eSefarad Noticias del Mundo Sefaradi
Ver todos los artículos de esta sección
En estos dias de la Korona me akodri de un livro ke avia meldado aze muchos anyos.
El livro, eskrito por Albert Camus, un autor i filozofo, ke gano (en 1957) el premio Nobel en literatura.
El titolo del livro es “The Plague” (en ingles), “La peste” (en espanyol). Yo lo avia meldado en su traduksion al ebreo, i yamdao “haDever”. En judeoespanyol seriya el nombre del livro “la peste/pesta” o “la landra”…
“La peste” mos konta por djente i por evenimientos en tiempos de una sierta epidemia ke desbrocho en la sivdad de Oran, Aljeria. En realidad, es una alegoria sovre el hal de la moderna umanidad.
Ma, yo no vos konto oy la istoria ke en el livro, sino ke solamente kiero aksentuar unas kuantas ideas ke avia absorbado de lo eskrito.
* La importansia de la Medisina Preventiva: Kuidarmos bien antes ke venga el mal, has ve-halila!
* Solidaridad sosiala es muy nesesaria.
* Muestra adaptasion a la dezesperasion es peor/piyor ke la dezesperasion mizma. Ay de luchar kontra tala tendensia.
* Es de admirar a los ekipos/el personel de los ospitales ke arriskan sus vidas estando en kontakto kon hazinos, i los kuidan, por ovligasion umana.
Sanos i salvos ke estesh todos!
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
