ENTREVISTA KON LA AVOKATA IRANIANA DE DERECHOS HUMANOS trezladado al ladino por Simon Geron

-Porke eskrivites en tu diario»asta ke seremos libres»? Esta istoria de Iran es ke es la istoria de tu Vida?

-Es porke mi istoria mostra ke tipo de governo tenemos en Iran i komo trata a la djente.No esto en kompetision kon ningun partido i ya se ve komo fui arselada.Es la manera ke tratan a los ke resiven el Premio de Nobel en aksion kon todos los mikrofones en el mundo.

-Ke fue el desavantaje de ganar el Premio de Nobel?

-El Premio en si no tiene su parte basha.Es el Governo ke lo mira kon suspision.Entraron en mi Kabinet de Avokata i serraron las puertas.Arrestaron a mis kollegas i tomaron todo.Serraron mis kuentos de banko.oy en dia mis kollegas estan en prision.El resultado fue ke bivo en el extranjero.

-Tu marido fue enganyado en organizando un enkontro sexual,después fue filmado i metido en prision,harvado i forzado a denunsiarte en la televisión o ser echado piedras sovre el.No fue esto el punto el mas basho en este asunto?

-No esto se paso kon munchos.Se paso mismo kon mis klientes.Yo les di el koraje ke avlen de mi.Ma esto es un taboo en Iran.

-Ke te disho tu marido al verte después de 4 anios?

-Disho ke mi lavoro estava ruiniando a la famiya i ke esto no iva traier la Demokrasia al pais.Me demando por kuanto tiempo keria kontinuar kon este lavoro.?

Mi repuesta fue ke esto era el kamino ke avía eskojido i no deseava tornarme atrás.

-Tu ermana fue metida en prision por su konneksion kon ti.Esto no afekto a vuestras relasiones entre las dos?

-Al kontrario nos aserko mas. Le dishe lo ke me paso.

-Ke fue la parte la mas dura en este lavoro?

-El dia ke serraron mi Kabinet de Avokata i arrestaron a mis kollegas.

=Porke no te gusta la frase»Arab Spring/Primavera Araba»?

-Porke La Revolusion en los Paises Arabos no trusho la Demokrasia. La Primavera es una temporada kuando sale la luz ke es una kosa buena i nueva.No fue esto ke se paso.Prefero desir mas»Alevantarse de la Supression del Puevlo».

-Esperas tornar atras agora ke los Reformistos estan suviendo?

-No ay nada ke se troko.El Presidente tiene un poder limitado.El poder esta en manos del Lider Supremo por la vida.»Rouhani» parese a «Mahmoud Abadinejat»,eksepto ke es mas guapo i ke puede reir mas.

-Ke es peor ke de bivir en el exilio?

-Kuando mis kollegas se van a morir,no poder partisipar a sus funerales.

-Enkorajas a tu ija de tomar el mismo kamino?

-La mas manseva tiene un PHD en Derechos Humanos.Es el kamino ke tomo eya.

-Estas de akordo ke las sanksiones kontra Iran sean alevantadas?

-Si,porke las sanksiones azen danio al puevlo.En metiendo sansiones el Governo no se troka. ay ke ver a la Korea del Norte.Kon todas las sanksiones el governo se kedo ayi todavia.El puevlo se izo mas i mas prove.

-Tienes unos regretos?

-Nunka.

-No te sientes kulpable por el sufrimiento de tu famiya i tus kolegas?

-No siento kulpabilidad. Ma me senti triste.Es el governo ke deve sentirse kulpable.