KURTA HISTORIA DE LOS DJUDIOS DE TURKIYA por Selim Amado

Kuando se va avlar de los Djudios de Turkiya, ay ke spesifiar ke avlamos de la Turkiya mas o menos en sus frontieras aktualas, las de despues de la fondasyon de la Republika en 1923, I non del Djudaizmo de todo el Imperio Ottomano. Ay ke akodrar ke el imperio se estendio asta la Europa sentrala, inkluyo I al Mediano Oriente kon la peninsula Araba, sin olvidar el Ejipto I la Afrika del Norte.

Ay ke saver tambien ke la komunidad Djuia de Turkiya es una de las mas antiguas del mundo.

Seria yerro de pensar ke todos los Djudios de Turkia ke kon sus grande mayoria avlaron el Ladino desde mas de 500 anios eran desendientes de los expulsados de Espia. En la Anatolia Oriental los Djudios nunka avlaron Ladino.  El estudio de la historia de los Djudios de Turkiya es importante porke puede aklarar munchos puntos sovre la vida de los ekspulsados de Espania a traves 500 anios, sus uzos y kostumbres, nombres de famiya, la relasyon entre diferentes komunidades, enverso el element Turko-Musulmano, y de saver kuala fue la dinamika del enfloresemiento I de la dekadensia de las komunnidades Djudias. A mi punto de vista, saver esta historia  puede explikar el komportamiento del Djudio de Turkia, ke mezmo kuando se alesho de su pays natal y fue a bivir a otro pays, komo en las Amerikas, la Europa o Israel. El ke konose esto no pena a entender porke el Djudio de Turkia en Israel bive su vida, no tiene muncho de dar I aver kon la politika I mezmo la vida publika.

1 – Djudios en Anatolia antes de la epoka Bizantina  (antes del anio 334  D.C)
El profeta Yoel konta ke vendedores de esklavos Phoenisianos vendiyan a los Ionanos de la Anatolia oksidentala esklavos Djudios ke eran (ijos de Yehuda). Josephus Flavus (Yosef Ben Matityahu) konta ke en el 4’en siglo ekzistiyan Djudios en Anatolia, ansi ke en tiempo de la invasion de Alexandro el Grande.  Mezmo en el 3.er siglo antes JC, Antiochus el 3.ero rey de los Seleceutes ordeno de ekspediar 2000 famiyas de Bavel (Irak de oy) a las rejyones de Frigia y Lidia. Philo de Alexandria eskrive ke en las rejyones de Marmara I de la mar preta se enkuentravan komunidades Djudias. Y ansi munchas pruevas historikas ke amostran ke siempre uvo Djudios en la Asia menor. Kuando Yerushalayim fue destruida I su puevlo aroncado (anio 587 A.c) una parte vinyeron a Anatolia, I la Sinagoga de Sardis no Leshos de Izmir y Manisa (350 A.C) es una prueva arkeolojika de la vida Djudia en la region del mar Egeo.  Segun se save, uno de los fundadores del Kristyanizmo era St.Paul ( murio 64-67 D.C), era Shaul a Tarsi (Shaul de Tarsus, al lado de Adana en Turkiya). En el anio 2009 arkeologos Turkos I Israelis deskuvieron las ruinas de una sinagoga ke ekzistio 1500 anios antes serka de Antalya.

2 –La epoka Bizantina   (334-1453 D.C)
El estado Bizantino se fundo en 334 y su rey Konstantin izo de la sivdad Konstantinopolis (Istanbul de oy) la kapitala de su imperio al lugar de Roma, y ansi diviso la Iglesia Kristiana. En los onze siglos de vida de este Imperio, kon la indokrinasyon kristyana, los Djudios tuvyeron una vida dura, penoza y oskura. Es importante de saver lo ke sufrio el Djudio de Anatolia, para entender mas despues pork e la venida de los Turkos Musulmanos fue resivida kon alegria.  Del anio 313 ke Konstantin se konvertyo al Kristyanizmo I kon el toda la populasyon, los Djudios empesaron a ser mal tratados porke refuzavan de konvertirsen. Sinagogas fueron transformadas en Iglesias, Theodosios el II (408-450) deklaro al puevlo Djudio komo (puevlo repugniante y suzio). Justinianus I (527-565) los defendio de estudiar la Mishna y ordeno de melda la Tora en Grego o en Latin. Y kuando los Djudios  se revoltaron kontra la oppression, el emperador Fokas (601-610) ordeno la muerte de todo Djudio ke bive en el imperio. Heraklius su suksesor kontinuo este (genocide) en varios lugares. Justinianus el II (685-695) defendio a los Djudios de banyarsen en el mezmo banio ke los kristyanos, I defendio ke kristiano konsulte medico Djudio.En los siglos 8 I 9 regnaron los reyes Bizantinos ikonoklastes, ke kitaron las statuas I estampas de santos de la iglesia, y el Prof. Galante konta ke visto ke en la relijion Djudia es defendido de orasionar a figuras, los akuzaron a estos reyes Ikonoklastos (ke kijeron  anular pinturas I estatuas en la iglesia) de aver sido enfluensados por los Djudios. Despues de la epoka de los Ikonoklastos kontinuaron las atrosidades enverso los Djudios, insultos y kastigos, segun mos konta Binyamin de Tudela ke vijito Konstantinopolis en 1170.  Savemos ke en este tiempo ekzistiya en Konstantinipolis una komunita Karaita.

Seria importante de dizir ke la kultura Bizantina de los Rpmaniotas ke avlavan el Grego ekzersio su influenza sovre la lingua Espanyola de los Djudios ke arivaran mas tadre de la Espania, M. Franko (Essai, p.23) y A. Galante (Byzance, p.23) dan listas de biervos y nombres ke son de orijin Grega y fueron adoptados al Judeo-Espaniol. Podemos dizir ke del enkuentro entre los Djudios Byzantinos (Romaniotes)  y de los emigrados de Espania-Portugal, y en el ambiente favorable de la politika idulgente de los Sultanes, nasio la kultura briyante ke izo ke asta la fin del siglo XVI. fue el sentro del Djudaizmo mundial.

3 – Djudios en la Epoka pre-Otomana  (la Epoka Seldjukida – siglos 12 -15)
A partir del 11, en siglo, tribas Turkas vinyendo de la Asia I yamados Seldjoukides empesaron a menazar la dominasyon Bizantina y okupar sivdades. Ansi, komunidades Djudias empesaron a pasar a la administrasyon Turka, ke les rekonosyo la libertad de kulto I se komporto muncho mijor ke el Bizantino.

4 –DJUDIOS DURANTE EL IMPERIO OTTOMANO (1299 – 1923 )
A – Desde la Fundasyon (1299) asta la konkuista de Konstantinopolis en 1453.
Kuando empeso la konkuista de la Anatolia por los Turkos, en muchas sivdades ya no eksistiya mas komunidades Djudias, porke desparesyeron o abandonaron sus lugar por kavza de las gerras de los Bizantinos kon los Turkos, o por las sufriensas ke tuvyeron.  Kuando Orhan Bey okupo la svdad de Peruza (Bursa de oy) en 1326, los Djudios boltaron ayi I les fue permetido de fraguar la sinagoga Ets aHayim ke ekziste asta oy. De mezmo, kuando fue okupada la sivdad Adrianopolis (Edirne-en Trakya) en 1365 por Murat I, los Djudios resivieron kon alegria a los Turkos. En rekompensia de sus loyalidad, I por la kompetensia de los Djudios en el komersio, sensia, finansas etc. los Ottomanos akordaron a los Djudios libertad de kulto, I de vida komunala.

Los Djudios de la Evropa Oriental y los Balkanes ke sentiyan el buen komporto Turko enverso los Djudios I ke eyos mezmos sufrian de la administrasyon lokala, empesaron a vinir I instalarsen en sivdades de la Trakya.  En 1421 Murat el II. Paso al trono y kontinuo a engrandeser el estado Ottomano, ansina munchos Djudios de la Evropa  sentrala vinyeron a bivir en el imperio. Es de este tiempo ke vemos ke el medico principal del palasyo era tradisyonalmente Djudio.

5 –Durante el reyno Fatih Sultan Mehmed ( el konkistador) 1451 -1481)
Los Djudios ke bivian en Konstantinopolis ayudaron a los Otomanos en no kolaborando kon los Bizantinos I en apoyando a los Otomanos. Es ansi ke despues de la konkuista de Istanbul en 1453, fue deklarado por un firman imperial, el estatuto privilegiado de los Djudios, libertad de kulto y de vida komunal. El konkistador Fatih Sultan Mehmed II. se rendio kuento de las kapachedades de este elemento ke seria un ekselente remedio para el, para kontrabalansar la komunita kristyana-Bizantina, y ke podria abasteser a la administrasyon los kadros administrativos ke faltavan a la administrasyon Otomana sin eksperiensa. M. Franco (Essai, p.31) eskrive ke Fatih yamo I prometio a los Djudios  «kazas y vinyas y terrenos» . El Rabino Capsaly fue un personaje importante en aprontar el terreno a los Djudios de Evropa y de Espania para ke vengan al Imperio.

Ansi empeso una vida libre y repozada, en kontrasto a las opresyones Bizantinas, y kontrariamente a las sufriensas de los Djudios de Evropa medieval. La libertad de komersio, de ganar I gastar, de la apropriasion de bienes, mezmo de vistimientas, travo a miles Djudios de Evropa al Imperio Ottomano. Estos eran yamados (Eshkenazim), ke mas depues fueron absorbados por la mayoria Judeo-Espaniola. Esta es la orijen de la alkunya (nombre de famiya) Eskenazi, lo mezmo se puede dizir por la alkunya Tsarfati (orijinario de Fransia).

Meldaremos estas linyas del Rabino Yitshak Tsarfati, reportadas por Rozanes (Togarma, tom 1, p.20)

«Ermanos miyos en los payizes de Eshkenaz, siento las sufriensas de los Djudios y las penas insuportavles mas fuertes ke la muerte, la persekusion, el fakto ke son rondjados de sivdad en sivdad. Yo, Yitshak Tsarfati, vuestro emano humble y fidel nasyo y studio en Eshkenaz, malgrado ke mi famiya es de Fransia, fui ovligado de ekspatriarme y vinir a bivir en Togarma. Aki en este pays no falta nada, el Dio penso bien, este pays es en el kamino de la Tierra de vida (santa). Todo el kamino asta ayi es , aparte de 9 mil’es de kamino de mar es todo kamino por tierra. Kada dia ay karavanes ke salen al kamino I el kamino es seguro»

En la fin del 15.en siglo, kuando el Imperio Otomano ya era fuerte I empesava su ekspansion, un enkuentro historiko ekstarordinario izo k eke los Djudios seygan arondjados de la peninsula Iberika en 1492, I ke seygan resividos kon brasos aviertos por los Ottomanos, kon todas las kualidades y kompetensias ke tanto nesesitava el Imperio en akeyos dias.

Ansi es ke el Sultan Beyazit el II.(1481-1512), ke en su tiempo se avyeron las puerts del Imperio a los kuaje 200000 Djudios ekspulsados ( donde los 90000 arivaron a tierras Ottomanas), disho : «Ken dize k eke Ferdinand, rey de Espania es aklarado I intelijente? En arondjando a los Djudios el empovreo su tierra I enrikese a mi pays» .
Los Djudios kemados de la eksperiensa Kristyana akseptaron la invitasyon Ottomana, I vinyeron a bivir en pays Musulmano, sovre baza de la buena eksperiensa ke tuvieron konlos Musulmanos en la Espania medieval.  Konsekuensias historikas favorables, enemigo kristyano I interesos mutuales, estas son las razones prinsipalas de la venida de los Djudios de Espania y Portugal al imperio Ottomano. Ansi fue el empesijo de la vida de los Judios Sefaradis de Turkiya ke kontinuo mas de 5 siglos.

Ay ke akodrar tambien, ke la konkuista de Konstantinopolis por los Turkos en 1453, tiene una importansa historika de muy grande : Los Gregos-Bizantinos se fuyeron de Byzance verso la Evropa, trayeron kon eyos la Litteratura Grega Antigua ke kuaje no era konosida en el oksidente. Mos akodraremos ke en el mesmo anio 1492 salio Kristof Kolomb y dekuvrio a las Amerikas, Encuntos I ansi empeso en la Evropa una nueva epoka de sersias, de artes I de investigasyon, ke metyo fin a la epoka medieval. Esta epoka se yamo «La Renaissance».

SIGLO 16 , la epoka briyante del Djudaismo de Turkiya
La okupasyon de Erets Israel – ke estava en dominasyon Memlukida- por el Sultan Selim II. fue en 1517, I la dominasyon Ottomana kontinuo 400 anios. Munchos Djudios resivieron kon alegria a los Ottomanos despues ke sintiyan sus buen komporto kon los ekspulsados de Espania I Portugal. I en verdad, la dominasyon Ottomana avrio una nueva epoka en la historia de Erets Israel.

Los Djudios sefarad’s son los ke trusheron la kultura Evropea, la imprimeria  (los Soncino, los Nachmias).

Los sultanes kontinuaron a okupar sivdades en la Europa,I empesaron a vinir de estos lugares Djudios, de Romania, de la Hungaria, de la Chekia, etc/ Estos Eshkenazim ke vinyeron kontinuaron a avlar Yiddish.

Munchos Djudios servieron en el servisio del governo, komo medikos (Amon) ombres de finansas, politikos ( Gracia Mendes, Don Yosef Nassi ).

Kuando le tradusieron al Sultan Selim la orasyon de (Alenu leshabeah) el disho (kuando ay una orasyon semejante tanto ermoza, no se kere otras orasyones). Dona Gracia era la finansera del Sultan Suleyman el II (donde la madre era Djudia) i Ke fraguo las forteresas (homot) de Yerushalayim. Dona Gracia ke era une conversa ke bolto al Djudaismo fundio yeshivot en Istanbul, en Salonika, en Tveria. Ayudo a Djudios de Evropa  de boltar al Djudaismo. Don Yosef Nassi se izo remarkar en los echos estranjeros del Imperio Ottomano I fue rekompensado kon el titolo ( El Dukas de Naksos). El es ke fraguo la sivdad de Tveria kon el ayudo de Dona Gracia, I kon el eskopo de estabileser una autonomia Djudia para los Djudios de Evropa, ma malorozamente los Djudios le repondieron kon indiferensia, I este primo sionisto no pudo reushir. Shlomo Aben Yaesh era un konverso de Portugal ( su nombre marano era Alvaro Mendez) ke bivyo en Salonika I servio  a los Sultanes en la politika eksteriora, el es el ke reusho a azer firmar un pakto entre el Sultan I la Reyna Elizabeth de Ingletierrea

Kere dizir ke en el tiempo de dezvelopamiento I enfloresimiento los Ottomanos se sirvieron muy bien de la imigrasyon Sefaradita al imperio, en las finansas I servisio eksterior.

Las sivdades importantes en el siglo 16 eran, Tsfat onde bivyo el Rav Yosef Karo ke eskrivio el Shulhan Aruh, ke era nasido en Toledo I vino a Tsfat despues de bivir en Istanbul, Edirne I Salonika. Tsfat fue el sentro de la Kabala. La ovra del Rebi Yosef Karo sirvio de guida para los Djudios no emporta ande bivian. Salonika fue sentro de la kultura Djudia I un sentro komersial I industrial por ser un Puerto importante.

Kuando a Izmir, esta sivdad se dezvelopo solo en el siglo 17, kon el dezvelopamiento de su Puerto.

La vida de los Djudios de Turkia en el siglo 16 : Uvo kavzos de la kalomnia ritual de parte de los kristyanos. Ma el Sultan kastigo a los Kristyanos. Sultan Mehmet el III. (1595-1603) deklaro un firman special  kontra las kalomnias enverso Djudios, I asiguro libertad de kulto a todos los non muzulmanos (gayri muslim).

SIGLO 17 –
Durante el reyno de Ahmed I (1603-1617) empeso la dekadensia en la situasion de los Djudios de Turkia por konsekuensia de los embrolios politikos I ekonomikos del Imperio. La pozisyon I el prestijio de los Djudios kayo sovretodo despues de la aparisyon del mashiah falso Shabtai Zvi.

Porke pudo salir un Shabtay Zvi, Rav Nasido en Izmir (1626—1676), I atirar la atension I mezmo la kreensia en el entre los Djudios? I no solo entre Djudios. En este siglo, las sufriensia de los Djudios de Europa, pogromes, epidemias, fuegos, derokamientos, esto izo despertar un mistisizmo ke trayiya la esperansa ke va vinir el mashiah I les va traer el salvamiento, la geula del puevlo Djudio.  Los falsos meshihim fueron djente ke eyos mezmos se kreeron ke fueron embiados para salvar a los Djudios.

En el siglo 16 uvo 2 mistikanes, David Reuveni y Shlomo Molho.  Siempre kon la pretension de traer la Geula a los Djudios. En el siglo 17 vino Shabtai Tzvi, ke se embezo en la yeshiva de un rav muy famozo en Izmir, el Rav Eskapa. El espesialisto sovre Shabtai Zvi, el Prof. Gershon Sholem dize ke S.Z era una persona no muy ekilibrada del punto de vista mental, sufriendo de Psikoza Mania Depressiva. S.Z deklaro ke el es el mashiah Sovretodo despues del masakr de los Djudios de Polonia en 1648 ( tevah Knielnitzky) y munchas tragedias entre los Djudios. Los Rabanim de Izmir no akseptando sus pretensions izyeron ke seyga arondjado de Izmir en 1650,  ma uvo munchos, mezmo entre los rabanim ke se krereron en el. La komunidad Djudia se divizo. El Sadrazam (grand vizir) Koprulu Mehmet Pasha lo kastigo por aver trublado la vida de los Djudios, en primero enprezado en Chanakkale, I despues, viendo ke esto no abasto, fue yamado  a Edirne por el sultan Mehmed IV, ayi fue ovligado a konvertirse al Islam, en tomando el nombre Kapicibasi Mehmed effendi en el anio 1666.   Las 300 famiyas ke se konvertieron kon el son la baza de la sekta de los Donmes (los maaminim), ke ayinda preokupan la opinion publika de Turkia. Eyos kontinuaron a avlar Ladino, orasyonar en ebreo I Ladino, mostrarsen Musulmanos exteriormente I guadrar munchas leyes djudias, kon siertos trokamientos I en guadrando munchas tradisyones en sekreto.

SIGLO 18 –
Kuando la Europa se prepara a la Revolusyon Franseza vemos ke los Djudios de Turkia estan kayidos en una oskuridad sosiala I politika. Los desendientes de los ekspulsados de Espania no son los mezmos: eyos ya konsumieron todas las kapachedades I la kultura  ke tenian kuando sus padres vinyeron de Espania I Portugal . Eyos no se embezaron mas el Ivrit I empesaron a no entender lo ke meldan en las tefilot. El nivel de edukasyon abasho muncho. Los Djudios en el servisyo del governo se apokaron I sus influensia desparesyo. De otra parte, empesaron a pujar los firmanes imperiales kontra los djudios ( komo, defendido de morar en siertos lugares, vestirsen de una sierta manera, etc).

Napoleon okupo el Ejipto (1798-1800) I arivo asta Yerushalayim I Ako.  Los Djudios de Erets Israel no lo kijeron I apoyaron a los Ottomanos.

El schizmo (el pilig) ke kavzo Shabetay Zvi kavzo una passividad muy grave  en las komunidades, pedrieron ayinda mas sus orientasion I sus nivel de savedoria. Ansi ke salio un Rav yamado Yaacov Huli ke empeso qa eskrivir el komentario de los livros sagrados en Ladino, para ke lo entiendan, I lo yamo «Meam Loez», este livro oy sierve komo dokumento de historia I de linguistika del Judeo Espaniol. Rav Yaacov Huli (1689-1732)  imprimo sus livros en Istanbul, I es savido komo el ke trusho el despertamiento kultural I spiritual entre las komunidades djudias de Turkiya. (Meam Loez fue eskrito en Ladino I es un manadero de de leyendas, kuentos de morala djuntos lon la eksplikasyon dela Tora, Neviim, Ktuvim. Huli dize » Kije eskrivir esto todo en Ladino de la manera la mas klara I simple para ke todos lo entiendan). Su ovra fue kontinuada por otros. El Rav Avraham Asa  tradusyo en el siglo 18 en Istanbul el Shulhan Aruh I otras eskriturias santas al Ladino.

SIGLO – 19
Este siglo es una epoka de aserkamiento al oksidente.
Despues de un largo tiempo de nivel basho kultural empesa una epoka de despertamiento del Djudaismo de Turkia. Empesan los esfuersos de adaptar metodes de edukasyon evropeos se empesan a avrir eskolas modernas. Esto no fue fasil, por kavzo de la opozisyon de rabanim a todo lo ke no era segun sus manera de pensar. Tenian el miedo ke la kultura evropea kavzara la asimilasyon I traera al kristyanizmo.

En este siglo empeso una konkurensia kol la komunidad de los Ermenis, porke munchos komersantes o artizanos Djudios perdieron sus superioridad I los Ermenis avansaron no solo en el komersio y komo artizanales, ma reushiyan  en la politika I postos ofisiales.

En 1830 el banker Avraham de Kamondo (el Rotchild del oriente)era prezidente de la komunidad Djudia de Istanbul. El  logro y apoyo para la avyertura en 1853 de una eskola ke va ensenyar en Fransez, Ivrit I Turko. Los rabinos Akriche, Kimhi pretendieron ke lo ke aze Kamondo va kavzar la kristianizasyon de los ijikos Djudios, Akriche anunsio (Herem) a Kamondo I munchos Djudios tomaron a sus ijikos de esta eskola. Kamondo se kesho de Akriche al governo, el Sultan izo ke Akriche seyga arestado, este eskandalo vino a su fin kuando el Rav Akriche anulo el herem I ansi fue liberado de la prezyon.

En 1875 el Baron Hirsch vijito Istanbul. Kuando vido ke nivel basho teniyan los Djudios de Turkiya, I la miseria de munchos por kavza de sus ignorensia, se avrieron eskolas de la Alliance Israelite Universelle, ond empesaron a enbezar miles de jovenes Djudios.

Empeso a ser publikado el primer Jurnal (el Tiempo) en Ladino, naturalmente kon karakteres Raschi I titolos en Meruba, ansi ke  jurmales humoristikos komo (El Djugeton, el Burlon).  Oy komo savemos se publika solo el Jurnal Shalom kon su (musaf) el Amaneser en Ladino.

El Sultan Abdulmedjid avrio las puertas de la fakulta de Medisina a los Djudios I empesaron a estudiar ayi 17 ke despues de munchos anios se formaron medikos Djudios en Turkiya.

Nisim Behar era el primer director de la Alliance.  Yosef Levi (de Edirne) kontribuo muncho la edukasion entre los Djudios, ma los relijiozos lo akuzavan de ser misyonario. El fue elprimo Djudio ke vijito a los Falashmura I Djudios de Etiopia.
El Rav Palachi (1788-1865) fue un Rabino muy famozo ke eskrivio 72 livros ke tratavan de la salud I organizo donasiones para Erets Israel. Sus pletos kon los dirijentes laikes de Izmir son famozos.

SIGLO – 20
En este siglo el Imperio Ottomano empesa a desintegrarse. En los konfliktos ke empesaron entre los Ottomanos I los Bulgaros, los Gregos. ke kerian sus independensia, los Djudios no se identifikaron kon eyos I apoyaron a los Ottomanes. Mezmo enverso los esforsos Sionistos para obtener una autonomia Djudia en Erets Israel, los Djudios de Turkia estuvienon bastante passivos, en los primeros anios del siglo lo resivieron en Istanbul a Theodor Herzl solo komo musafir de Evropa I no komo un lider ke logra para la independensia Djudia, no le dieron sus apoyo enfrente del Sultan. Lo ke mostra ke siempre el Djudio de Turkia prefero de no pedrer su repozo.

En los anios de la primera Guerra Mundial, kuando se anunsio la ovligasion de servisio military y obligatorio y para los Djudios, munchos empesarsona irsen de Turkiya, a la Europa, al Egypto, a las Amerikas. Ansi empeso la emigrasyon de los de Turkia, se mas de 250000 al nivel de oy, solo 18000.

Despues de la gerra de liberasyon ke dieron los Turkos I ke ansi el imperio serro su epoka en la historia I de fundo la republika en 1923, kon el tratado de Lausanne, los Djudios de Turkia –kontrariamente a los Gregos I Ermenis, preferaron de identifiarsen kompletamente kon la republika, deklararon ke eyos no keren los derechos de las minoridades I a las soditanzas Europeas ke eyos podian tener en kontinuasion de los derechos ke les akordavan las kapitulasiones del Imperio.
Despues ke la Republika se anunsio komo Laik (no komo musulmana), kon el prinsipio de separasyon del estado I de la religion, empeso el governo turko a akseptar leyes anti relijiozas, ke tuvieron para los Djudios las konsiguentas muy seriozas en los anios ke vinyeron : defendido de ensenyar el Ebreo en las eskolas Djudias (aparte de pokas oras de relijion), leyes non-eskritas defendian a los non muzulmanos de tener postos publikos , governamentales I militares. Malgrado esto los Djudios avansaron en otros kampos, komo komersio, industria, I bivieron una vida relativamente mas repozada ekomparasion kon los Djudios de Evropa ke empesaron a sufriir del nazismo.

Esto troko kuando se aserkava la segunda Guerra mundial : la influensia nazista metyo fin a la Buena vida ke tuvieron los Djudios de Turkiya desde 1299.

La Turkiya era neutral (en prinsipio) en la segurra Guerra mundiala (1939-45). Ma sintyo el menester de taparles la boka de los Almanes nazistas, kon leyes I praktikas anti djudias muy serias.

En 1933 – la kampania de (Vatandas Turkce konus) –ovligasion de avlar en turko solo I de trokar nombres de famiya en nombres Turkos. Vandalizmo en las sivdades de Trakia ke ovligo a munchos de fuyirsen de sus sivdades para Istanbul, I una partda a israel. En 142 el famozo Varlik Vergisi (dasio sovre la fortuna) ke ruino ekonomikamente a las minoridades, I sovretodo a los Djudios. Las 20 klasas ke fueron tomadas a la armada (kuando en realidad era para romper pierras en kampos komo Ashkale) I destruir ekonomikamente a los Djudios. Djudios kedaron sin kaza, sin muebles , sin esperansa. I komo es savido, munchos Djudios perdieron la esperansa en el avenir, I sus reaksion fue la Aliya : Kuaje 70 por sien de los Djudios de Turkiya izyeron aliya a Israel empesando de 1947-48. Oy biven en Israel kuaje 100000 Djudios orijinarios de Turkia, eyos o sus ijos.

Los trokamientos sosiales I ekonomikos ke uvieron en Turkia despues la segunda Guerra mundial, asta 1948, influensaron de una manera muy importante la vida de los Djudios.

Djudios empesaron a abandonar kartieres o sivdades, I eskolas, sinagogas, orfelinatos fueron ovligados de serrar.

Segun la ley Turka, no es possible de ser organizados al nivel nasyonal komo komunidad relijioza. Esto no es una ley anti Djudia sino ke ley de empidir organizasion a baza de relijion. Kuando una komunidad Sali I se va de una sivdad, I no keda ayi mas Djudios, komo Tirya, Milas, Edirne,Silivri, Corlu, Kirklareli, Bergama, Turgutlu, Manisa etc.  I no ay mas keila, las propriedades de esta komunidad salen de apartenir a los Djudios I no pueden pasar ala proprieded del Gran Rabinato, I ansi el Vakif se apatrona de todo. I ansi fue.  Todo lo ke se pudo azer es de demander ke la sinagoga de Edirne seyga restorada I se aga muzeon. Lo ke no reusho. Todo el resto en otras lokalidades fue perdido.

Oy en Turkiya ekzisten maksimum 18000 Djudios, donde 1400 en Izmir, I pokos en Bursa, Ankara I Adana. El Ladino no es kuaje mas avlado. La situasyon sosyo ekonomika no es homojena, ay rikos, munchos de situasion mediana I siertos ke tienen menester de ser ayudados. Munchos edifisios, sinagogas, hospitales, eskolas se serraron. Ay solo un liseo en Istanbul. El Ladino kuaje ke no se avla, munchos kazamientos mikstos. Poko intereso a las rayizes de parte de los jovenes.
Esperaremos ke esta komunidad continue a ekzistir.

Selim AMADO
Salon del Ladino – 6/12/2010
Files de Ladinokomunita