eSefarad Noticias del Mundo Sefaradi
Ver todos los artículos de esta sección
AMOS OZ I SUS ESKRITOS
Yehuda Hatsvi
El autor ebreo, Amoz Oz, murio en 28 de Desembre 2018, a la edad de 79.
Amos Oz eskrivio mas de tres dozenas de livros, los kual fueron traduizidos a 45 linguas. El famozo autor es bien konosido en el mundo, no solo por sus livros, ma tambien por su kritika sovre Israel i su komportamiento en los territories konkistados en la Gerra de Sesh Dias en 1967. En akel mizmo anyo el eskrivio un artikolo, diziendo «Afilu una okupasion/konkista nesesaria, es okupasion korrupta«, i fue entre los primeros ke avian deklarado en boz alta su apoyo en la solusion de «dos Estados para dos puevlos».
Entonses, no me sorprendio notar ke en varios periodikos en el mundo (i en Evropa en partikolar) eskrivieron nekrolojias al onor de Amos Oz z»l. De la otra parte, presizamente por sus ekstremas opiniones en el tema, el grande parte del puevlo en Israel se le konsidera kontroversial i polemiko.
Me gustaria mijor eskrivir por su enorme erensia literaria (en ebreo), desde su primer livro «Tierras de Chacal» ke salyo a luz en 1965, a la edad de 26 anyos. En tal livro, Amos Oz trato de deskrivir la mueva realidad en el kibbutz i la piedrita de los valores ke egzistiyan en las jenerasiones pasads.
De su primer livro ya se remarko su dono de eskritor; suplementos literarios en varios peridikos, en Israel, ya notaron ke mos esta kresiendo un autor maraviozo.
Durante los anyos, Amos Oz resivio muchos premios importantes en Israel i en otros paizes, mas de kualker otro autor Israeli.
Komo krese un gran eskritor?
Aparte del dono i el talento natural, resivido de los sielos, al pareser es ke, antes de todo, lo ke karakteriza a los grandes autores es el senso de kuriozidad; ma, bien entendido, no es solamente esto.
En meldando el livro autobiografiko de Oz «Una historia de amor y oscuridad», ke salyo a luz en 2002, mos konta el autor por las kondisiones de su vida yenas de tension, emosion, dolor i konfliktos. Mas ke seguro ke todos estos elementos bushkavan kamino para dezbafar, salir a kontar sus dertes al mundo, i ansi kisas, afalagar l’alma. En el kavzo de Amos Oz, todo esto lo pusho a desidir ser autor i eskrivir sin sesar livros i artikolos.
De la otra parte, por mazal i buena suerte, Amos Oz, konosio en su chikes al eskritor S.Y. Agnon (el ke gano el premio Nobel de literatura en 1966). Agnon fue un konosido del padre de Amos, i el ninio Amos uzava a vijitarlo de vez en kuando. Las relasiones amigavles entre los dos kontinuaron por muchos anyos, i Amos Oz admirava a Agnon i sus eskritos. En toda su vida literaria, se nota en los livros de Oz el aire de Agnon en el estilo de eskrivir.
El ninio Amos nasio en una famiya de intelektuales revizionistas (nasionalistas). Su padre, Yehuda Klauzner, fue doktor en literatura ebrea. Su madre, Fania, estudio filozofia en las Universidades de Praga i Yerushalayim. Por kualker razon, eya se suisido kuando Amos era un ninio de 12 anyos. A la edad de 14 anyos i medio, el desho la kaza de su padre i se fue a bivir en el Kibutz Hulda (de 1954 asta 1985). Desde su djoventud, Amos troko su alkunia «Klauzner» a «Oz» (ke sinyifika en ebreo koraje, ozadia, atrivision). Durante sus 30 anyos de vida en el kibbuz, Amos Oz, se dezvelopo tambien kon su punta de vista sosial-demokrata.
Despues de su servisio militar, el estudio filozofia i literatura ebrea en la Universidad de Yerushalayim. Amos Oz se kazo kon Nili, la ija del bibliotekario del Kibutz Hulda.
Amos Oz tiene dos ijas, la profesora Fania Oz-Salzberger, i Galia; las dos se okupan en la eskrituria literaria. El ijo, Daniel, es poeta i muzikante.
El livro «Istoria de amor i eskuridad» es un dokumento umano muy sensivle i emosionante.
En 2015 se kreo un filmo «A Tale of Love and Darkness» bazado sovre el livro. La direktora del filmo es la aktrisa Natalie Portman. El filmo fue prezentado en el festival de sinema de Cannes.
Por terminar, unas kuantas linias sovre un livro, eskrito (en ingles) por Amos, djuntos kon su ija, la profesora Fania Oz-Saltzberger. En el livro, titulado «Jews and Words» (los judios i las palavras), los autores tratan de aklararmos por ke las palavras son tan importantes por los judios, i mos prezentan todos los tiempos, desde el autor anonimo del Kantar de los Kantares (ke segun muestra tradision, es el rey Shelomo), asta los autores i poetas de muestra jenerasion; las palavras entre los judios, son una refleksion de la alma i del korason.
El puevlo judio konstruyo su identidad a traves de un livro. Es sorprendiente, ke esto revelo la profunda relasion entre el ser umano i las palavras.
Ser judio sinyifika amor; konoser, i a vezes nyegar, o kestionar, los dotrinos de profetas i rabinos. En el interior de kada judio ay una biblioteka: Las famiyas judias ambezavan a los ijos desde eded muy temprana; ma no se trata de una edukasion dogmatika, sino avierta a diskusion. El judaismo es una bushkedad konstante de la verdad.
En kurto, segun Amos i Fania, el judio es ombre de livros, un errante morador del mundo, i kreen ke es una formula eksitoza i feliz.
* * *
Espero ke este chiko i modesto artikolo vos dyo a gostar un pokito de la rikeza spiritual del fruchiguozo autor Israeli.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
