eSefarad Noticias del Mundo Sefaradi
Ver todos los artículos de esta sección
UN DIALOGO EN EL TRENO
Kontado por Yehuda Hatsvi
Un buen jidyo de los balkanes, Jako se yamava, avanso un poko de dinero, i desidyo un dia de viajar a Fransia i vijitar unos kuantos de su famiya ke avian emigrardo ayi.
Tomo Jako a la mujer en la mano i se fueron a Fransia.
No se de ande para ande, teniyan de tomar treno. El treno ya estava para partir, i el benadam, este Jako, ke teniya ambre, alkanso kon muy adjile solamente merkar dos panes fransezes. Dos bagettes.
Kuando ya entraron al treno, i se arresentaron para komer el pan, vido Jako un ombre franses kon el berret en la kavesa, asentado en el banko del treno, i enteniendo en la mano un pedaso bueno de kezo.
Se aserko Jako ande el Franses, i le disho kon polites:
– Pardon, senyor. ke dizes si yo te do un pan i tu me das kezo?
El Franses le dize: «quoi? / KE?»
Jako repeto lo ke disho:
– «Yo te do un pan, i tu, me puedes dar un poko de kezo?»
El ombre franses, no lo entiende, i le dize:
“Je ne compre pais”.
Se eniervo Jako, i le disho:
– «A, si tu no kompras pan, yo no te kompro kezo !
“Pan i kezo i un bezo”
Puvlikado en Ladinokomunita
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
