke todos estan sanos i rezyos.

Agora vos kero meter aki una nota : Esta sinyora Debora Samuel es la nona de mi kosuegra Dolly Debora Ahitov. Mi inyeta , ke es tanbien i su inyeta , se yama i eya Deborah Debi…Tiene el mizmo nombre de su bisnona.

Mira’ la ermoza tradisyon ke teniyamos , ke de dor en dor  kontinuavan  los nombres de los abuelos.

Karinyozamente

Eliz Gatenyo (Istanbul)

En la primera foto : El Rav Alaluf kon Karen Şarhon
En la sigunda foto : Albert Samuel kon Karen
En la tresera foto : Albert Samuel entregando la megila a la direktrisa de el muzeo , Lisya İşman
En la kuatrena foto : El koro de los «Jubilados Jovenes»