eSefarad Noticias del Mundo Sefaradi
Ver todos los artículos de esta sección
Dame al gato
Kontado por Yehuda Hatsvi
Yosef era un ombre empyegado a jornal (jornalero), ke no ganava mucho. Ma, por onorar al dia de Shabat, siempre se esforsava, i merkava produktos kon mano avyerta.
Un dia de djueves, a eskuentra de Shabat, se fue al merkado i merko karne, peshe (peshkado), un vokal de vino. Trusho el sesto en kaza, i lo metio en la kuzina.
-«Mira, Hanna» disho a su mujer. «te trushe produktos para Shabat. Mira ver de gizar senas buenas i savrozas, ke van a venir musafires.
La mujer, tomo la karne, i la empeso a gizarla. En supito, se akodro ke tyene de preguntar koza a su vezina. Se fue; ama la konversasyon parese ke se alarg’o mucho tiempo, i kuando tornó Hanna en kaza, se apersevyo ke la karne se kemo de negra manera.
La ora ke uza el marido tornar de su lavoro ya se aserko, i Hanna ya saviya ke akel no le va plazer del todo de lo ke paso; eya alkanso arrondjar la karne kemada, i en mientres, na ke el marido entra en kaza.
– «Saves», le disho la mujer, «el gato muestro es muy malo!»
– «Deke?» demando el marido.
– «Na, el se suvio ensima de la meza i mos komyo la karne», disho Hanna.
El marido la miro en los ojos, entendyo ke no es verdad, i le disho:
-«Estas bien segura ke este gatiko chiko se komyo toda la karne?»
– «Si, si» disho la mujer «el gato komyo todo».
En akel punto paso por la kaza un vendedor de zarzavat, ke pregonava kon boz alta:
«Tomates!! Tomates!! Ya tomates tomates?!!»
Yosef le de mando si es posivle de uzar por un punto su balansa (al parser, una balansa al tipo yamado «romana»)
– «Sha veremos» disho Yosef a su mujer. Tomo al gato en sus manos, i lo metyo a la balansa.
– «Parese ke tyenes razon, Hanna» disho en fin .
«Es muy posivle ke el gato de verdad komyo toda la karne. Mira aki, yo merki ayer una oka de karne, i aki esta! La balansa me dize ke el gato peza djustamente una oka. Egzaktamente el pezo de la karne. Bueno, ya topimos la karne: El gato se la komyo; ma, me demando yo agora, ande esta el gato?
Dime, Hanna, ande se desparesyo el gato?
Dame al gato!
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
