eSefarad Noticias del Mundo Sefaradi
Ver todos los artículos de esta sección
Sovre el nombre MOSHE
Yehuda Hatsvi
Segun la tradision judia, ay en la Megila de Ester kuatro frazas ke las yamamos “Pesukim de Geula/redension”.
En la meldadura de la Megila (en noche de Purim), uzamos todos los Yehidim, a meldar/kantar en boz alta, kada uno de estas frazas, djuntos kon el hazan.
Por un egzempyo, el primer pasuk espesifiko, es:
“Aviya un varon judio en Sushan la kapitala, i su nombre Mordehay, ijo de Yair, ijo de Shimyi, ijo de Kish, varon de Benyamin”.
(la Megila de Ester, 2, 5).
Bien entendido: Mordehay es uno de los protagonistas de la Megila, el ke izo todo lo posivle para salvar a los judios del dekreto de Haman el malo.
Apropo, por referensia, vos do aki las primeras palavras de los otros tres “Pesukim de redension”:
1. i Mordehay salyo de delante el rey kon vestido real (8, 15).
2. a los judios aviya luz i alegria (8, 16)
3. Mordehay el Judio fue segundo al rey Ahashverosh (10,34).
Un dia, en mi chikez, le demandi a mi padre:
“Komo fue ke no onoramos tambien a Moshe Rabenu, el ke mos sako de la esklavedad. Porke es ke no kantamos todos djuntos en el Kal los pesukim ke mos relatan por en nasimiento de Moshe?”
Mi padre ezito por un breve momento, i me disho: “Akodrate. La Tora mos da a saver ke “el varon Moshe era muy umilde” (Bamidbar 12, 3).
No se si esta es la razon kompleta, ma ayinda no topi otra.
Ma, antes de meldar en la Tora (las primeras frazas en Shemot, kapitolo 2), me vo a ver ke disheron los ejiptologos por el nombre MOSHE.
Los ejiptologos dizen ke el nombre Moshe, es en realidad el nombre ejipsiano antiguo Meses, ke sinyifika (kreado, nasido); komo por enshemplo el nombre Ra-meses, ke su sentido es “kreado por RA».
(en la mitolojia ejipsiana, Ra fue el Dio-falso del sol i de la vida).
No puedo aleshar enteramente esta teoria, ma kiero egzaminar la interpretasion ke dyo la ija de Paro al nombre Moshe.
Lo ke mos konta la Tora es ke Paro mando un orden a su puevlo, diziendo:
“Echad al rio todo ijo (de los ebreos) ke naska, i toda ija abediguaresh (prezervad la vida).
A Amram i Yoheved, del trivo de Levi, les nasio un lindo bebe.
Eyos trataron de eskonderlo, ma despues de tres mezes, no fue mas posivle. Estonses, Yoheved metyo a su bebe, en una arka echa de djunko, kalafteada (kuvyerta) kon pez (alkatran) i barro, i la metyo sovre la oriya del rio.
Miriam, la ermana grande del bebe, lo bikleava de leshos…
…i desendio la ija de Paro a lavarse al rio, i vido al ninyo en la arka, i se apiado de el, lo tomo en brasos i fue a eya por ijo, i yamo su nombre MOSHE, i disho:
“porke de las aguas lo saki/lo salvi”.
El ke save un poko la lengua ebrea, savra bien ke al ke fue sakado/kitado de las aguas se yama MASHUY.
Ma, por azerlo klaro: el nombre MOSHE, en ebreo, sinyifika “El ke saka/kita de las aguas”.
No es ke kiero kritikar a la ija de Paro por su yerro en la lengua.
Mijor kiero kreer ke eya alkanso una iluminasion divina, ke el chiko Moshe sera el ke sakara al puevlo de Yisrael de las aguas amargas de la esklavedad.
Yene, ayinda me kedo una enigma sin topar solusion:
El bebe, por el kual estamos avlando, nasio en la kaza de sus djenitores Amram i Yoheved del trivo de Levi.
Entonses, mi pregunta es: ke fue el nombre ke lo avian yamado en ora de su sirkunsizion (Brit-Mila), segun el mandamiento del Dio a Avraham Avinu muestro ansestro?
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
