eSefarad Noticias del Mundo Sefaradi
Ver todos los artículos de esta sección
Esto fue antes kaje de 3300 anyos:
En los ultimos dias de su vida, adjunto Moshe Rabenu a todos los ijos de Yisrael, i les disho:
«Eskucha i oye, Yisrael. En este dia te izites puevlo a Adonay tu Dio» (Devarim 27,9).
El muevo puevlo fue formado de los 12 trivos, desendientes de los 12 ijos de Yaakov Avinu (konosido tambien kon el nombre Yisrael).
Por kavzo de varios akontesimientos en la historia de muestro puevlo, estamos desparzidos en todas partes del mundo, i ayinda somos un puevlo kompuesto de varyos «trivos» komo Askenazim, Sefaradim, Mizrahim, Yemenim, i mas.
Yene, para siempre i siempre, aunados kon amor komo una nasion biva i dinamika.
Por meldar mas sovre muestros ermanos Ashkenazim, vos do aki el texto de mi chiko artikolo «A las patadikas de los mashemehos», publikado antes 15 anyos en la revista de»;Aki Yerushalayim».
Ma, unas kuantas palavras mas de eksplikasion: Los Ashkenazim, biviendo komo minoria entre las komunidades grandes de Sefaradim del Imperio Otomano, «ganaron» unos kuantos sovrenombres:
En Salonik fueron yamados «mashemehos», segun mensionado en mi artikolo.
En Turkiya, los Askenazim fueron yamados «lehlis», para markarlos ke son venidos de Lehiya (el antiguo nombre de Polonia).
En paizes komo Bulgaria o Serbia, los Askenazim fueron markados kon el nombre «haldeos» («kaldiim» o «kasdiim», en ebreo).
En realidad, los haldeos antiguos fueron una nasion de orijin semita, ke bivian en el sud de Mesopotamia (Irak), en los tiempos de la Biblia. Naturalmente, muestros ermanos Ashkenazim no tienen ninguna relasion a los haldeos/kaldiim istorikos.
En varyas komunidades de sefaradim uzavan a yamar a los judios venidos de Almania kon el nombre «tudeskos».
Apropo, el nombre «Ashkenaz» es el nombre del bisnieto de Noah, el kual konosemos del tiempo del deluvio (el mabul bibliko).
Por kualker razon, los judios ke biven en varios paizes de Evropa del Este, son yamados «Ashkenazim».
A propo, ay de konsiderar a todos estos nombres komo un simple indikador, i nada mas.
Has ve-Shalom, no en el sentido derogatorio.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
