LA MALDICHA KUPA DE VINO KASHER trezladado al ladino por Simon Geron

Keridos amigos i amigas

——————————————————————————-

LA MALDICHA KUPA DE VINO KASHER

El Senior i la Seniora»Samson» fueron bendichos i tuvieron 6 kriaturas. 5 vezes la senyora se sosio kon kada bebe, ke se topava delantre unos Judios Savios ke los miravan en la kara. Kada bebe tenia una barva. Kuando nasió la ultima kriatura ke era ija vido también estava asentada delantre los savios kon su barva. Ma esta vez se metían a mirar en otras direksiones. Unos davan la espalda i otros la miravan.

Despues de unos kuantos días eya pario i le dio el nombre «GEULA/salvasion» a esta kriatura. Los ijos en kontra avían uno por uno resivido nombres de la Tora. Kada uno meldava mejor su porsión del ke vino antes. Estos ijos eran el orgulio de la Famiya de Samson. La chika Geula kijo también meldar komo sus ermanos, ma los parientes la avían metido en una eskola de ijas, diziendo ke las mujeres tenian ke tomar un otro kamino en la vida. Geula kieria de todo su korasón ser una Judia Buena. Azia sus orasiones 3 vezes al día. Los parientes se preokupavan al verla i kuando Geula azia sus bendisiones en la mesa, eyos tornavan la kavesa, mirandosen kon dolor.

Una noche a la fin de Shabat Geula vido lo ke kedava de la kupa de vino de su padre, la levanto i bevio lo ke kedava. Era una ke no kreía en maldision i no penso ke era un pekado de bever el vino de La Kupa de Havdala. Ademas sus ermanos lo azían de vez en kuando. Si eyos lo azían porke eya no puedia azerlo? Ma el próximo día se sentio kulpable i se desidió de arrepentirse. Komo penitensia se desidió de ser una Judia Buena a la manera de sus parientes. Esperando a ser maldicha, abandono sus ideas ke no fue tan fásil. Entretiempo sus ermanos estudiavan kon rabinos grandes i eya se kedava en kasa. Jugava kon las amigas i ayudava a su madre. Se komportava komo las ijas de otras famiyas. Los parientes estavan kontentos.

Aserkando de su Bat Mitzva los vizinos disheron a sus parientes ke el tiempo avía venido para azer estudios de la Tora. Una vez ke Geula avrio el livro se sentio konsumida kon el deseo de aprender. La madre vido ke kresia el pelo en su kara. Vino al punto ke mismo su padre ke la amava tanto, no puedia mirarla. Tomaron a la ija i la mostraron a los doktores i vieron ke no avía explikasion. Se fueron después a ver el Rabino, i el konfirmo sus suspisiones. Esta ija avía bevido de la Kupa de Havdalla i su barva puedia irse solamente si abandonava los estudios de la Tora. La povereta Geula tenia lagrimas en sus ojos. Serro el livro i una koza inekplikable se paso. Geula se vido atirada a la kandela. No avía nada ke se puedia azer.

Los parientes entendieron ke la ultima kriatura, la ija, iva ser eskolaria kon barva. Asi Geulah se fue a la eskola i estudio la Tora i después se izo una mujer. Esta vez la Seniora Samson vido en su suenyo ke Geula tenia una barva. Los ojos de los savios la miravan i de su barva salia una luz. Los parientes se fueron de nuevo a ver el Rabino i el les rekomendo de meterla en una eskola de ijas ke venia de avrirse. La Seniora Samson konsulto el «Google» i topo ke era djusto. Geula termino de ser una de las 5 ijas ke avía bevido de la Kupa de Havdalla. Todas tenian barvas. Kon el tiempo mas i mas ijas se juntaron.

Gaula kontinuo a azer sus estudios mismo después de su kasamiento en la Huppa. Sus kriaturas se engrandesieron. Lo izo asta el día ke no puedia ver mas i la barva se avía echo blanka. Los ke no tenian espanto de mirarla, kon la luz en su barva eya paresía a un djin. Kuanto a los parientes, estavan kontentes, ma sus orgulio se bazava mas sovre las kriaturas de Geula.

Tradusido por Shimon Geron
Sydney

Fuente: Ladinokomunita