eSefarad Noticias del Mundo Sefaradi
El mondialmente renomado Prof. Isaak Jack Levy z”l izo la donasyon en vida de su biblioteka i su archivo los kualos son un verdadero tresoro para mozotros i para las jenerasyones futuras, al Instituto Salti. Livros, publikasyones, manuskritos i mas mos estan parviniendo en los dias vinideros, para ajuntarsen a los livros ke resivimos de su parte en vida (2018). Mos azemos un dover de rengrasiarlo por su konviksyon ke el futuro de la egzistensya sefaradi i de su idioma es en Israel . Los miembros akademikos del Instituto Salti no se olvidaran de su asistensya kada ves ke el fue solisitado. Munchas grasias a su famiya i partikularmente a su espoza Profa. Rosemary Zumwalt Levy.
El Prof. Isaak Jack Levy nasyo en Rodes en el anyo 1928 i emigro kon su famiya a los Estados Unidos en 1945, despues de los anyos terivles de la Sigunda Gerra Mondiala pasados en Tanger en Afrika del Norte. El estudyo en la Universidad de Iowa i en la Universidad de Michigan i ansenyo komo profesor en la Universidad del Sud Karolayna de onde salyo a la pensya.
EL Prof. Levy dediko su vida a investigar i a eskrivir sovre los sefaradim, su puevlo. El fue el pionero en el kampo de la poezía sovre la katastrofa del Olokosto, el primer a trezladar al inglez poemas eskritas en ladino durante i despues de la Shoa en su livro And the World Stood Silent: Sepharadic Poetry of the Holocaust (University of Illinois Press,1989;2000). El fue asistado por su mujer la investigadora Rosemary Zumwalt Levy ke lo ayudo a formar la rika biblioteka i sus archivos ke eredimos en el Instituto Salti al seno de la Universidad Bar Ilan.
Ademas el Prof. Levy eskrivyo munchos artikolos juntos kon Rosemary Levy Zumwalt ke fueron publikados en el Journal of American Folklore sovre los refranes sefaradis uzados dainda en la vida kontemporarya.
En memorya del Prof. Levy z”l una plaka sera ponida en la biblioteka del Instituto.
Kon karinyo
Dr. Selim Salti, Prof. Shmuel Refael, Profa. Ora Schwarzwald, Dr. Dov Kohen, Dra. Susy Gruss, Dra Nivi Gomel, Dra Silvina Gasser.
