eSefarad Noticias del Mundo Sefaradi
Ver todos los artículos de esta sección
Un sako de oro
Kontado por Yehuda Hatsvi
En un lugar en Turkiya, muy londje/leshos de sivdad o aldea, arres de un rio, biviya un djidyo ke se yamava Binyamin.
El era muy prove todo su vida, i en realidad biviya una vida kaje komo el ombre prehistoriko, de lo ke topava en el boske o de lo ke peshkava del rio, solo i asolado.
Un dia, en kaminando a la orriya del rio, sintyo gritos por sokorro/ayudo. Miro i vido ke un ombre viejo se esta undyendo. Al punto, se echo al rio, lo travo a lo seko, i lo salvo.
El viejo le konto ke es un investigador de la natura, ma Binyamin ni ke saviya kualo es.
– «Komo ke te page por ke me salvates mi vida?»
– «De nada» disho Binyamin. «Kuando mi padre me ambezo a nadar, me konjuro ke nunka no tenga ezitasyon de salvar kualker persona de undirse».
– «De toda manera, yo te vo ambezar una koza ke tal vez te azera provecho kon el tiempo» le disho el viejo. «Mira aki la arena ke el rio enshaguo.
En esta arena ay una kantidad muy pekenya de oro. Ma, en azyendo una pisina chika, vas a enshaguar mas i mas la arena, el oro kedara en el fondo de la pisina. Kuando lograras, reushiras, inchir un sako de oro, vas a ir a la sivdad, ayi lo puedes vender en buen presyo.
La sivdad es muy londje. Aki tyenes el azniko mio, ke se entrompeso en las piedras i se ferio la pierna, i ay de sanarlo ansina komo ansina. Na, tomalo komo regalo de mi parte para ke tengas komo ir i vinir a la sivdad i kon el sako de oro”.
De verdad, Binyamin reusho a despartir el oro de la arena, egzaktamente komo lo ensenyo el viejo.
Despues de tiempo, el reusho inchir un sako de oro.
– «Ya basta» disho Binyamin de si para si. «El viejo disho ke me vayga a la sivdad kuando tengo un sako de oro».
Entonses, Binyamin tomo al azno, i metyo sovre el azno la albadra ke konteniya dos sakos vaziyos, uno de kada parte.
El, incho el un sako kon el oro ke se le adjunto, ma el sako de oro kayiya en kada vez del pezgor. Ke ay de azer? Si estava aki el viejo, por seguro ke iya a topar alguna solusyon.
Ma, en fin, i Binyamin tambien topo una solusyon:
Le kuadro a Binyamin de inchir el otro sako, ke estava ensima del azno, kon piedras, i ansi se balanseo todo, i kontinuo en su kamino.
Kuando ya estuvo serka de la sivdad, vido Binyamin un ofisyer de la armada del Sultan. Binyamin lo saludo kon mucho respekto. El ofisyer se le aserko al lado.
– «Ke tyenes en los sakos? le demando
-«Na», disho Binyamin «en un sako tengo oro, i en el otro sako – piedras»
– «Para ke las piedras?» le demanda el ofisyer.
– «Para ke el sako de oro no kayga.»
– «Aman de bovo». empeso a riyir el ofisyer «Puedias inchir medio sako de oro en kada parte del azno, i no tiniyas de menester de piedras. Bovo de los bovos, ke sos!»
– «Tienes razon» disho Binyamin «Al punto vo azer komo dishites.»
El ofisyer ya estava para irse, i Binyamin lo yamo:
– » Eskuza, sinyor ofisyer del Sultan. Savras komo se produse este oro?»
– «No» disho el ofisyer
– «Savras al menos el lugar de ande kiti este oro?»
– «No, no se» disho el ofisyer.
Binyamin se incho de koraje, i le disho:
– «Entonses, es verdad ke saves atar i enyugar al azno, ma el ikar, el mas importante prinsipyo, no saves.»
El azno kon oro, alkansa todo.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
