eSefarad Noticias del Mundo Sefaradi
En «Segula», una revista relativamente mueva, ke sale a luz en Israel, topi un artikolo interesante sovre la komunidad judia de Janina.
Esta komunidad, ke antes de la Shoa kontava algunas 2000 almas, oy biven (en esta sivdad grega de 100000 sivdadinos) no mas de 50 Judios, ke la mayoria de eyos aedados.
Los Judyos de Janina, apartenesen a un trivo interesante de muestro puevlo, konosidos komo «Romaniotes». Este nombre, Romaniotes, ya mos indika sovre el fato ke son los desendientes de los judios ke bivieron en Gresia desde la destruksion del Bet aMikdash; Gresia ke era una parte del Imperio Romano.
Los Jidios Romaniotes ayinda guadran sus tradisiones espesifikas de tefila, ke son las mas antiguas, i ke por sierto asemejan mucho al nosah (estilo) de orasiones komo se kulaneavan en Erets Yisrael antes de 2000 anyos.
Aki abasho vos do el sitio de «Segula» a meldar este artikolo i otros mas (komo el artikolo sovre Sabetay Sevi, el mashiah falso, etc.).
Este sitio www.segulamag.com tiene i una parte en ingles tambien.
Es kuriozo, ke en lo ke vos esto eskriviendo, me arrivo por mail el mensual digital de la komindad de los judios de Janina ke biven en Nueva York (USA), i aya mantienen sus Kal i otras institusiones.
Entre las alkunias de los romaniotes se nota tambien i nombres sefaradies. Sierto ke durante las jenerasiones, muestros padres sefaradim, ke bivieron en el Imperio Otomano (despues de la
ekspulsion de Espanya), influensaron mucho -en muchos aspektos- a los romaniotes, i fue natural tambien ke uvieron i kazamientos entre eyos.
Aki en anekso meti para vos, amigos, lo ke resivo kada mez, grasias a la Sra. Marcia Haddad-Ikonomopoulos, la direktora del muzeo de Kehila Kedosha Janina en NY.
Yehuda Hatsvi
Erets Yisrael
Para Ladinokomunita
