eSefarad Noticias del Mundo Sefaradi
Ver todos los artículos de esta sección
LA FIZIONOMIA
Yehuda Hatsvi
El viernes pasado mos enkontrimos kon la parea de muestros amigos de chikez. Grasias al Dio, todos prezentes en este enkontro son kapaz de kontar rekuerdos de los 70 anyos pasados (i afilu de antes), i venimos a una konkluzion ke esta epoka, en la kual bivimos, es una epoka de revolusion sientifika: en kada nada meldamos sovre alguna mueva invension, i ayinda “esperamos dias por ver maravias”.
Ma, los livros de estoria mos ambezan ke el termino “Revolusion Sientifika” se refera a los deskuvrimientos en astronomia, fizika, biolojia i kimika, en los siglos 16 i 17 (en Evropa).
Por darvos una data mas egzakta kuando se konta ke avia empesado esta “revolusion”, notare el anyo 1543. En akel anyo, el astronomo Nicolaus Kupernikus publiko su investigasion “El movimiento de los kuerpos selestial”. I en el mizmo anyo, eskrivio el Dr. Andreas Vesalius su ovra sovre la anatomia umana.
Es kuriozo, ke en akea epoka, la teoria de la fizionomia tambien fue rekonosida komo una pura sensia, i en 1586 salio a luz el livro “Sovre la fizionomia umana”, eskrito por Giambattista della Porta.
Bueno, en el interval de la estoria umana, muchos eruditos (en tiempos antiguos), en Ejipto, China i Gresia, tratavan a topar atadijo entre kalidades anatomikas a kalidades umanas, karakter i komportamiento.
De toda manera, la fizionomia se okupa lo mas en razgos fasiales del benadam.
Yo, vo i vengo, bushko en la Biblia si ay algun sinyo por este metodo diagnostiko.
Me parese ke un solo pasuk (en Yeshayahu 3,9), “verifika” en parte la teoria de la fizionomia: “Lo ke se konose de sus karas atestigua kontra eyos; i publikan su pekado komo Sedom, no enkuvren”.
Entonses, me hue a ver ke dize la Kabala sovre este fenomeno. Despues de todo, la Kabala en si trata kon un monton de misterios.
Segun la Kabala, Moshe Rabenu es el padre de la “saviduria de la facha” (“Hohmat aPartsuf”, en ebreo). El komentario mos adresa al pasuk (en Shemot 18,21), en el kual Yitro le konseja a Moshe, su yerno: “I tu veras de todo el puevlo varones de vertud, temerozos del Dio, varones de verdad ke aborresen kovdisia; i pondras a estos sovre eyos por korporales de miles, kaporales de sientos etc.”
Personalmente, a mi, desde siempre apresiava el konsejo de Yitro, i me fasinava este pasuk aun ke utopiko; ma, (al menos segun la Kabala), el pasuk kijo mostrar ke “la kara es el espejo de la alma”.
Entonses, la Kabala entra a muchos detalyos de la kara, ojos, orejas, i de la frente asta la papada.
No vos vo alargar mas, ma si komo empesi kon Moshe, permetedme de konkluir kon una konseja sovre Moshe, ke me avia kontado mi madre en mi chikez:
En la Tora meldamos (i afilu kantamos) ke kuando reusho Moshe a liberar al puevlo de Yisrael de la esklavedad en Ejipto, “oyeron los puevlos, i se estremesieron, dolor aferrava a los moradores de Peleshet,
entonses se atorvaron los kondes de Edom, se desleiaron todos los moradores de Kenaan”.
Avia de ser un rey de Arabia ke fue muy impresionado de la salidura de Yisrael de Aifto, i, naturalmente, el se yeno de admirasion sovre Moshe i las maravias ke izo kon la ayuda del Dio.
Un dia de los dias, yamo el rey al pintor mas famozo de su reinado, le dyo en la mano un tablo de marfil, i le ordeno a viajar al dezierto de Sinay, i azer todo lo posivle de pintar de serka la kara de Moshe, kon grande presizion i fidelidad al orijinal, en kolores naturales.
El rey estuvo bolado de la alegria kuando torno el pintor de su mision i le entrego la pintura de Moshe, la persona ke el rey tan admirava.
El rey no pedrio tiempo, i izo yamar a todos sus savios konsejeros.
El amostro la pintura a los savios i demando ke le digan las kalidades de tala persona. Los eruditos se kedaron kayados i no le dieron ninguna repuesta. Teniyan miedo de revelar sus opiniones.
– “Ke pasa!?” grito el rey.
El konsejero mas viejo tuvo un poko de koraje, i murmureo:
– “Es mala persona”.
– “Arrogante!” disho el segundo.
– “Es azpan, furiozo”
– “Es un imansiz” disho en fin el djoven konsejero.
– “No vos entendesh de nada!” esklamo el rey “Guay de mi reinado ke tiene konsejeros inyorantes! aki en la pintura vesh a Moshe, un grande personaje; el ke salvo a su puevlo de la afriision. Es un kreyente en el Dio, i el Dio lo ayuda en todo por todo!
Los konsejeros no savian ke dezir.
– “Puedeser, ke el pintor no reusho pintar a esta persona admirada”, disho uno.
Ma el pintor insistiya ke su pintura deskrive presizamente la kara de Moshe.
En una desizion espontanea, el rey ordeno ke le preparen su karrosa; i akompanyado kon un grupo de kavayeros, salio al kamino largo a bushkar en el dezierto de Sinay a Moshe, el lider de Yisrael.
El enkontro kon Moshe fue muy amigavle, i el rey no se artava de mirar a la pintura sovre el tablo de marfil ke deskriviya tal i kual la kara de Moshe.
Despues de muchas ezitasiones, el rey le konto a Moshe su diziluzion de sus konsejeros.
– “Puedes estar seguro ke tus konsejeros son savios i derechos, i me dieron de verdad al menk” disho Moshe. “Kuando nasi fui, komo todos los bebes, limpio i puro de pekados. Ma, me engrandesi en el palasio del rey Paro i yo absorbi aya muchas manias negras. Es solo despues de muchos anyos ke desidi, de mi para mi, de luchar kontra el instinkto malo. Me esforsi a enderechar mi karakter, i de azer siempre lo bueno en ojos del Dio i del benadam. Es komo el chiko semen ke se asembra, i kon el tiempo, avagar avagar, krese un arvol grande”.
Kon estas buenas palavras de Moshe i kon su bendision, salyo el rey, alegre i kontente, i torno en paz a su palasio.
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
