eSefarad Noticias del Mundo Sefaradi
Ver todos los artículos de esta sección >>
_________________________________________________________
Pensamientos de Hanuka
En el mundo de mi chikez, a lo menos en Turkia, la povlasion jeneral (non djudia) no tenian haber ke mozotros (los djudios) teniamos una fiesta ke se yamava Hanuka. I mezmo en muestras kazas, no era una fiesta ke se podia komparar a «los moadim» de Pesah, Roshashana, Kipur o Shavuot. Enklavavamos la hanukia en la pared, i la ensendiamos (siempre kon alzete, i mechas/ fitilikos de algodon echas en kaza), asegun menester kon las orasiones, i el kantar Anerot Alalu. Ocho noches, muy ermozo. Ma kurta seremonia. Mos ivamos a la eskola komo siempre, los ombres se ivan a sus echos, i las mujeres azian sus echos de kaza. Si alguno de la famiya mos dava un «hanukalik», mos alegravamos, ma era koza de famiya solo.
Ma agora Hanuka se izo la fiesta djudia mas konosida en el mundo, una fiesta publika. Amigos i konosidos non-djudios me mandan felisitasiones de Hanuka, ma nada en las otras fiestas djudias. Esto es porke Hanuka esta komo en kompetensia kon, i el ekivalente djudio de, Noel (a lo menos aki en la Amerika (EEUU)) kon dekorasiones en kaza, luzes afuera (solo ke las djudias son blus i blankas) i dar regalos de parte aparte. Seguro ke istorikamente Hanuka no tiene nada ke ver kon Noel , i mezmo una mension semejante iva ser konsiderada eresia (heresy) por rabinos.
Ma agora es rabinos (espesialmente de Habad) ke empesaron la konkurensia kon Noel, a lo menos de punto de vista de LUZES PUBLIKAS, de mostrar a la povlasion ke i los djudios tienen sus fiesta de luzes. Ay konkurensia sovre ke sivdad va tener la hanukiya publika mas grande o alta. Mezmo en Estambol, Turkiya, se fiesto Hanuka en publiko, i se va fiestar demuevo oganyo (en Ortakoy, ande ay un kal, una miskita, i una kilisya una al lado de la otra.)
Ishalla ke esto va tener buenos rezultados.
De un eskrito del Rav Marc Angel (https://www.jewishideas.org/
En el Talmud (Shabat 21b) eskrive ke uvo una diskusion entre las eskolass de Bet Shammai i Bet Hillel sovre komo ensender las luzes de Hanuka. Bet Shammai propozava ke la primera noche se deve ensender 8 luzes, i una manka en kada noche sigyente, porke la alzeyte del Bet Amikdash se amenguo un poko kada noche de las 8 noches, asta ke no kedo mas alzeyte.
Ma Bet Hillel dezia a la kontra, en primero una luz, i kada noche sigyente adjustar una mas (asegun se uza agora.) La razon prezentada es ke en kavzos de santedad, siempre keremos pujar i no amenguar.
Pujar las luzes es un konsepto agradable, de punto estetiko i espiritualo. Pujar o engrandeser luz es komo pujar saviduria. Kuanti mas mos ambezamos, mas mos aklaramos. Kuando metemos luz en un problem, aklaramos la solusion. Kuanti mas luz tenemos, manko solombras i ilusiones tenemos.
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
