eSefarad Noticias del Mundo Sefaradi
Ver todos los artículos de esta sección
Los poyos de Salonik
Kontado por Yehuda Hatsvi
En mi pais, Israel, todos konosen al Baron Edmond de Rotschild, porke el fue el ke dono mucho de su dinero para ayudar a la fragua del pais.
Ma, en el mizmo tiempo biviya un otro baron filantropo ke ayudo mucho a los jidyos en todas otras partes del mundo. Este fue el Baron Moris de Hirsch.
Entre otras muchas donasyones, el fraguo en Salonik un eshpital; i el kuartier ande morava mi famiya se yamava «Baron Hirsch» (ke los selaniklis reusheron kon el tiempo a «mijorear» el nombre tudesko, i pronunsyarlo komo «Varonish»).
Mos kontan ke el Baron Hirsch vino un dia a Salonik, i kijo pasear por las kayes, ver djente, ver la vida verdadera en la sivdad. Tomo kon el solo un kompanyero lokal, ke sea
su turdjeman/traduktor.
Oras de mediodia, el Baron kijo komer koza. A la punta del soko/merkado aviya una lokanda chika, un restorant. Entro ayi, i se enkomendo un plato de poyo buido, komo uzan a komer en Austria, ande biviya el baron.
Despues de komer, le kovraron por la komida una suma muy grande. El Baron, se maraviyo mucho, i le demando al patron de la lokanda, a traves del traduktor:
– «Dime, es ke las gayinas en Salonik son tan raras, o tan karas?»
El patron de la lokanda le dize al traduktor:
– «No, las gayinas, no. Ma los milionaryos, si».
El ke save merkar barato i vender karo, es un merkader muy zeki (intelijente) i raro.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
