EPOKA DE PURİM por Forti Barokas (teksto i boz)

El teksto mo lo avia dado İzzet Bana, mezmo dirijado por el, eskrito en el anyo 1873, Djuguado de parte de los djudios de Salonik en el 1940.

Antes 2.500 anyos, aviya un rey nombrado AHASHVEROSH, biviya en la sivdad SHUSHAN. El era governante del İmperyo PERSA.

Una noche, el rey se emborracha i sin pensar da un orden a su mujer VASHTİ. Vashti no aksepta, el rey, de vista la kita de reyna i la manda del palasyo.

Al otro dia, da orden ke todas las ijas de SHUSHAN, vengan al palasyo i se prezenten para ser reyna

En la mezma sivdad biviya un ombre djudyo prove, nombrado Mordehay ke manteniya a su sovrina guerfana ESTER.

Kuando oyo el orden del rey Ahashverosh, desido de yevarla a Ester al palasyo.

Entre tantas ijas, el rey la eskoje a ESTER i la aze reyna de Persa. Ester siguro ke no le dize al rey ke es djudiya, porke ya estava enkomendada por su tiyo Mordehay.

Ahashverosh, teniya un vezir nombrado AMAN.

 A Aman, le desgusta Mordehay, le da orden ke se enkorve delantre de el. Ma Mordehay le dize,

“mozos los djudyos no mos enkorvamos delantre de una persona, mozos mos enkorvamos solo delantre de dyos”.

El malo Aman es un antisemita aborrese Mordehay i empesa a azer planos para matar a los djudyos.

Se va ende el rey i lo konvense a esta mala idea. Le dize:

«En las tyerras ke governas ay un grupo de tu propya djente ke biven diferentes i no kumplen tus leyes”

Ahashverosh, da orden de matar a todos los djudyos.

La data del orden se da kon dados, el 13-14 Adar, sigun la data djudiya.

Mordehay ke oye este plano, no durme noche entera i la manda a yamar a la servidera de Ester, le dize va ande Ester i kontale lo ke te dishe.

Ester estava en el palasyo enkyeta ke no lo vido a su tiyo tantos diyas,  avla deya para eya;

ESTER—- Oh komo esto enkieta por mi tiyo Mordehay
                    Mi alma me se apreta no lo vide tres dias ay
                    A Lea mi konfidente embiyi por saver del
                    Guardalo dyo potente dyo piadoso eternel

Lea vyene en koryendo

LEA——- Mi reyna! Vengo de ver tu tiyo Mordehay, estava  triste

ESTER— ke akontesyo?

LEA—— Yo le prunti… porke no avia vinido al palasyo mientres 3 diyas, por repuesta el mostro un orden del rey

ESTER—Diziendo?

LEA——-melda,.todos djudios deven de ser eksterminados, el 13 adar

ESTER— Aman el vizir, ombre kruel, es el ke provoka Ahashverosh, oh dyo. Dime Lea, ke se poede azer para kitar desta sekana nuestro puevlo

LEA– en ti tenemos la esperansa

ESTER—en mi? yo Ke poedo azer?

LEA—— va ande Ahashverosh i demandale la salvasyon de tu puevlo

ESTER— Las leyes del palasio son muy fuertes, ken teine la ozadia de ir ande el rey sin ser yamada, es kondanada muerte.

LEA—- Ester! No penses tu vida, Ken save si no es el dyo ke te izo reyna para ke akudgas tu puevlo, La salvasion va vinir de ti, si no todos los djudios seremos desparesidos.

ESTER—-Lea! Va dile a mi tiyo Mordehay ke todos los djudios de Shushan, mientres tres diyas aran taanit i yo are mezmo…. İre ande Ahashverosh i demandare la salvasyon de los djudios. le dire ke so djudia, djudia en el kuerpo i djudia en la alma Mi sakrifisio sea kapara por mi puevlo. 

LEA—–oh mi reyna. en vano mespanti ke en suvyendo al trono  ivas ulvidarte de tu ley, el dyo ke te akonpanye,koraje mi reyna.

ESTER— Oh dyo tu sos mi rey, ayudame! Yo so sola i no tengo mas ke ti,  no agas reushir sus planos krueles, no mos deshes murir, dame koraje i fuersa para savlar mi puevlo…

Ester se presenta ande el Rey dospues de azer tanit durante tres diyas. El rey la aresive kon karinyo. Ester kon todo su koraje le konta el komplo de Aman, le dize ke es djudiya i le roga de salvar su puevlo. El rey la pardona lo enforka a Aman i le da el posto de Vizir a Mordehay.

Lea la servidera vyene kon alegriya allado de Ester

LEA—–Ester! El dyo sea bendicho… tu puevlo manifesta  su alegria… tu sos la salvadera

ESTER—. Ke el 14 adar sea diya de fyesta i de allegria para todos los djudios

KANTAD! KANTAD Mİ PUEVLO! BAYLAD! BAYLAD EL BAYLE DE LA SALVASYON… KE NUNKA NO SESKAPE LA ALEGRİYA EN NUESTRO PUEVLO İ EN LOS KORASONES AMEN.

FORTI BAROKAS