eSefarad Noticias del Mundo Sefaradi
A traverso de los tiempos, los savios de Israel izieron esforso por aklarar la sinyfikasion de las distintas festividades. I komo en otros sujetos, tambien en este daynda keda avierta la bushkeda.
La Torah mos amostra los motivos fondamentales. Pesah, Shavuot y Sukot eran tres okasiones en ke el puevlo azia su peregrinasion al Templo de Yerushalayim, i por esto de yamavan «Shalosh Regalim». Tenian tambien semejante el fakto de ser «Mikraéi Kódesh», yamados sagrados para ke la djente se adjunte a fiestar.
En kada una i una de eyas marka la Torah dos sinyfikados: uno sovre los lavoros del kampo i de los trokamientos de la naturaleza a traverso del anyo, i otro istoriko, relativo direkta o indirektamente kon el Eksodo de Ayfto. En tanto el primo sinyfikado, la fiesta de Sukot se yama «Hag Aasif», la Fiesta del Arekojimiento. En el sinyfikado istoriko, aresive el nombre de «Hag Asukot», La Fiesta de las Tentas o de los Tavernakulos.
LA FIESTA POR EKSELENSIA.
Kon el arivo del otonyo, los lavradores, los vinyateros, los guertelanos, arekojen i gradran los frutos de su lavoro. En Devarim, el sinken livro del Pentateuko , meldamos (XVI, 13-14): Selevraras la Fiesta de las Tentas por 7 diyas, una vez arekojido el produkto de tu era i de tu lugar. Te alegraras en esta fiesta tu, tu ijo, tu siervo i tu sierva ansi komo el levita, el ekstranjero, el guerfano i la vivda ke moran en tu sivdad.
Dize dospues el teksto (XVI, 15): «I te daras por entero a la alegria («Vehaíta ah saméaj»). De aki el tresero de sus nombre de esta fiesta «Zman Simhatenu» (el tiempo de muestra alegria). I en vezes es yamada solo » la fiesta» («Hejag»).
Ma no todos los guertelanos podian alegresen igual, porke los frutos de sus tierra no son iguales. Por esto en Vaikra se ordena: » Moraresh los 7 diyas en tentas (XXIII, 42)… «ke yo ize morara en tentas a los ijos de Israel kuando los kití de la tierra de Ayfto (XXIII, 43).
Sin duvda, esto es un rekodro istoriko. Ma es tambien un simbolo de semejanza. En el dezierto ke los djudyos tuvieron de rekorrer durante 40 anyos non avia palasios endjunto a las tentas. Todos moravan en sus tentas. La suká ke los representa, es para el Puevlo de Israel un rekodro de aeya vida primaria, simple i semedjante.
LA DALKAVA GERRA.
La fiesta de Sukot no solo mos rekodra el pasado, mizmo ke tambien se relasiona kon el avenir del Puevlo Djudiyo, i daynda kon el de toda la Umanidad. Mizmo en la parte del livro de Ezekiel (kapítolos 38 i 39) ke se melda puvlikamente en los kales durante «Hola amoed» de Sukot (los diyas de media fiesta), se refera a la inasion de Israel por parte el princhipe de Gog, de la tierra de Magog. (Este sujeto tambien aparese en el Talmud, komo «la gerra de Gog i Magog»). Es la mirada profetika de la Gran Gerra Dalkava, en la ke los inimigos de Israel seran vensidos, i dospues vendran los Tiempos del Mashiah, el Reyno del Dió en la Tierra, La Paz del Universo.
De este modo, el Puevlo Djudyo unio su mirada de un avenir arrelumbrado para la Umanidad, kon la Fiesta de Sukot.
LOS SAKRIFISIOS EKSPIATORIOS.
Ay otro sujeto asosiado a esta fiesta. En dinguna otra se sakrifikava semejante kantidad de animales, sovre todo vakas djovenas (novilyos), en el Templo de Yerushalayim («Bet Amikdash»). En Bemidbar XXIX, se avla de un total de 70 novilyos a lo largo de los 7 diyas de la fiesta, mientras ke en «Shminí Atzéret» el ochen i dalkavo diya, se sakrifikava uno solo. Los savios del talmud dizen ke 70 korvanot se korespondian kon 70 nasiones i el uno solo novilyo kon una nasion unika. I dize sovre esto Ravi Iohanan:
«Guay de los puevlos ke no konosen lo ke pedrieron! Mientras eksistio el saggrado Templo de Yerushalayim, avia un altar ke los purifikava. Ma agora, ¿komo podran ekspiar sus kulpa i ganar el perdon?».
Sus palavras dan a la Fiesta de Sukot un karakter universal.
EL «KOHÉLET»
El diya de Shabat Hol aMoed, o el ochen diya de la fiesta -Shmini Atzeret-, se melda puvlikamente de la Torá guadrada en el kal, el teksto bibliko de «Meguilat Kohélet»
El el lado Norte del mundo se aserka el otonyo, i nada ay mas triste i otonyal ke ese livro atribuyido al Rey Salomon. La vanidad de la vida i la insinyfikante del ombre, se mostran ayi komo en dingun otro. Por esto, parese, seria menos apropriando para el tiempo de Muestra Alegría «Zmán Simjatenu»
Ma el djudaismo lo entiende de otro modo. El kontenido de Kohelet no esta en kontra de la fiesta de «Bet Hashoevá», ni al desfile i bayles de «Simjat Torá», sino ke es su kontra. Para el djudaismo, la vida i el ombre tienen munchos lados, las alegrias i las tristezas se mezklan.
Simjat Bet Hashoevá: En la epoka del Sigundo Templo, en hol aMoed Sukot, tenía lugar una seremonia en donde se tomava la agua ke salia de una fuente i se la ofrendava en el altar, en medio de grandes manifestasiones de alegría.
Prof. Moshe Korin
Trezladado al Ladino de Liliana Benveniste
