eSefarad Noticias del Mundo Sefaradi
Ver todos los artículos de esta sección >>
En primero kero dar mis kondolensas, i las de todos los mebros de Ladinokomunita, a sus keridos i a la komunidad judia de Turkia por la gran piedrita del Hahambashi Izhak Haleva, z»l.
Aki vos kontare un kuento ke konto el, ke para mi tiene grande valor. Lo resivi en turko de mi amigo Moshe Levi de Izmir, ke biva munchos anyos.
«Kada ves ke viniya a Izmir, mos kontava el kuento de los dos rabinos viajadores».
Una ves estos dos hahames entran a una chika sivdad i van a la keila (sinagoga) para ver ke pasa. Ven ke todos estan orasionando kon boz alta, kon kantes, ets. Salen de aya un poko alegres i un poko tristes. Sienten en sus almas una estrechura ke no estan podiendo deskrivir.
Despues van a otro kazal, direkto a la keila. La keila esta vaziya i kayada, komo ke no ay dingunos adientro. Ama sienten komo un murmureo de una parte, i van enverso ayi. Sus korasones se inchen de alegria en viendo lo ke ven: Un ombre viejo, un papu, esta ambezando sin ezitasion unas kozas a su inyeto. Ya se salvo Israel!
Keridos amigos, no ay mijor lisyon de esto. Lo ke keremos ke kontinue, devemos ambezar a las muevas jenerasiones.
I esto me aze akodrar mi sientimiento en la keila de Ortakoy, en una de mis vijitas, kuando sinti a Naftali Haleva (ke biva munchos anyos, el ijo del deskansado) ambezando a kantar la perasha kon el makam djusto a un ijiko preparandose para su bar mizva.
Kon esto, tambien vos kero dar el atadijo del video ande el haham Haleva (z»l) avla en muestra lingua:
Haberes buenos ke tengamos de agora endelatre, Amen.
Rachel
________________________
Rachel Amado Bortnick – Dallas
Ladinokomunita
