eSefarad Noticias del Mundo Sefaradi
Ver todos los artículos de esta sección
La bendision a los ijos de Yisrael
Yehuda Hatsvi
La fiesta yamada Shemini Atseret (djuntos kon Simhat Tora), se selebra despues del seten (i el ultimo) dia de Sukot.
Es verdad ke Shemini Atseret viene muy arres se Sukot, ma yene es una fiesta“independente”, fiesta en si mizma.
En Shemini Atseret fiestamos tambien la Alegria de la Tora (“Simhat Tora”), en la kual meldamos la ultima perasha de la Tora, (la perasha de Vezot aBeraha), i meldamos tambien un paragrafo de la perasha de Bereshit, para aksentuar ke meldar i estudiar la Tora no se termina nunka, es una kadena eternal.
La perasha de Vezot aBeraha empesa kon las palavras:
“I esta es la bendision kon la kual bendisho Moshe, varon del Dio, a los ijos de Yisrael”
i es la beraha (bendision) a todos trivos de Yisrael.
El Midrash Tanhuma mos nota una remarka interesante:
Muestros padres antepasados uzavan, kada uno i uno, bendizir a su jenerasion;
ma no eran perfektas komo la bendision de boka de Moshe Rabenu.
Noah, en saliendo de la Teva (arka) despues del Mabul, bendisho a sus ijos, ma kavzo una diferensia entre eyos:
“Ensanche el Dio a Yefet, i more en las tiendas de Shem; i sea Kenaan siervo a el”.
Yitzhak bendisho a Yaakov, diziendole:
“I te de el Dio la bendision de Avraham”.
Me, kuando Yitzhak le dyo a saver a Esav ke Yaakov resivio la bendision kon enganyo, kavzo en esto un pleito i odio entre los ermanos.
Yaakov bendisho a sus ijos, ma kon reprosho a Reuven el behor i tambien a los ermanos Shimeon i Levi.
De la otra parte, la bendision de Moshe fue dicha a todos trivos del puevlo, djuntos i aunados.
El Dio bendizira a toda kaza de Yisrael kon paz i amor.
Fiestas alegres!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
que interesante conocer el origen de la bendision, que aquel cuyo nombre no soy digno de repetir los bendiga.