eSefarad Noticias del Mundo Sefaradi
KASHKARIKAS DE LA VIDA
Una tadre debasho de un arvoliko estavan un manseviko i una ermoza i nikochera mujer echando lashon.
El masevo disho: Las kashkarikas de la fruta no son sierkol, son bendichas i presiozas, mos protejen en la vida. Siempre ay de verlas por los dos lados, por aryentro i por afuera, Para algunos son sierkol, para otros, komida en su vida.
Penserioza eya disho: Koza semejante afita kon el ombre. Tienes razon.
El mansevo kontinuo: kashkarikas de banana resvalan ma al kayer en basho ay dos posivilitas: kayer i tener dolor o puede uno kayer en brasos de una mujer komo ti.
Rieron i kontinuo el mansevo:
Kashkarikas de anana ke sirven para azer agua de buena savor. Kashkarikas de portokal no se dezechan, se aparejan kon asukar i avagar avagar, se le kita la amargura i se aze dulzuria.
Kaskarikas de kalavasa se gizan en una buena sos de tomat i toman una buena savor.
Kaskarikas de mansana ayudan kuando uno esta kon salud delikada i se beven en un buen chay kon kanela. Kaskarikas de kanela, solo golor bueno toparemos en eya.
Kaskarikas de sheftali o kayisis mos la komemos i sus kueshkos en sentro al kevrarlos una almendra toparemos.
Eya disho: El Dio ke todo lo krea, eskonde una divinidad en kosas ke ay aryentro i ke no alkansamos a ver.
Ma muestro puerpo tambien es una kashka ke kuvre muestra alma, muestro interior.
Mos sintimos komo un benadam independiente ma somos una parte del Dio eskondida aryentro de muestro puerpo.
El mansevo se alevanto para irse i eya disho: No te espantes, solo son ideas. Ma el se fuyo.
Sano i rezyo ke estes!, le grito.
Clara Palatchi de Selechnik
2025
