eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
PRIMADONNA SEFARADI: LINET SAUL, SOPRANO
Linet Saul es una de las estreyas de la Opera Nasional de Izmir, i la unika kantante profesional djudia en la istoria de la opera en Turkia. Kreygo ke eya es tambien la unika primadonna sefaradi del mundo. En el mez de judio de 2012 eya dio konserto de kantes sefaradis en Caracas, Venezuela, djuntos kon Doris Benmaman, espesialista de muzika antigua. Tiene tambien dado konsertos en Italia, Almanya, i Turkiya, entre otros.
Ma aun kon esto, a lo ke se yo, eya no es bastante konosida por el mundo asegun lo merese ser.
El grupo de Ladinokomunita ke viajo en Turkia en 2008 tuvo el grande plazer de sintirla kantar kantes sefaradis en el kal de la Sinyora de Izmir. Komo lo vimos entonses, i komo tambien se entiende de sus konsertos i resitales en la komunidad djudia, esta ija Izmirliya de kara i karakter dulse, es umilde i jeneroza kon su talento, sovre todo para ovras de bienfezensia, o kualker fiesta o okazion espesial. En el momento ke vos eskrivo estos biervos (Mierkoles la noche, el 19 de desembre) Linet Saul esta kantando en un koro de muzika Baroque en la iglezia anglikana de Izmir. El mez pasado (Novembre) eya fue solista (i la unika djudia) en un koro Alman ke prezento kompozisiones de muzika liturjika ashkenazi en el kal (la sinagoga) de La Sinyora.
Linet nasio en Izmir en 1970, i izo sus estudios muzikales en el Hartt School of Music en Hartford, Connecticut, en los Estados Unidos, despues kontinuo kon lisiones del bariton italiano, Licinio Montefusco, i finalmente tomo su doktorat del konservatorio de la Universidad 9 Eylul en Izmir.
Eya empeso su kariera en la opera en Estambol en 1995, kon el rolo de Adina en la opera Elisir d’Amore de Donizetti. Desde 1998 es miembra de la Opera Nasional de Izmir (Izmir Devlet Operasi), i kanto en rolos prinsipales en munchas bien konosidas operas.
Podesh ver lista de sus rolos, i muncho mas en indo a su sitio de Internet, http://www.linetsaul.com/ , ande podesh meldar – en inglez, italiano, o turko – mas sovre su kariera.
Vos rekomento tambien sintirla i verla en varias enrejistrasiones de sus rolos de opera en:
http://www.linetsaul.com/Linet_Saul/Recordings___Kaytlar.html
Espero ke en los anyos venideros la fama de muestra kerida i talentuoza Linet Saul, la unika primadonna sefaradia del mundo, se va espandir por el mundo entero, i todos van a konoser i apresyar este trezoro muzikal de la komunidad djudia de Izmir.
Rachel Amado-Bortnick
Dallas – Texas
Fondadora de Ladinokomunita
Tuvi el placer enorme de cantar con Linet dos veces, en Izmir, combinando mi estilo tradicional con su estilo de opera. Desde que nos conocimos nos hemos quedado buenas amigas. Me encanta este mini-retrato de Linet que ha hecho nuestra amiga Rachel!