eSefarad Noticias del Mundo Sefaradi
Ver todos los artículos de esta sección >>
Antes de nada rogo ke todos estesh en buena salud, i ke esta “korona” se vayga al dip de la mar presto.
Esta semana, el 15 de Avri ( 21 Nisan en el kalendaryo djudio, o el kavo dia de Pesah) es el midrash de mi ermano Selim Amado, de bendicha memorya. (“Midrash” se uza en Izmir por lo ke otros yaman “meldado” o “yarzait”.) Por esto esta, vez me vo permeter de eskrivir un poko sovre el, no solo de lo ke munchos ya lo saven, ma tambien espero algunas kozas ke mezmo sus amigos intimos no savian.
Eramos solo dos ermanos, Selim i yo. Para mi esto es la realidad, ma Selim se akodrava de muestro ermano grande, Sami, ke muryo en 1940. Yo tenia solo 2 anyos i mi uniko konosimiento de el es de las fotografias ke tenemos. Ma Selim tenia sinko anyos, i se akdodrava de Sami komo si fuera ayer, i siempre lo yoro. La memorya de Selim era ekstraordinarya. El teniya solo tres anyos kuando nasi yo, i el me kontava kon detalios el dia de mi Siete Kandelas, la seremonia de fadar (meter nombre) a ijika, ke se avia echo en kaza.
Selim se akodrava por siempre de todo lo ke sintio, vido, o meldo, i esto lo reflektava en munchos de sus eskritos. Era un eskritor prolifiko, porke le viniya kolay (fasil) eskrivir, i tomava plazer de meter en papel sus pensamientos i la informasion ke savia en el orden i la manera klara i lojika ke el pensava. Los amigos suyos de la Itahdut i de la lodja masonika Nur en Israel dizen ke si le demandavan un artikolo de Selim una tadre, al dia ya se los mandava. I kuando egzistia el periodiko DiyaLog, su editor Rafael Algranati dizia ke los artikolos de Selim le yegavan antes de todos.
Al lado de artikolos i tekstos de konferensias, Selim eskriviya munchas letras, por munchos anyos era en papel (kon una eskriturya ermoza) i despues en emailes. Del dia ke sali de Izmir (1958), el me eskrivyo letras ke me konsolavan i me davan koraje kuando me sintiya sola. Se korespondia kon personas en munchas partes del mundo, porke todo el ke konosia se azia su amigo.
Mi mama dizia ke Selim era “kara de munchos amigos.” Su sirkolo de amigos sen engrandesyo afuera de Izmir empesando a la edad de de 15 anyos kuando se fue a Estambol para la lise (lycée/high school) St. Joseph i lavorava los enveranos en el pavion (pavillon) Fransez de la Fuar Internasional de Izmir. Kompleto sus estudios de farmasisto en la Universidad de Estambol, i despues estudio farmasia industriala en Monpellier, Fransia, i se topo kurto tiempo en Italia. Para Selim un amigo era amigo por vida, i siempre kedo en kontakto kon eyos.
Despues ke se aresento kon su famiya en Israel (izo aliya en 1972) empesaron sus aktividades en favor de la komunidad de Turkanos en Israel i de la masonika, i sus sienes de artikolos i tekstos. En los ultimos 10 anyos, el no se kanso de responder imediatamente a kada artikolo antisemeito ke meldava en turko, i kon su dulse tono i argumentos lojikos, konvensia a munchos de eyos a trokar sus ideas. Vo deshar a sus amigos en Israel, sovre todo los miembros del grupo “Parlamento” (ya saven los ke son) de komentar mas sovre el Selim ke konosieron.
Ma para mi, Selim era muncho mas del ombre intelektual i savido, de avla dulse i de buen korason ke munchos konosieron. El era tambien mi ermano del dia ke nasi, akel ijiko ke kedava a djugar kon los amigos despues de la eskola i deshava a mi mama en kudiado, ke me travava las kolas i me azia yorar, ma ke me azia riyir tambien, i kantava arias de opera (dainda no se de ande se las ambezava) kon boz de tenor, el ke me eskriviya letras kerensiozas, i ke yo keria bien kon todo mi korason. Era persona ke siempre tuve orgulyo de poder dizir “Selim Amado es mi ermano.”
En la luz del ganeden ke repoze, amen.
—————-
Rachel Amado Bortnick – Dallas
Fuente: turkisrael.co.il
