LA ISTORIA DEL PADRE DE «ANNE FRANK» trezladado al ladino por Simon Geron

En el Daily Telegraph del 2 de marso avia un artikulo sovre el Diario de «Anne Frank». La konosen bien a esta muchacha a traves el mundo, ma la istoria de su padre «Otto Heinrich Frank» no se konose tanto. Este ombre tuvo komo buto de guardar a su ija en vida a traves su diario sin saver ke iva ser tan popular.’Troy Lennon» nos konta la istoria del padre i de toda la famiya.

[El Diario de Anne Frank tuvo un effekto en mi vida kuando lo meldi en los Jurnales Turkos en Istanbul. Me vino la idea de tener mi Diario kon la sola differensia ke iva ser un Diario por la Vida. Desde este tiempo me topo guardando un Diario ke empezo en la Lingua Turka i termino en Ingles. Es un Diario ke kuvre por lo menos los ultimos 60-70 anios de mi vida.] De esto me vino la idea tambien de eskrivir mi «Auto Biografia en linguas differentes.]

Kuando Auschwitz fue liberado en Enero 1945,los prisonieros salieron afuera i uno entre eyos se torno atrás a Amsterdam para unirse kon su famiya.En el kamino oio ke sus 2 ijas i Edith su mujer avían morido en Belgen-Belsen. La istoria de Anne Frank no seria konocida si la sekretaria de antes de Frank ke era amiga buena i ke se yamava»Miep Gies» no avia topado en la kasa el diario de esta ija.Eya le dio el diario a Frank i le disho»Esto es la Legasia de tu ija».Una vez ke este diario fue publikado se izo un»Best Seller».Milliones de djente a través el mundo lo meldaron yegando mismo a la Australia.Despues de esto Frank resivió letras de los lektores i ay letras ke estan oy en el Museo Judio de Sydney.En una seksion del Museo en el kanton se topa»Anne Frank: A History For Today».Puede tener el buto de alertar a la djente kontra el Anti-Semitismo de oy.

Se konose la istoria de la muchacha Anne Frank. Ma ke es la istoria de su padre? Nasido»Otto Heinrich Frank»en Frankfurt en 1889,era el ijo de un bankero.Mismo si venia de una famiya Judia,no era tan relijioso.Frank de su parte tenia el senso de kommunidad kon otras famiyas Judias de manera kultural. Su famiya no era differente ke las otras famiyas Alemanas. Saliendo de la eskola,estudio La istoria Del Arte en la Universidad de Heidelberg.Despues se intereso a la Ekonomia i topo un echo de verano en una banka.Viajo a New York en 1909 para azer un staj en la Tienda de MACY. Se torno atras a Alemania en 1911. En 1914 lo yamaron a la Armada i se harvo en el Fronte Oksidente en la Primera Gerra.Resivio el rango de Teniente.

Despues de la gerra se torno atras para tomar en mano la banka de la famiya.Su ermano ke estava antes en karga no avia reushido tanto.Frank tenia relasiones sosiales kon otras famiyas en la misma situasión. Se enkontrava kon las ijas de los bankeros i de los industriales en la sivdad de Aachen.Fue un soltero por mucho tiempo i se enkontró kon»Edith Hollander».Se kaso kon eya en 1925.En 1926 vino al mundo la primera ija»Margot»i en 1929 vino la segunda ija»Annelis». Era una vida de suenyo al prinsipio.Subito la Ekonomía Alemana se topo frakturada i la banka de la famiya se serro. Ensima de esto entro en poder el Partido Nazisto i avía mucho Anti Semitismo.La famiya se vido obligada a partir de Aachen i irse a Hollanda en 1936. Frank troko de profesión i avrio una fabrika de»pectin/ke se utiliza en las marmelades.» Todo andava bueno por un tiempo asta ke los Alemanes entraron en el país en 1940.

Los Nazistos korrian detrás de los Judios i yamaron a Margot de irse a un Kampo de Lavoro.En Julio 1942 la famiya de Frank se desidio de eskonderse.Tenian un lugar estrecho arriva en el techo i 4 personas tenian ke kompartirlo.En Augusto 1944 uno los denunsio.Margot i Anne fueron embiadas a Auschwitz en primero i después las yevaron a Belgen-Belsen.Solamente Otto Heinrich Frank sovrebivio. Retornando a Amsterdam después de la gerra tuvo diffikultad a meldar el Diario de su ija. Al fin tuvo una sorpresa grande al ver el talento ke tenia Anne Frank. Penso ke la istoria de eya devia ser konosida.Iva pasar el resto de su vida a okuparse de esto.

Frank se kaso kon»Edlfriede/Fritzi Geiringer»en 1953,una vesina ke avia pasado por el Holokosto.Paso sus ultimas dekadas okupandose de la legasia de su ija.Las palavras de Anne Frank fueron una inspirasión a milliones de lektores,en jeneral ijas mansevas.Entre estas ijas se topava»Anne Finlayson» ke le escrivió en 1956.Eya disho «Kisas te sorprende de recivir una letra de una persona ajena.Lo ago para dezirte ke me gusto muncho el Diario de Anne Frank i para mi tiene una valor grande. Finlayson se korrespondido kon Frank asta su muerte en 1980.
Esta semana en Alemania del Este»Hubert Zafke»ke lavorava en Auschwitz»fue juzgado. El se topava ayi kuando los Franks fueron asesinados.Este ombre avía matado a 3000 prisonieros.