eSefarad Noticias del Mundo Sefaradi
Ver todos los artículos de esta sección
Estuve asentado bien trankilo en el otobus, kuando se aserko ande mi un ombre i me saludo en arabo: “Sabah l’her” (“buenos dias”). Otomatikamente le respondi: “Sabah a’nur” (“manianada de luz”).
El anonimo se asento “bene horin” al lado de mi, i me empeso avlar en ebreo.
El se prezento komo Sami, un merkader de la aldea yamada Barta’a, i de aki no paso mucho asta ke le demandi ke pensa sovre el plano de Trump, el prezidente amerikano, para yegar a un akordo de paz entre Israel i los palestinianos.
Komo puedesh meldar en el Google, Barta’a es una aldea en Israel, dividida en dos: una parte esta en el territorio de Israel, prosperando i bueno; la otra parte, undida en la provedad, esta en el territorio de la Autoridad Palestiniana.
No me maraviyi mucho a oyir la repuesta de Sami. El ve pozitivamente el plano amerikano, a kondision ke Barta’a entera sera aneksada al territorio de Israel…
– “Ma, no te kanses.” adjunto i disho Sami “Los palestinos van a responder kon un grande “NO” a kualker plano ke sea. Todos eyos se komportan desde 1947 komo los savios de Halil”.
Aki avro un parantez para kontarvos ke, en boka de los arabos, elHalil es la sivdad de Hevron.
Los arabos Halilis son renomados igual komo “los savios de Helm” en Polonia, i “los savios de Makeda” en Espania.
Por darme a entender la saviduria de los de Halil, me konto Sami una shakayika al estilo del umor inglez: “nonsense”/”sin lojika”.
Por razones de gramatika, esta shakayika no pudo ser traduizida al ebreo. Sami tuvo de kontarmela en arabo liviano. Me alegro dizirvos, karos amigos, ke bien se entiende en judeoespanyol:
“Un Halili, se fue a merkarse una ora.
Ma, kuando se apersivio ke es muy kara,
se merko sinko minutos”.
Semanada buena!
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
