eSefarad Noticias del Mundo Sefaradi
Keridos amigos i amigas
«Natasha Maleon» del Jewish News nos konta la istoria de un Tallit Viejo ke viajo de la Polonia a los Estados Unidos i de ayi a la Australia, kedandose en la misma famiya por 5 djenerasiones. Paso mismo kon tiempos tumultuosos en la Segunda Gerra Mundial i sovrebivio.
Saludes a todos
——————————————————————————-
LA ISTORIA DE UN TALLIT VIEJO
Este Tallit Viejo ke paso el Test del Tiempo es el orgullo de su duenyo nuevo «Jacob Whitmont» i se lo metió el día ke izo su Bar Mitzva. Se aseguro ke los ke vinieron a la sinagoga Mizrahi ivan a tener lagrimas en sus ojos. El Tallit en su sako kolorado tenia las inskripsiones «J.W.» i apartenia a su bis, bis, bis abuelo «Jacob Weissberger» nasido en «Bochnia/Polonia» en 1845. Malgrado todos los malores este Tallit se kedo en manos de la Famiya todo este tiempo.
El ijo mayor «Moritz» kon su mujer avían desaparesido en las kamaretas de gas en Auschwitz. Sus vizinos toparon el Tallit kon otros efektos personales i embiaron todo a la ija de la pareja «Helen» para mostrar ke sus parientes fueron arrestados. La vizina estava en un Kampo de Lavoro en el tiempo, antes ke la yeven a Belgen-Belsen kon su marido «Werner» eya avia eskondido todo lo ke apartenia a los Weissbergers antes de ser deportada. Al salir del kampo de Konsentrasión kito fuera todo lo ke kedava de la Famiya Weissberger i se los yevo a Pennsylvania ande eyos avían imigrado.
Este Tallit tanto apresiado fue el primo de Jacob ke lo trusho a la Australia después de aver estudiado en los Estados Unidos. Jacob bivia en «Lane Cove/Sydney» i el Tallit fue dado a la Famiya de»Scott Whitmont».Antes de esto fue dado por»Helen» kuando el primo estava ayi en 1978.Por finir este Tallit se dio komo regalo a Jacob para ke se kede siempre en la famiya.Jacob vido esto komo un tresorio de la famiya.Asi tomo la desizión de meter en un papel la erensia de 5 jenerasiones a ken apartenio este Tallit.Tenia el mismo nombre de su bis,bis,bis abuelo i así pienso ke le apartenia a el.
El moral aki es ke las istorias deven ser kontadas para ke no sean perdidas. El padre de Jacob se emosiono muncho kuando vido a su ijo meterse en este Tallit de un siglo kuando izo su Bar Mitsva. Era por la primera vez en 90 anyos ke se metía el Tallit. Si el bis, bis, bis abuelo Jacob Weissberger lo puedia imajinarse ke su Tallit seria metido después de 5 jenerasiones al otro lado del mundo, ke pensaría?. Por seguro seria muy kontente.
Tradusido por Shimon Geron
Sydney
Fuente: Ladinokomunita
