eSefarad Noticias del Mundo Sefaradi
Al anyo 1939 en la Segunda Gerra mondyal, entraron los alemanos a la Polonya. En la sivdad de Krákov, se topava una komunitá djudiya grande; desvelopada, relijyoza i kon kultura djudiya rika. Los askyeres Alemanos forsaron a los djudyós de salir de las kazas, i arekojándolos los mandaron a los kampos de konsentrasyón onde lo mas se muryeron en formas kruelas.
En Krákov moravan dos amigos buenos ke syempre estuvyeron endjuntos, a la mizma klasa de la eskola i de la universidad, aziyan los doveres i los echos endjuntos; halís amigos de alma i de korasón, malgrado la diferensya entre las famiyas. Uno se yamava Viktor i era de famiya kristyana, i el otro se yamava Izak i era de famiya djudiya relijyoza.
Un diya de la gerra vido Izak ke los djudyós están kitados de las kazas i yevados a la stasyón de treno, en una manera bruta. A las eskondidas se enkontró kon su amigo, i le kontó lo ke se está pasando. Le dyo la yave de su kaza, i le arogó ke tome de ayá una validja yena de kozas presyozas apartenyentes al djudaízmo, i ke la eskonda. La validja konteniya livros de Torá antiguos, shofar,hanukiya, kandelares, rimonim de sefer Torá i mas.
En atornando a la stasyón Izak vido ke los trenos yenos de djudyós ya partyeron. Entendyó ke kedó solo i está en períkolo. Se eskondyó en la foresta, i kon el ayudo de los Partizanos se salvó.
Sesh mezes mas tadre, arrivó Izak a la Tyerra de Israel, kansado, triste, solo i dezesperado. Kon munchos esforsos empesó su vida de muevo, lavoró, se kazó, tuvo kriaturas, i reushó de buena manera. Syempre teniya el penseryo i eskarinyo de su famiya i de su amigo.
Pasaron anyos i Izak atornó a Krákov komo turisto, bushko su kaza de chikés, bushko la kaza de su amigo Viktor, i no topó nada. En el lugar de las kazas ay una otostrada grande, i el deredor se trokó Enteramente.
Un diya de la vakansa, entró ande un berber, i le demandó por Viktor. «Si,» disho el berber, «oy está dirijendo la biblioteka lokal.» Ansina topó Izak a su amigo, se abrasaron, i kon yorros kontaron lo ke pasó kada uno.
Viktor envitó a Izak a su kaza i echaron moabet por oras. Izak le demandó a Viktor si se akodra de la validja. «Mira,» arespondió Viktor, «pasaron munchos anyos i ya trokí de kaza dos vezes, i no me akodró onde está la validja. Ven la bushkaremos.»
La validja se topó en el bodrum de la kaza kuvierta de aranyas…
Izak atornó orozo a Israel i trusho la validja al Muzeo de Israel en Yerushalayim. Les disho: «Estas kozas raras vos demando de meterlas en ekspozisyon kon la eskriturya ke es donasyón del kristyano Viktor Viyaslav kon amistá al puevlo djudyó.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
