eSefarad Noticias del Mundo Sefaradi
Karen Gerson, Direktora del Sentro de Investigasiones Sefaradi-Otomanas en Estambol, fue meresida a resivir el premio «Chevalier dans l’ordre des Arts et des Lettres de la Republique Française», ke muy raramente se da a alguna persona afuera de Fransia.
I siguro munchos pensimos: si, Karen merese toda manera de onor por lo ke izo, i kontinua azer, por muestra kultura. Ma ¿deke les enteresa esto en Fransia?
Yo ya savia la razon, ma la topamos tambien en un artikolo en el periodiko Salom, en turko (ir al artikolo >>) ande la entrevistaron a Karen, i yo vos tradusi lo ke eya konto:
«Judeo-Espanyol es akseptado komo una de las lenguas avladas en Fransia. Todas las lenguas avladas en las tierras fransezas, inkluyendo tambien la lengua de sodros, se yaman «Les Langues de France» (Lenguas de Fransia.).
Siguro ke no komo linguas ofisialas, ma podemos dizir komo linguas ofisialmente akseptadas ke se avlan en el paiz.
El enverano pasado me avia ido a Paris para azer investigasion en los arshivos de la Alliance ?sraelite Universelle, i ayi tuvimos una reunion kon djente komo Jean Carasso (La Lettre Sepharade), Jenny Laneurie (Aki Estamos) i otras personas i organizasiones ke se enteresan de serka kon la kultura Sefaradi. Akeya noche avia reprezentantes del Ministerio de Kultura Franseza, ke kijeron tomar enformasiones sovre muestro Sentro [Sefaradi] en Estambol.
Les konti de los projektos ke estamos aziendo, i de El Amaneser ke kitamos komo suplemento mensual del Salom, i les di egzemplares de El Amaneser. Es muevo ke supe ke akeya noche los ke estavan ayi dieron mi nombre al Ministerio de Kultura komo kandidata a este premio. I es muevo ke supe ke el Ministerio de Kultura Franseza publiko su desizion ofisialmente el 4 Avril, 2011.»
Tambien de este artikolo mos ambezamos ke la Espanya, averguensada ke la Fransia lo izo en primero, pensa a onorar a Karen kon un premio semejante! No ay ken lo merese mas ke Karen.
Esperamos el haber bueno!
Rachel Amado Bortnick
Dallas, Texas
Para Ladinokomunita
