eSefarad Noticias del Mundo Sefaradi
“Kaminos de leche i miel”
Selevrando la Djornada Evropea de la Kultura Djudía en Madrid,
Centro Ruso de Ciencia y Cultura, 14 de Septiembre, 2016
Por prima bez las kulturas ashkenasí-sefardí en un esmoviente akto komún en Madrid
Rebeca Gini i Marcos Gini, mis avuelos maternos
En el Centro Ruso de Cultura y Ciencia de Madrid bivimos una nochada muy esmoviente selevrando la Djornada Evropea de la Kultura Djudía en Madrid, el pazado 14 de Septiembre, dientro de las munchas aktividades aparejadas en esta sivdad kerida de Sefarad, ansí komo en munchas sivdades de Evropa i del mundo por entero ke se aúnan a esta selevrasión.
Lo mijor de adjuntar a tres djenerasiones, komo semos mozós, avuela (Matilda Barnatán) madre (una servidora), ijo,(Darío Meta) de una famyia sefardí kon orijin en Grecia, por parte de mi madre, i ansimezmo en Alepo, Siria, por la parte de mi kerido padre, Elías Barnatán.
En esta okasión prezentamos muevo proyekto ke ansina prinsipia un kamino luminoso, kon diferentes rolos de la kultura destakando siempre el kerido Patrimonio Sefardí.
Darío Meta, pianista ke eskapó sus estudios de piano en el Conservatorio Superior de Castilla y León en Salamanca, kon matríkula de onor en piano, i ke agora reushó la prestijiosa beka de la Fundación Humboldt para múzikos, se topa oy día biviendo su máster en piano en la sivdad almana de Lübeck.
Darío se esforzó por kolavorar en este resital dunke se topava aparejando su viaje a Alemania, kon sus diversas aktividades de un múziko de su nivel, komo el último konsierto onde partajó en la Real Academia de Bellas Artes de San Fernando en Madrid, él fue musafir kon el buto de meter el broche d’oro a un ermozo Konsierto de talentosos mansevos pianistas yamado “Generasiones”, aparejado por la Fundación Più Mosso, ke se dedika a dar a konoser a los mansevos múzikos profesionales.
Darío mos dió el plazer una bez más de partajar shenario kon mozotras, destakó kon los akompanyamientos muzikales de muestro resital, ofresiendo una ovra de Johannes Brhams (Balada Op. 10 nº 1).
Darío Meta
Un resital muy espesial dunke por prima bez en Madrid, i puede ser en Sefarad, se adjuntaron las dos grandes kulturas del djudaísmo en una aktividad kondjunta ke permitió a la sala yena por entero de djentes ke se aserkaron al Centro Ruso de Ciencia y Cultura de Madrid konoser i munchos aondar en estas dos grandes kulturas ke se dieron ansina la mano, entre palavras, poesía i múzika, una nochada para no ulvidar partajada kon aplausos ke prinsipió en la prima parte kon una ancha i importante ekspozisión del profesor Ángel Luis Encinas Moral, entre munchos rolos katedrático de la Universidad Complutense de Madrid, profesor de ruso i de istoria rusa, mos adentró en el universo del gran eskritor i dramaturgo Sholem Aleijem, a la okasión de konmemorar el sentenario del aniversario de su muerte (1916).
Vida i chikez de Sholem Aleijem
Kon fotós desde su chikez amostrando un desvelopamiento i trayektoria de su ancha vida i sus más importantes ovras, destakando komo savemos, su ovra prima, ke lo tornó afamado en el mundo por entero yamada “El violinista sobre el tejado”, ansí kon las eksplikasiones el Profesor Ángel Luis Encinas mos yevó a konoser a un dramaturgo desde sus primos pasos en las letras, en un viaje asta el korasón de Sholem Aleijem, konosiendo munchos aspektos de su chikez, mansevez i de su vida tan atirante.
En la sigunda parte yegó la poesía en lingua djudeo-espanyola, kon la interpretasión i la magnífika múzika ke tuvimos la chanse de poder kontar, komo ya dishe, kon Darío Meta i ese talento ke destaka desde su chikez, kuronado por ese ermozo piano blanko.
Ansí las dos grandes kulturas se adjuntaron para un viaje poétiko onde las palavars kovraron alas para yevar al púvliko al lugar de los esfuenyos, kon poesías ke mos permetieron tornar estos kaminos de leche i miel asta los lugares más eskondidos de la memoria de muestra famyia, de muestros antepasados, a kenes devemos gran parte de muestro saver i tradisión oral sefardí, rekodrando siempre la figura de mi bisavuela, avuela materna de mi madre, Meryam Codron Alalouf, de ken ambezimos kantes i todo modo de dichas, tradisiones, kumidas i savores de muestra rika kultura.
Las tres djenerasiones en el shenario
Todo esto se bivió kon el korasón alegre entre palavras de muestra lingua i poesías ke pudieron amostrar ke estas dos grandes ramas del arvolé de vida de la kultura djudía pueden konbivir en este presente.
Alas para un proyekto muevo, kon muevos kaminos, sobre eskritura, kursos, gastronomía i kuzina, espiritualidad, poesía, múzika, resitales i teatro, edisiones de libros i más proyektos ke verán si el D’ lo kere la lus poko a poko, komo kuando amanese i vemos yegar el sol ke asoma en la ventana de muestra vida.
Es por esto ke dezeamos partajar kon todas las sivdades del mundo por entero, mos topamos aviertos a poder amostrar estos kaminos de leche i miel a todo lugar onde muestra kultura kera bolar.
Ansí prinsipiamos estos kaminos ke ya kontinuarán presto kon más aktividades konservando los kantes, tradisiones i rekodrando muestro laboro en Radio Exterior de España, en la kerida Emisión Sefarad, ke esta anyada kumple su XXX Aniversario, komo savesh, rengrasiando a todos los Amigos, oyentes i profesionales ke partajan radio i bivensias kon mozós, ansí entre unos i unotros mos azemos más rikos i más savios.
Darío, Rajel, Matilda
Muestros programas pueden sintirse en la web de la Radio Nacional de España (www.rtve.es) entrando en “A la Carta”, i metiendo el nomvre del programa, “Emisión en sefardí” i kada día de lunes a viernes mos pueden sintir en direkto por Radio Exterior de España, a las 07:15 hs (ora peninsular) o dempués en muestros podcast, ansimezmo desde ase munchos anyos kreamos el espasio “Luz de Sefarad”, en Radio 5, Todo Noticias, ke son programas de muestra kultura kada shabat a las 20:30 oras, (gravado días anteriores siempre) en siendo muestro djudeo-espanyol la únika sola lingua indemás de la lingua española en todo Radio 5. Luz de Sefarad es el mezmo nomvre ke metimos a muestra Asosiasión ke konta kon el laboro de difundir muestra kultura en todo modo de enkontros muzikales, konferensias, kursos i tayeres, desde aki vos azemos musafires a partajar en muestras aktividades diversas kon el buto de adjuntar el esforzo i poder ansí dar más vida a muestro kerido Patrimonio Sefardí, gran trezoro de Sefarad i del mundo por entero.
Prinsipiamos aventura, kontinuamos los kaminos para tornar a la memoria
“Kaminos de leche i miel”
UNOS KAMINOS KE KADA’L DÍA SAVEN MIJOR
Viviana Rajel Barnatán Gini
Tuve el placer y el privilégio de asistir a la Celebracion de esa jornada europea de la cultura judia, al que previamente habia sido gentilmente invitado por Viviana Rajel …
Alli pude saludarla de nuevo, al igual que a Matilda y a Dario, ademas de disfrutar de un magnifico recital de poesias y canticos, a cargos de ámbas, con el esplendido acompañamiento musical de Dario al piano …
Fue aquella una jornada para recordar, Y que por largo tiempo perdurará en mi memoria y mi corazon …
La presencia masiva de público, contribuyó a resaltar aún mas si cabe el ácto, y el posterior encuentro entre los alli presentes, sirvió de colofon al mismo …
No quisiera concluir este comentario, sin poner de relieve, la simpatia, calidad humana y sencillez, que en todo momento prodigaron a los alli presente, los tres protagonistas de aquella funccion; Matilda, Viviana Rajel y Dario, hacia los cuales vá en esta hora una vez mas, mis sentimientos de aprecio y gratitud infinitos ..