eSefarad Noticias del Mundo Sefaradi
Ver todos los artículos de esta sección
El Rambam (Rabenu Moshe ben Maimon) nasyo en Cordova, Espanya, en 1135.
Kuando fue de 13 anyos, tuvo de deshar al pais, i komo el destino del puevlo judio, pasar mares I paises, asta ke, en la edad de 30 anyos se establesyo en Cairo (Ejipto).
Ayi tomo el posto de medico/doktor del sultan Saladin, i tambien fue el Gran Rabino de Cairo.
En akel tiempo, RAMBAM ya era renomado en el mundo por su saviduria komo mediko de primera klasa, filozofo i teologo ke eskrivio muchos livros (en arabe i en ebreo).
En el mundo es yamado i rekonosido asta oy kon el nombre Maimonides.
En el puevlo judio es tan respektado por sus livros de Ley, ke por Rambam es dicho: «de Moshe (Rabenu), asta Moshe (ben Maimon), no uvo komo Moshe».
Mos kontan ke uno de los vezires del Sultan Saladin era una persona muy kruela ke azia grandes maldades i problemas a los judios. Rambam era defendedor bueno de los judios, ma no pudo azer mucho kontra akea mala persona, ke se yamava Nagib Bey. Ma, en fin, topo un kamino para azerlo temblar un poko.
Kada maniana se enkontravan a la puerta del Hukyumet, i Rambam le dizia:
– «Ke tienes oy, Nagib Bey? Te veo muy palido» o «Si te duele koza, no lo deshes pasar en deskuydo; puede ser koza grave».
No pasaron muchos dias ke este Nagib Bey vino korriendo a la kaza de Rambam el mediko.
De tanto oyir las remarkas de Rambam, le aferro espanto, i de verdad se konsentyo yeno de hazinuras i dolores.
Rambam le prometyo de kurarlo en kondision ke no aga mas mal a los judios.
En beviendo dos semanas largas, las drogas amargas de Rambam, el Nagib Bey fue de mijor en mijor, a poko a poko, asta ke se sano enteramante.
Las palavras negativas, no solo de la boka del mediko, tienen influensia a la persona ke las oye. Tambien facha agra no es un plazer de ver.
Por esto, el konsejo de Rambam es, ke kuando te enkontraras kon kualker persona en la kaye, en el buro, o ande es, dile un buen Merhaba i Buenos dias, kon una sonriza en tu kara.
Sonriza! No te kosta nada de azerlo, ma la sonriza aze plazer a la persona ke de en frente.
Muchas vezes -komo si era un espejo- resives i tu, una sonriza i kara alegre.
Semanada buena!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
