eSefarad Noticias del Mundo Sefaradi
Este anyo es el treser u kuatren anyo, ke eskrivo para la
ITAHDUT YOTSEİ TURKİYA
Este anyo es el treser u kuatren anyo, ke eskrivo para la ITAHDUT YOTSEİ TURKİYA
(Muestro kerido amigo, editor YAKUP BAROKAS save mijor).
Durante este tyempo kreyo ke ya me konositesh ke me plaze azer shakaikas, ke me plaze el arte, vidas reeles i investigasyones. Oy eskoji una kantika muy vyeja ma inolvidavle.
Bésame, bésame mucho
Como si fuera esta noche la última vez
Bésame, bésame mucho
Que tengo miedo perderte, perderte despues.
Quiero tenerte muy cerca mirarme en tus ojos
verte junto a mí
Piensa que tal vez manana yo estaré lejos, muy lejos de ti
Bésame, bésame mucho
Como si fuera esta noche la última vez
Bésame, bésame mucho
Que tengo miedo perderte, perderte despues.
Esta kantika es un bolero, eskrito i kompozado por Consuelo Velazquez Torres, enspirado de una arya de la opera “Groyescas” ke konta un primer amor platonik, un amor solo de una parte.
Consuelo Velazquez Torres, nasyo el 21 Ogusto en 1916 en Meksika en una sivdad nombrada Jalisco, kon un maraviyozo telente de nasyon en la musika. Apenas teniya kuatro anyos, sin tomar dinguna lisyon paso al piano i kuando teniya sesh anyos dyo su primer resital de piano.
Dospues de eskapar la primera eskola entro al konservatuar de bellas artes i eskapo su estudyo de piano kon premio de onor. Una buena pianista de musika klasika. A eya, la asperava una karyer i un avenir maraviyozo ma para eya la fama no era emportante, para eya era enportante solo el amor.
Dospues, en el anyo 1940, apenas teniya 25 anyos mirando una opera, de una arya le vino una enspirasyon i kompozo esta kantika inolvidavle de amor “BESAME MUCHO”.
Eya konta ke fin ke komposo esta kantika no se teniya besado kon dingun ombre.
Anyos i panyos todo el mundo kreyo ke esta kantika es Espanyola i es eskrita por un ombre. Porke en munchos paises CONSUELO se konsiderava komo nombre de ombre.
“Besame Mucho” es una kantika Meksikana i kompozada por una mujer. Una mujer muy fina, muy amable i korajoza.
Esta famosa kantika, fue interpretada por grandes figuras komo los Beatles, Frank Sinatra, Andrea Bocelli i Nat King Cole.
Consuelo no kedo solo kon esta kantika, kompozo mas munchas, en un entorno dominado por ombres, sirvyo en el Congreso i peno por los derechos de las artistas. Malgrado su reputasyon syempre prefero bivir una vida simple i se dediko a su famiya i al piano.
El primer rejistro de esta kantika fue por EMİLİO TUERO.
Emilio nasyo 1911 en Santonya, Espanya. El fue aktor i produktor de kantikas i albumes de munchos kantantes. Sovre todo del grupo Beatles.
Consuelo Velazques muryo el 22 Enero 2005 a los 88 anyos.
Kuando le demandavan:
“Komo vinites a este posto”
Eya les rospondiya syempre kon las mezmas palavras :
“Nunka no fui Bohema, syempre fui romantika todas mis ovras viniyan del profundo de mi alma.”
Enveranada buena!
Forti BAROKAS
Fuente: turkisrael.org.il
