eSefarad Noticias del Mundo Sefaradi
Ver todos los artículos de esta sección
En muy pokas palavras, ma kon grande admirasion, vos eskrivo oy sovre una eroina judia: Yoana Benvenisti nasio en la metad del siglo 14 en Kastilia, Espania. (No savemos el presizo anyo de su nasimiento).
Su famiya fue bien rika i priviledjia. Eya se kazo kon Rabi Shlomo Halevi, (1350-1435), tambien de una famiya renomada, serkania de la korte real de Kastilia.
Eyos tuvieron 5 ijos i tenian una vida familial trankila i agradavle. Kon el tiempo, Rabi Shlomo Halevi parvino ser el Haham Bashi de la sivdad Burgos.
En el anyo 1391 desbrocharon severos pogromos kontra los judios de Sevilia. Los rebeliones empesaron por kavzo de las tensiones sosialas entre el rey, los aristokrates, i los kazalinos. Ama, toda la ira i sanya de la muchidumbre se dirijio kontra los judios komo rezultado de las seremonias de insitasion del obispo Martinez, predikando:
“Los judios deven konvertirsen al kristianizmo o murir!”.
Desde Sevilia, los pogromos i las matansas de judios se ekstendieron a todas vandas de la Peninsula Iberika.
En el mizmo anyo de 1391, el rabino Shlomo Halevi fue baptizado en el kristianizmo i resivio su muevo nombre de Pablo de Santa Maria.
Kon el fueron baptizados sus ijos i su ija tambien.
Despues de su konversion, el paso a bivir en Paris ande estudio temas de teolojia.
En 1394 se traslado a Avignon, i ayi se aserko al Papa Bonifacius IX. En 1403, el fue nominado el obispo de Cartagena; i en el anyo 1415 resivio el posto del obispo de Burgos.
Su mujer, Yoana Halevi Benvenisti, desidio a no renunsiar a su propia fe aun al muy alto presio de perder a sus ijos, i kontinuar su vida en soledad.
Eya demostro aki su firme determinasion i lealdad a la relijion de su nasion i sus ansestros.
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
