eSefarad Noticias del Mundo Sefaradi
Ver todos los artículos de esta sección
En el kalendario judio
Metiendo tino a un fenomeno kuriozo:
En el anyo 5775, Pesah kayo en dia de Shabat
En el anyo 5776, Pesah kayo en dia de Shabat.
Oganyo , 5777 (2017), Pesah kaye en dia de martes.
En el anyo 5778, Pesah kayera en dia de Shabat
En el anyo 5779, Pesah kayera en dia de Shabat.
Dunke, en los dos ultimos anyos, Pesah avia kayido en dia de Shabat, i tambien en los dos proksimos anyos, Pesah kayera en dia de Shabat.
Entonses, parese komo ke este Pesah (de oganyo) esta metido adientro de un “sanduich”.
Mos kontan ke el ke “invento” esta manera ambukante de komida, fue el Lord Sandwich de Ingletierra, en el siglo 18.
Ma, yo insisto ke fue muestro savio Hillel, antes mas de 2000 anyos el ke le kuadro azer el prototipo, segun la “recheta” ke mos dan en la Hagada de Pesah:
Koreh: tomara la matsa de abasho, ke esta sana, i partira kantidad de una azeituna; i de la lechuga, i ara un bultero, i untaran (kon jenerosidad!) en el harosset.
Para kumplir la enkomendansa eskrita en Bamidbar 9, 11 :
“Kon sensenyas (matsot) i yervas amargas (maror/lechuga) la komeran” }.
Semanada buena!
Yehuda Hatsvi
Erets Yisrael
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
