eSefarad Noticias del Mundo Sefaradi
Keridos amigos i amigas
Mos topamos en un «Festival de Seniors» i el Jewish News mos prezenta un artikolo sovre la prezervasión de la memoria en viejesiendo. Un otro artikolo avla del benefisio de los viajes.
[Djusto oy entro en mis 81 anyos. Mi memoria es fuerte grasias al diario ke mantengo por la vida. Me ayuda a komparar kada époka de mi vida i las sirkunstansias ke existian. Los viajes me guardaron djoven. Me ayudaron a aprender kozas ke no se aprendi en la eskola. Fueron la mejor medisina también.]Saludes a todos
——————————————————————————-
GUARDAR LA MEMORIA EN LA VEJES
Según la Eskola Medikal de Harward, la manera ke se bive, lo ke se kome i se beve i komo se trata el kuerpo, pueden afektar la memoria.Aki tenemos una lista de sinko puntos importantes.
1] Kontrolar el nivel del «stress». Presiones de lavoro, argumentos etc tienen un efekto en la kapasidad de uno.Un problema mas grande es la ansiedad ke toka a la memoria.La manera de protejirse kontra el stress es de respirar bueno, meditar i azer yoga.
2] Es nesesario de dirmir bueno. Ayuda a la memoria.La insomnia i las kuras ke se toman afektan al meoyo.Mas vale mejorar el suenyo ke de tomar kuras.
3] Si fumas, ay ke desharlo.En fumando se pierde mas ke la memoria en la vejes.Los ke fuman mas ke dos paketos al dia korren el resgo de tener dementia.
4] Si sos uno ke konsume demaziado alcohol, pierdes la memoria i korres el resgo de tener dementia.Una otra puerta es el Syndrome de Korsakoff/falta de vitamina B1, ke puede entrenar una amnezia ke a vezes es permanente.
5] Ay ke evitar de tener trauma en kayendo o siendo aksidentado. Esto afekta a la memoria en siertos kavzos i developa dementia.
EL PLAZER DE VIAJAR
Un papel publikado en 2014 por Global Condition Of Ageing trata del benefisio fíziko,mental,kognitivo i sosial de los viajes en la vejes.Unos faktos interesantes.
1] Las mujeres ke viajan son mas sanas fizikamente i mentalmente. Si se sale por lo menos dos vezes al anyo en vakasiones, tienen menos resgo de un atako de korasón o de muerte oronaria, en komparando kon las ke salen en vakasiones una vez cada sesh anyos.
2] Los ombres ke viajan, biven mas largo.Los ke no salen en vakasiones tienen el resgo de 20% de murir i 30% de murir de problemas de korason.
3] Viajar es bueno kontra el «stress» i se envejese poko a poko.93% de los partisipantes se sienten mas feliz despues de salir en vakasiones.77% pensan ke están en mejor salud.80%kreen ke las aktividades ke se azen rezultan en produktividad, enerjia i atensión. Kuando uno no se deskansa del stress diario, el hormone cortisol suve i suve i uno se envejeze antes de su tiempo.
4] Aktividades komo paseos en la plaja, en los parkes nasionales,vijitas del muzeo,,tienen un impakto sovre la salud.Hay una interacción con otros i se aprende cosas nuevas.Los ke salen en viaje son mas satisfechos de salud, kontra los ke no viajan.
5] Los viajes en famiya aserkan a kada uno.Un viaje de multi-jeneration benefisia a los nietos i a los avuelos.Los viejos se sienten mas djoven.
Fuente: Ladinokomunita
