eSefarad Noticias del Mundo Sefaradi
Ver todos los artículos de esta sección >>
_________________________________________________________
Agora un anyo vos avia eskrito sovre el pleto entre las dos mas viejas kehilas del norte Amerika – Shearith Israel de New York i Touro Synagogue en Newport, R.I. – por la posesion de los rimonim de plata, ke la Touro los kere vender, i S.I. diziya ke apartienen a eyos. (Ver Pleto i djuzgo entre dos kehilas sefaradis istorikas)
Finalmente se rezolvio esto kon el djuzgo ke dio razon a Touro.
Podesh meldar los detalios en: Shearith Israel Loses Bid for Control of Touro Synagogue<
Djuzgo entre las kehilot Sefaradis
En todo esto ay una kestion ke me viene afuerte, komo ya mensioni de antes. En mensionando la istoria djudia de los Estados Unidos, avagar avagar alevantaron la mension ke los ke establesieron la vida djudia aki eran sefaradim, i ke sus influensa fue primaria asta la fin del siglo XIX, kuando vinyeron los milyones sovre milyones de imigrantes Ashkenazis.
Agora kayimos a ser una minoria tan chika ke ni se mensiona mas! O kuando se mensiona «sefaradi» es komo un sekto «egzotiko» del djudaizmo, venidos de los paizes arabes en los ultimos anyos.
El artikolo de ariva ya mensiona la orijin «primariamente» sefaradi de las dichas kongregasiones, ma esto es todo, komo ke es koza sin emportansia.
Seguro ke la kehila Jeshuat Israel ke okupa el edifisio de Touro oy en dia es Ashkenazi.
———-
Despues ke eskrivi lo de ariva, vide el artikolo en el Forward (jurnal djudio) sovre lo mizmo. Aki no pasa el biervo sefaradi deltodo!
Rhode Island Congregation Wins $7M Shul vs. Shul Legal Battle Over Shearith Israel
Rachel Amado Bortnick
Dallas, Texas
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
