eSefarad Noticias del Mundo Sefaradi
Ver todos los artículos de esta sección
Al rey le plaze figos
Kontado por Yehuda Hatsvi
En el Midrash Tanhuma topamos maase en un viejo ke plantava igeros. Ma, los umoristas sefaradis tomaron solo el skeleton del kuento, i injenyeron una konsejika kon su moral espesifiko:
Mos kontan, ke un dia de los dias, salio el rey kon su armada a la gerra kontra sus enemigos de otro pais.
Antes ke pase la frontiera, vido en un kazal a un ombre aedado plantando plantasiones de igos.
Se aserko el rey, i le demando:
– «Ombre, ya sos bien aedado. Es ke vas alkansar komer de estos arvoles de igos?»
– «No se» disho el kazalino. «Si tendre Zehut – komere. I si no, ke koman mis ijos detras de mi».
Pasaron anyos. La gerra ya termino de kuando, i el pais – inshalla ande mozotros tambien- estava en paz i en repozo.
Los arvoles de figo dieron unas frutas maraviozas. Unos figos dulses mas ke la miel!
Akel ombre muy aedado, tan alegre de las frutas, se akodro del rey, i desidio de yevarle un regaliko para rekordarle de akea konversasion ke tuvieron anyos atras.
Tomo el ombre una kanasta, un sestiko chiko, lo incho de figos ermozos, i se lo yevo al palasio del rey.
Seguro ke al empesijo no lo desharon entrar. ¿KE? kada uno puede entrar al palasio del rey?
Ma, kuando lo avizaron al rey kien fue el ke le vino a vijitar, lo desharon entrar.
El rey se emosiono mucho de la determinasion del kazalino, i de la esperansa ke tuvo para gozar del fruto de su lavoro.
Entonses, el rey ordeno de inchir el sestiko del kazalino kon liras de oro.
La boz salio en akel kazal :
– «Mirando aki! Al rey le plaze figos !!
Al rey le plaze figos !!».
Korrieron todos al palasio del rey, kon sestos de figos/igos…
****
Esta ekspresion sefaradita se dize por alguna persona ke no entendio al fondo la sinyifikasion verdadera de algun sujeto.
Sitado de mi konferensia «El umor tipiko de los judios del Imperio Otomano»
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
