eSefarad Noticias del Mundo Sefaradi
Meldar todos los artíkolos de esta seksión
El retorno de Djoha
Djoha el misken i la aspida de su mujer
Djoha era kazado kon una mujer muy tabiyatli.
Todo loke el aziya para eya no era bueno.
Si vinia del charshi djusto a la kaza eya le dizia: «Ke minder-beg del marido ke tengo, asentando ‘nel minder – nada no va salir de el».
Si se kedava ‘nel charshi eya dizia: «Tanta sihora ke me dates, te sto esperando – I tu? Ni vienes ni mandas haberes. El Dio me va ayudar – i un dia no vaz a tornar. Me sikliyare una vez para siempre – i skapimos.
Kvando venia a la kaza kon los zembiyes yenos de zerzevates le dizia: Vaka soy? Loke soy? I la karne onde sta?
Si le trushia la karne le dizia: Atavanado, gastador, kvalo te parese – Shabat ez oy?
El bueno de muestro Djoha entendio ke komo no seya eya va a gritar, ansina ke desho de eskucharla i de tomar al korason.
Kvando eya, la aspida, entendio ke el mas no se sta sikliando por sus keshas i maldisiones – empeso a maltratarlo en otras maneras.
A vezes le dizia ke lave el servisio, i kvando el skapava kon lavoro eya lo suziava de muevo i le dizia: «Ayde Djoha no se bive solamente oy, ayde lava el servisio».
I Djoha somportava i somportava – ama un diya kvando la mujer le disho ke se echa en kvatro pies porke la tahta del tekne para lavar la ropa se le rompio – i eya kere meter el tekne sovre su espalda, la pasensia del Djoha s’akavo – i el se fuyo de la kaza.
Andando por el diziarto topo dos amigos ke kaminavan djunto. Les dimando si se puede adjuntar kon eyos. Le disheron: «Mozotros non tenemos nada en este mundo afuera de una dova ke la savemos – i kada dia uno de mozotros dize esta dova – i la komida moz kaye de los sielos. Si saves esta dova puedes ir kon mozotros».
«Bueno» – les disho Djoha – «ya la se».
Primer dia le dizen a Djoha: «Ayde, hanum, diga la dova – porke keremos komer».
Les respondio: «Oy ke diga uno de vozotros – i manyana la digo yo».
Uno de los amigos se mitio a dizir dova – i en dos-tres puntos ya basho de los sielos un sini yeno de komidas i frutas. Djoha se kedo kon la boka avierta. Komieron, bindisheron i se mitieron al kamino.
Otro dia le dizen de muevo: «Ayde, kuzum, ez tu torno para dizir la dova».
Les disho: «Oy ke diga el segundo amigo – i yo vo dizir manyana».
Ki seya! – le disheron. El sigundo amigo se metio a dizir la dova, i Djoha sta mirando para ver si podra meldarle las palavras de la dova de los lavios. Ama, kon unas kvantas palavras este skapo – i de muevo basho de los sielos un sini yeno de todo.
Treser dia, non tuviendo otro rimedio, se metio el bueno de muestro Djoha a dizir la dova. – Ama komo no savia el teksto segreto de akeya dova spesial, el empeso ansina:
«Sinyor del mundo, esta dova ke la stan diziendo estos dos – ni la se, ni la supi. Ama komo ke Tu sos muestro Padre Rahaman – mira esta tefila miya komo si fue loke stan diziendo eyos, toma mi niyet komo si era suyo – i azmos bondad para non pedrermos yo i esta djente.»
En akel momento basharon de los sielos tres sinis – uno kon komidas gizadas, otro kon las frutas i treser kon todo tipo de dulsura. I non solamente esto – sino ke kayo tambien un ibrik para ke podran lavar las manos i los pies, i un peshkir para poder enshugarsen – i al kavo lez kayo un djezve de kave i tres nargilas.
Los dos amigos se maraviaron muncho – ama el mas maraviyado era Djoha.
Manyana les dimando a sus amigos komo ez la dova ke eyos stan diziendo, i les disho: «Vitesh ke yo tambien me la se – i ez solamente ke kero saver si ay alguna diferensia entre loke digo yo i loke stash diziendo vozotros».
Le disheron: «Mozotros stamos diziendo ansina:
Patron del Mundo,
por zahu d’akel Djoha,
ke tanto sufre de la mano
de su mujer la aspida –
demos vino i komida,
i alarga a muestra vida.»
Entendiendo solamente agora loke dizen la djente ke El kamino al Gan Eden esta basho de los pies de la mujer, Djoha torno a kaza, se metio en kvatro – i le disho a la balabaya: «Ayde, buena mujer, tray el tekne – i no me detengas de mis zehuyot».
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
