eSefarad Noticias del Mundo Sefaradi
Ver todos los artículos de esta sección
Pasas!! Pasikas!!!
Kontado por Yehuda Hatsvi
En muchas situasiones en la vida empleamos esta dicha: «Las palavras klar
as, el Dio las bendize».
Mi madre, en Gan-Eden este su alma, me aviya kontado en mi chikez por un kavzo ke akontesyo en la famiya; i ansina va la koza:
El nono/avuelo de mi madre, en Salonik, aun ke era maestro de italiano, era muy prove (i afilu si lo digo en italiano, «povero», la situasion ekonomika keda la mizma).
Una buena maniana, mi bisnona lo akompanyo a su marido a la puerta de la kaza, i le disho:
– «Va en bonora, i el Dio ke te apareje en el kamino una bolsa de «koreladas» (liras turkas de oro).
No paso ni una ora, i na ke el buen djidyo torno a kaza, kon una bolsa en sus manos.
– «Mira, bula!» le disho a la mujer, yeno de nyervos i kon mucha furia: «Ke?! la novia de la media boka sos? rogates al Dio por «koreladas»?. Na, aki te mando el Dio una bolsa de PASAS, (pasikas) koreladas.
Teniyas de demandar klaramente: liras de oro! paras! dinero! moneda! las palavras klaras, el Dio las bendize!»
***
Al interval de los anyos, ya sinti este akontesimiento de boka de muchos amigos mios. (kreendome a mi: Todos mentirozos! Todos kontandores de lejendas i konsejikas!).
El uno, me kontava ke esto paso kon su tia en Salonik, el otro disho ke ansi paso la koza kon su vezina en Estambol o Izmir, ya no me akodro agora. Otra mujer, me djuro ke el nono de su tia en Monastir fue el ke topo la bolsa de pasikas.
No metash tino a bavajadas. La verdad es, solamente komo vos avia kontado YO. El fato es, ke mi bisnono le kuadro de azer un poko de paras (moneda) de las pasas ke topo akel dia.
Un vezino arnaut le ayudo a fazer de las pasas un sherbet. Sherbet de asukar i de pasikas koreladas. Ma, komo la kantidad de las pasas no fue bastante, mi bisnono adjunto i mesklo i kashtereo adientro del sherbet kualker beveraje i bevida ke topo en la kuzina, i buen karal de agua tambien, naturalmente.
Kon este produkto salyo mi bisnono a la kaye, en akel dia de primavera, a vender este shorbet de pasas; el empeso a pregonar:
– «Salud i vida buena! Bevida buena! Todo pasa! Todo pasa!»
Me parese, ke el primer mushteri/kliente ke bevyo este sherbet ya le disho:
– «Kualo es esto? savor de chichigaya (griyo) tyene la bevida! esto es lo ke pregonavas «todo pasa»?? No se marka de nada la savor de las pasikas»!!
– «No», disho mi bisnono, «Yo no dishe pasikas. Yo pregoni «todo pasa», porke TODO pasa en la vida i en la bevida»…
Las palavras klaras, el Dio las bendize.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
