eSefarad Noticias del Mundo Sefaradi
Ver todos los artículos de esta sección
Karos amigos i amigas,
Kuando yega el ninio judio a la edad de 13 anyos, es dinyo a “kumplir minyan”, de adjuntarse komo un ombre judio, i ser uno de los 10 ombres (minimo nesesario, segun la Alaha judia), para azer tefila, orasionar, en publiko.
No me olvidare nunka las karas orozas i orgolyozas de mis djenitores, o de muestros vizinios i amigos sefaradim, kuando anunsiavan:
“Mi ijo va kumplir Minyan!! en dia de lunes (o tambien en dia de djuevez), en la tefila de la maniana (Shaharit) !”.
En dias de lunes i de djuevez, se kita del Ehal el Sefer Tora, i se melda un paragrafo de la perasha de la semana.
El ninio, “kumplimiendo minyan” por la primera vez en su vida, adornado kon Talit i Tefilin (por la primera vez en su vida!), es invitado kon kantes liturjikos alegres, a suvir a la Tora (por la primera vez en su vida!).
* * * * * * * *
Me parese ke asta la jenerasion pasada, no se uzava mucho entre los sefaradim del Imperio Otomano, la ekspresion Bar-Mitsva (Bar Mizva).
Ke sinyifika ser Bar Mitsva?
Segun la Alaha, asta la edad de 13 anyos, el ninio no es responsable de sus delitos/pekados; el kastigo por kavza de todos los pekados ke avia kometido el ninio, “kaye” sovre la kavesa de su padre.
Ma, del momento ke el ninio tuvo el zehut de kumplir minyan, en el mizmo momento, se aze el ninio un Bar Mitsva (“ijo ke es responsable a todos los mandamientos de la relijion judia”).
El padre del “Bar Mizva” dize a boz alta, publikamente, en el Kal, la Beraha/bendision (ke a mi, personalmente, me estremese el korason, kada vez ke la oygo:
“Bendicho El ke me desbaraso, ke me libero, del kastigo de este!!”(mirando aki: “de este”, kijo dezir “de mi ijo”).
Ke frio, ke severidad, sopla del teksto seko de esta “beraha”…
En kurto, “kumplimiento de Minyan” es una grande, imensa, alegria.
“Bar Mitsva”, kon toda la alegria, mos senyala el kargo i la pezgada responsibilidad de kumplir todos los 613 mandamientos de la Ley.
Salud buena i alegria de la vida ke tengash!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
