eSefarad Noticias del Mundo Sefaradi
El 28 de Agosto 2013 tuvo lugar en el Bet Avot «León Recanati» en Pétah Tikvá la seremonía de inaugurasión del muevo Kal, en una atmosfera de grande fiesta. El Gran Rabino de Turkía, Rav Itzhak Haleva mos onoró kon su prezensia, viniendo ekspresamente a Israel, para prezensiar a este grande evenimiento. La seremonía tuvo tres partes distintas, ke se fundieron naturalmente en una: la salida del Kal viejo, kon los Sifré Torá, el kortejo de los Sefarim adientro i afuera del Bet Avot, a su entrada, i en las kayes de Kiriat Matalón, i enfín la entrada al Kal muevo, entero iluminado i reluziente kon el ermozo vitraje ke alegra la alma.
En el Kal viejo tuvo lugar antes de todo la tefillat Minhá, a la kuala sigió la drashá de Rav Haleva. Después el públiko kantó kon grande entuziazmo los kantes de Selihot, enkavedado por Kobi Zarco. A esta larga parte partisipó un grande públiko de ombres i de mujeres, no sólo de los moradores de «Recanati», ma i de munchos emportantes envitados. A la fin de la orasión fueron tomados todos los Sefarim i abashados en un kortejo, enkavesado por el Rav Haleva i Roni Aranya, direktor del Bet Avot. En el lobby del Bet Avot estavan asperando todos los moradores, ke al pasaje de los Sefarim se presaron para poderlos bezar .
Akí empesó la sigunda parte de la seremonía kon la salida del kortejo afuera, ande tuvieron lugar debasho de un ermozo baldakino, kantes i bayles, yenos emosión.
Un renfresko asperava el públiko afuera. Después dos mansevos, kon los Sefarim en los brasos, arrodearon el kartié entero, segidos por ombres i mujeres, yenos de alegría.
La última parte de la seremonía fue el retorno de los Sefarim a «Recanati» i la entrada al Kal muevo. En el lobby estava asperando un ancho públiko. Tres damas de las moradoras de «Recanati» pasaron re-pasaron kon tavlás de kunfites i tajikos de almendra entre el públiko, sigún la tradisión djudeo-espanyola de adulsar a los musafires i a todos los ke partisipan a una seremonía festiva. Entremientres empesó la tefillá de Arvit, ke koronó la inaugurasión del ermozo Kal muevo.
Adío al Kal Viejo al kual fuímos muy afeksionados, i Baruh abá al Kal Muevo
ke mos va reunir i él kon su ermozura i su kalor.
Matilda Koén-Sarano
2015 – Petah Tikva
